1 Tavārīḵẖ 16
1allāh kā sandūq us tambū ke darmiyān meṅ rakhā gayā jo dāūd ne us ke liye lagvāyā thā. phir unhoṅ ne allāh ke huzūr bhasm hone vālī aur salāmatī kī qurbāniyāṅ pesh kīṅ. 2is ke bād dāūd ne qaum ko rabb ke nām se barkat de kar 3har isrāīlī mard aur aurat ko ek roṭī, khajūr kī ek ṭikkī aur kishmish kī ek ṭikkī de dī. 4us ne kuchh lāviyoṅ ko rabb ke sandūq ke sāmne ḵẖidmat karne kī zimmādārī dī. unheṅ rabb isrāīl ke ḵẖudā kī tamjīd aur hamd-o-sanā karnī thī. 5un kā sarbarāh āsaf jhāṅjh bajātā thā. us kā nāib zakariyāh thā. phir yaīel, samīrāmot, yahīel, mattitiyāh, iliyāb, bināyāh, obed-adom aur yaīel the jo sitār aur sarod bajāte the. 6bināyāh aur yahazīel imāmoṅ kī zimmādārī allāh ke ahd ke sandūq ke sāmne turam bajānā thī.
shukr kā gīt
7us din dāūd ne pahalī dafā āsaf aur us ke sāthī lāviyoṅ ke havāle zail kā gīt karke unheṅ rabb kī sitāish karne kī zimmādārī dī.
8“rabb kā shukr karo aur us kā nām pukāro! aqvām meṅ us ke kāmoṅ kā elān karo.
9sāz bajā kar us kī madahsarāī karo. us ke tamām ajāib ke bāre meṅ logoṅ ko batāo.
10us ke muqaddas nām par faḵẖar karo. rabb ke tālib dil se ḵẖush hoṅ.
11rabb aur us kī qudrat kī darayāft karo, har vaqt us ke chihare ke tālib raho.
12jo mojize us ne kie unheṅ yād karo. us ke ilāhī nishān aur us ke muṅh ke faisle duharāte raho.
13tum jo us ke ḵẖādim isrāīl kī aulād aur yāqūb ke farzand ho, jo us ke barguzīdā log ho, tumheṅ sab kuchh yād rahe!
14vahī rabb hamārā ḵẖudā hai, vahī pūrī duniyā kī adālat kartā hai.
15vah hameshā apne ahd kā ḵẖayāl rakhtā hai, us kalām kā jo us ne hazār pushtoṅ ke liye farmāyā thā.
16yah vah ahd hai jo us ne ibrāhīm se bāṅdhā, vah vādā jo us ne qasam khā kar ishāq se kiyā thā.
17us ne use yāqūb ke liye qāim kiyā tāki vah us ke mutābiq zindagī guzāre, us ne tasdīq kī ki yah merā isrāīl se abdī ahd hai.
18sāth sāth us ne farmāyā, ‘maiṅ tujhe mulk-e-kan’ān dūṅgā. yah terī mīrās kā hissā hogā.’
19us vaqt vah tādād meṅ kam aur thoṛe hī the balki mulk meṅ ajnabī hī the.
20ab tak vah muḵẖtalif qaumoṅ aur saltanatoṅ meṅ ghūmte phirte the.
21lekin allāh ne un par kisī ko zulm karne na diyā, aur un kī ḵẖātir us ne bādshāhoṅ ko ḍāṅṭā,
22‘mere masah kie hue ḵẖādimoṅ ko mat chheṛnā, mere nabiyoṅ ko nuqsān mat pahuṅchānā.’
23ai pūrī duniyā, rabb kī tamjīd meṅ gīt gā! roz-ba-roz us kī najāt kī ḵẖushḵẖabarī sunā.
24qaumoṅ meṅ us kā jalāl aur tamām ummatoṅ meṅ us ke ajāib bayān karo.
25kyūṅki rabb azīm aur sitāish ke bahut lāiq hai. vah tamām mābūdoṅ se mahīb hai.
26kyūṅki dīgar qaumoṅ ke tamām mābūd but hī haiṅ jabki rabb ne āsmān ko banāyā.
27us ke huzūr shān-o-shaukat, us kī sukūnatgāh meṅ qudrat aur jalāl hai.
28ai qaumoṅ ke qabīlo, rabb kī tamjīd karo, rabb ke jalāl aur qudrat kī sitāish karo.
29rabb ke nām ko jalāl do. qurbānī le kar us ke huzūr āo. muqaddas libās se ārāstā ho kar rabb ko sijdā karo.
30pūrī duniyā us ke sāmne laraz uṭhe. yaqīnan duniyā mazbūtī se qāim hai aur nahīṅ ḍagmagāegī.
31āsmān shādmān ho, aur zamīn jashn manāe. qaumoṅ meṅ kahā jāe ki rabb bādshāh hai.
32samundar aur jo kuchh us meṅ hai ḵẖushī se garaj uṭhe, maidān aur jo kuchh us meṅ hai bāġ bāġ ho.
33phir jaṅgal ke daraḵẖt rabb ke sāmne shādiyānā bajāeṅge, kyūṅki vah ā rahā hai, vah zamīn kī adālat karne ā rahā hai.
34rabb kā shukr karo, kyūṅki vah bhalā hai, aur us kī shafqat abdī hai.
35us se iltimās karo, ‘ai hamārī najāt ke ḵẖudā, hameṅ bachā! hameṅ jamā karke dīgar qaumoṅ ke hāth se chhuṛā. tab hī ham tere muqaddas nām kī sitāish kareṅge aur tere qābil-e-tārīf kāmoṅ par faḵẖar kareṅge.’
36azal se abad tak rabb, isrāīl ke ḵẖudā kī hamd ho!”
tab pūrī qaum ne “āmīn” aur “rabb kī hamd ho” kahā.
lāviyoṅ kī zimmādāriyāṅ
37dāūd ne āsaf aur us ke sāthī lāviyoṅ ko rabb ke ahd ke sandūq ke sāmne chhoṛ kar kahā, “āindā yahāṅ bāqāidagī se rozānā kī zarūrī ḵẖidmat karte jāeṅ.”
38is guroh meṅ obed-adom aur mazīd 68 lāvī shāmil the. obed-adom bin yadūtūn aur hūsā darbān ban gae.
39lekin sadoq imām aur us ke sāthī imāmoṅ ko dāūd ne rabb kī us sukūnatgāh ke pās chhoṛ diyā jo jibaūn kī pahāṛī par thī. 40kyūṅki lāzim thā ki vah vahāṅ har subah aur shām ko bhasm hone vālī qurbāniyāṅ pesh kareṅ aur bāqī tamām hidāyāt par amal kareṅ jo rabb kī taraf se isrāīl ke liye sharīat meṅ bayān kī gaī haiṅ. 41dāūd ne haimān, yadūtūn aur mazīd kuchh chīdā lāviyoṅ ko bhī jibaūn meṅ un ke pās chhoṛ diyā. vahāṅ un kī ḵẖās zimmādārī rabb kī hamd-o-sanā karnā thī, kyūṅki us kī shafqat abdī hai. 42un ke pās turam, jhāṅjh aur bāqī aise sāz the jo allāh kī tārīf meṅ gāe jāne vāle gītoṅ ke sāth bajāe jāte the. yadūtūn ke beṭoṅ ko darbān banāyā gayā.
43jashn ke bād sab log apne apne ghar chale gae. dāūd bhī apne ghar lauṭā tāki apne ḵẖāndān ko barkat de kar salām kare.