1 Tavārīḵẖ 12

sāūl ke daur-e-hakūmat meṅ dāūd ke pairokār

¹zail ke ādmī siqlāj meṅ dāūd ke sāth mil gae, us vaqt jab vah sāūl bin qīs se chhupā rahatā thā. yah un faujiyoṅ meṅ se the jo jaṅg meṅ dāūd ke sāth mil kar laṛte the ²aur behtarīn tīr’andāz the, kyūṅki yah na sirf dahane balki bāeṅ hāth se bhī mahārat se tīr aur falāḵẖan kā patthar chalā sakte the. in ādmiyoṅ meṅ se darj-e-zail binyamīn ke qabīle aur sāūl ke ḵẖāndān se the.

³un kā rāhanumā aḵẖīazar, phir yūās (donoṅ samāāh jibiātī ke beṭe the), yazīel aur falat (donoṅ azmāvat ke beṭe the), barākā, yāhū antotī, ⁴ismāyāh jibaūnī jo dāūd ke 30 afsaroṅ kā ek sūrmā aur līḍar thā, yaramiyāh, yahazīel, yūhanān, yūzbad jadīrātī, ⁵iliūzī, yarīmot, bāliyāh, samariyāh aur safatiyāh ḵẖarūfī.

⁶qorah ke ḵẖāndān meṅ se ilqānā, yissiyāh, azrel, yūazar aur yasūbiām dāūd ke sāth the.

⁷in ke ilāvā yarohām jadūrī ke beṭe yūīlā aur zabadiyāh bhī the.

⁸jad ke qabīle se bhī kuchh bahādur aur tajaribākār faujī sāūl se alag ho kar dāūd ke sāth mil gae jab vah registān ke qilae meṅ thā. yah mard mahārat se ḍhāl aur nezā istemāl kar sakte the. un ke chihare sherbabar ke chiharoṅ kī mānind the, aur vah pahāṛī ilāqe meṅ ġazāloṅ kī tarah tez chal sakte the.

⁹un kā līḍar azar zail ke das ādmiyoṅ par muqarrar thā : abadiyāh, iliyāb, ¹⁰mismannā, yaramiyāh, ¹¹attī, ilīel, ¹²yūhanān, ilzabad, ¹³yaramiyāh aur makbannī.

¹⁴jad ke yah mard sab ālā faujī afsar ban gae. un meṅ se sab se kamzor ādmī sau ām faujiyoṅ kā muqāblā kar saktā thā jabki sab se tāqatvar ādmī hazār kā muqāblā kar saktā thā. ¹⁵in hī ne bahār ke mausam meṅ daryā-e-yardan ko pār kiyā, jab vah kināroṅ se bāhar ā gayā thā, aur mashriq aur maġrib kī vādiyoṅ ko band kar rakhā.

¹⁶binyamīn aur yahūdāh ke qabīloṅ ke kuchh mard dāūd ke pahāṛī qilae meṅ āe. ¹⁷dāūd bāhar nikal kar un se milne gayā aur pūchhā, “kyā āp salāmatī se mere pās āe haiṅ? kyā āp merī madad karnā chāhate haiṅ? agar aisā hai to maiṅ āp kā acchhā sāthī rahūṅgā. lekin agar āp mujhe dushmanoṅ ke havāle karne ke liye āe haiṅ hālāṅki mujh se koī bhī zulm nahīṅ huā hai to hamāre bāpdādā kā ḵẖudā ise dekh kar āp ko sazā de.”

¹⁸phir rūh-ul-quds 30 afsaroṅ ke rāhanumā amāsī par nāzil huā, aur us ne kahā, “ai dāūd, ham tere hī log haiṅ. ai yassī ke beṭe, ham tere sāth haiṅ. salāmatī, salāmatī tujhe hāsil ho, aur salāmatī unheṅ hāsil ho jo terī madad karte haiṅ. kyūṅki terā ḵẖudā terī madad karegā.” yah sun kar dāūd ne unheṅ qabūl karke apne chhāpāmār dastoṅ par muqarrar kiyā.

¹⁹manassī ke qabīle ke kuchh mard bhī sāūl se alag ho kar dāūd ke pās āe. us vaqt vah filistiyoṅ ke sāth mil kar sāūl se laṛne jā rahā thā, lekin bād meṅ use maidān-e-jaṅg meṅ āne kī ijāzat na milī. kyūṅki filistī sardāroṅ ne āpas meṅ mashvrā karne ke bād use yah kah kar vāpas bhej diyā ki ḵẖatrā hai ki yah hameṅ maidān-e-jaṅg meṅ chhoṛ kar apne purāne mālik sāūl se dubārā mil jāe. phir ham tabāh ho jāeṅge.

²⁰jab dāūd siqlāj vāpas jā rahā thā to manassī ke qabīle ke darj-e-zail afsar sāūl se alag ho kar us ke sāth ho liye : adnā, yūzbad, yadīael, mīkāel, yūzbad, ilīhū aur zillatī. manassī meṅ har ek ko hazār hazār faujiyoṅ par muqarrar kiyā gayā thā. ²¹unhoṅ ne lūṭne vāle amālīqī dastoṅ ko pakaṛne meṅ dāūd kī madad kī, kyūṅki vah sab diler aur qābil faujī the. sab us kī fauj meṅ afsar ban gae.

²²roz-ba-roz log dāūd kī madad karne ke liye āte rahe, aur hote hote us kī fauj allāh kī fauj jaisī baṛī ho gaī.

habrūn meṅ dāūd kī fauj

²³darj-e-zail un tamām faujiyoṅ kī faharist hai jo habrūn meṅ dāūd ke pās āe tāki use sāūl kī jagah bādshāh banāeṅ, jis tarah rabb ne hukm diyā thā.

²⁴yahūdāh ke qabīle ke ḍhāl aur neze se les 6,800 mard the.

²⁵shamāūn ke qabīle ke 7,100 tajaribākār faujī the.

²⁶lāvī ke qabīle ke 4,600 mard the. ²⁷un meṅ hārūn ke ḵẖāndān kā sarparast yahoyadā bhī shāmil thā jis ke sāth 3,700 ādmī the. ²⁸sadoq nāmī ek diler aur javān faujī bhī shāmil thā. us ke sāth us ke apne ḵẖāndān ke 22 afsar the.

²⁹sāūl ke qabīle binyamīn ke bhī 3,000 mard the, lekin is qabīle ke aksar faujī ab tak sāūl ke ḵẖāndān ke sāth lipṭe rahe.

³⁰ifrāīm ke qabīle ke 20,800 faujī the. sab apne ḵẖāndānoṅ meṅ asar-o-rasūḵẖ rakhne vāle the.

³¹manassī ke ādhe qabīle ke 18,000 mard the. unheṅ dāūd ko bādshāh banāne ke liye chun liyā gayā thā.

³²ishkār ke qabīle ke 200 afsar apne dastoṅ ke sāth the. yah log vaqt kī zarūrat samajh kar jānte the ki isrāīl ko kyā karnā hai.

³³zabūlūn ke qabīle ke 50,000 tajaribākār faujī the. vah har hathiyār se les aur pūrī vafādārī se dāūd ke liye laṛne ke liye tayyār the.

³⁴naftālī ke qabīle ke 1,000 afsar the. un ke tahat ḍhāl aur neze se musallah 37,000 ādmī the.

³⁵dān ke qabīle ke 28,600 mard the jo sab laṛne ke liye mustaid the.

³⁶āshar ke qabīle ke 40,000 mard the jo sab laṛne ke liye tayyār the.

³⁷daryā-e-yardan ke mashriq meṅ ābād qabīloṅ rūbin, jad aur manassī ke ādhe hisse ke 1,20,000 mard the. har ek har qism ke hathiyār se les thā.

³⁸sab tartīb se habrūn āe tāki pūre azam ke sāth dāūd ko pūre isrāīl kā bādshāh banāeṅ. bāqī tamām isrāīlī bhī muttafiq the ki dāūd hamārā bādshāh ban jāe. ³⁹yah faujī tīn din tak dāūd ke pās rahe jis daurān un ke qabāilī bhāī unheṅ khāne-pīne kī chīzeṅ muhayyā karte rahe. ⁴⁰qarīb ke rahane vāloṅ ne bhī is meṅ un kī madad kī. ishkār, zabūlūn aur naftālī tak ke log apne gadhoṅ, ūṅṭoṅ, ḵẖaccharoṅ aur bailoṅ par khāne kī chīzeṅ lād kar vahāṅ pahuṅche. maidā, anjīr aur kishmish kī ṭikkiyāṅ, mai, tel, bail aur bheṛ-bakriyāṅ baṛī miqdār meṅ habrūn lāī gaīṅ, kyūṅki tamām isrāīlī ḵẖushī manā rahe the.