1 Tavārīḵẖ 15

yarūshalam meṅ ahd ke sandūq ke liye tayyāriyāṅ

¹yarūshalam ke us hisse meṅ jis kā nām ‘dāūd kā shahar’ paṛ gayā thā dāūd ne apne liye chand imārateṅ banvāīṅ. us ne allāh ke sandūq ke liye bhī ek jagah tayyār karke vahāṅ ḵẖaimā lagā diyā. ²phir us ne hukm diyā, “sivā-e-lāviyoṅ ke kisī ko bhī allāh kā sandūq uṭhāne kī ijāzat nahīṅ. kyūṅki rabb ne in hī ko rabb kā sandūq uṭhāne aur hameshā ke liye us kī ḵẖidmat karne ke liye chun liyā hai.”

³is ke bād dāūd ne tamām isrāīl ko yarūshalam bulāyā tāki vah mil kar rabb kā sandūq us jagah le jāeṅ jo us ne us ke liye tayyār kar rakhī thī. ⁴bādshāh ne hārūn aur bāqī lāviyoṅ kī aulād ko bhī bulāyā. ⁵darj-e-zail un lāvī sarparastoṅ kī faharist hai jo apne rishtedāroṅ ko le kar āe.

qihāt ke ḵẖāndān se ūrīel 120 mardoṅ samet,

⁶mirārī ke ḵẖāndān se asāyāh 220 mardoṅ samet,

⁷jairsom ke ḵẖāndān se yoel 130 mardoṅ samet,

⁸ilīsafan ke ḵẖāndān se samāyāh 200 mardoṅ samet,

⁹habrūn ke ḵẖāndān se ilīel 80 mardoṅ samet,

¹⁰uzzīel ke ḵẖāndān se ammīnadāb 112 mardoṅ samet.

¹¹dāūd ne donoṅ imāmoṅ sadoq aur abiyātar ko mazkūrā chhah lāvī sarparastoṅ samet apne pās bulā kar ¹²un se kahā, “āp lāviyoṅ ke sarbarāh haiṅ. lāzim hai ki āp apne qabāilī bhāiyoṅ ke sāth apne āp ko maḵẖsūs-o-muqaddas karke rabb isrāīl ke ḵẖudā ke sandūq ko us jagah le jāeṅ jo maiṅ ne us ke liye tayyār kar rakhī hai. ¹³pahalī martabā jab ham ne use yahāṅ lāne kī koshish kī to yah āp lāviyoṅ ke zarīe na huā, is liye rabb hamāre ḵẖudā kā qahar ham par ṭūṭ paṛā. us vaqt ham ne us se darayāft nahīṅ kiyā thā ki use uṭhā kar le jāne kā kyā munāsib tarīqā hai.” ¹⁴tab imāmoṅ aur lāviyoṅ ne apne āp ko maḵẖsūs-o-muqaddas karke rabb isrāīl ke ḵẖudā ke sandūq ko yarūshalam lāne ke liye tayyār kiyā. ¹⁵phir lāvī allāh ke sandūq ko uṭhāne kī lakṛiyoṅ se apne kaṅdhoṅ par yūṅ hī rakh kar chal paṛe jis tarah mūsā ne rabb ke kalām ke mutābiq farmāyā thā.

¹⁶dāūd ne lāvī sarbarāhoṅ ko yah hukm bhī diyā, “apne qabīle meṅ se aise ādmiyoṅ ko chun leṅ jo sāz, sitār, sarod aur jhāṅjh bajāte hue ḵẖushī ke gīt gāeṅ.” ¹⁷us zimmādārī ke liye lāviyoṅ ne zail ke ādmiyoṅ ko muqarrar kiyā : haimān bin yoel, us kā bhāī āsaf bin barakiyāh aur mirārī ke ḵẖāndān kā aitān bin kausāyāh. ¹⁸dūsre maqām par un ke yah bhāī āe : zakariyāh, yāzīel, samīrāmot, yahīel, unnī, iliyāb, bināyāh, māsiyāh, mattitiyāh, ilīfalehū, miqniyāh, obed-adom aur yaīel. yah darbān the. ¹⁹haimān, āsaf aur aitān gulūkār the, aur unheṅ pītal ke jhāṅjh bajāne kī zimmādārī dī gaī. ²⁰zakariyāh, azīel, samīrāmot, yahīel, unnī, iliyāb, māsiyāh aur bināyāh ko alāmūt ke tarz par sitār bajānā thā. ²¹mattitiyāh, ilīfalehū, miqniyāh, obed-adom, yaīel aur azaziyāh ko shamīnīt ke tarz par sarod bajāne ke liye chunā gayā.

²²kananiyāh ne lāviyoṅ kī kavāir kī rāhanumāī kī, kyūṅki vah is meṅ māhir thā.

^23-24 barakiyāh, ilqānā, obed-adom aur yahiyāh ahd ke sandūq ke darbān the. sabaniyāh, yūsfat, natanīel, amāsī, zakariyāh, bināyāh aur ilīazar ko turam bajā kar allāh ke sandūq ke āge āge chalne kī zimmādārī dī gaī. sātoṅ imām the.

dāūd ahd kā sandūq yarūshalam meṅ le ātā hai

²⁵phir dāūd, isrāīl ke buzurg aur hazār hazār faujiyoṅ par muqarrar afsar ḵẖushī manāte hue nikal kar obed-adom ke ghar gae tāki rabb ke ahd kā sandūq vahāṅ se le kar yarūshalam pahuṅchāeṅ. ²⁶jab zāhir huā ki allāh ahd ke sandūq ko uṭhāne vāle lāviyoṅ kī madad kar rahā hai to sāt javān sāṅḍoṅ aur sāt meṅḍhoṅ ko qurbān kiyā gayā. ²⁷dāūd bārīk katān kā libās pahane hue thā, aur is tarah ahd kā sandūq uṭhāne vāle lāvī, gulūkār aur kavāir kā līḍar kananiyāh bhī. is ke ilāvā dāūd katān kā bālāposh pahane hue thā. ²⁸tamām isrāīlī ḵẖushī ke nāre lagā lagā kar, narsiṅge aur turam phūṅk phūṅk kar aur jhāṅjh, sitār aur sarod bajā bajā kar rabb ke ahd kā sandūq yarūshalam lāe.

²⁹rabb kā ahd kā sandūq dāūd ke shahar meṅ dāḵẖil huā to dāūd kī bīvī mīkal bint sāūl khiṛkī meṅ se julūs ko dekh rahī thī. jab bādshāh kūdtā aur nāchtā huā nazar āyā to mīkal ne use haqīr jānā.