1 Tavārīḵẖ 26
rabb ke ghar ke darbān
1rabb ke ghar ke sahan ke darvāzoṅ par paharādārī karne ke guroh bhī muqarrar kie gae. un meṅ zail ke ādmī shāmil the :
qorah ke ḵẖāndān kā fard masalamiyāh bin qore jo āsaf kī aulād meṅ se thā. 2masalamiyāh ke sāt beṭe baṛe se le kar chhoṭe tak zakariyāh, yadīael, zabadiyāh, yatnīel, 3ailām, yūhanān aur ilīhūainī the.
4-5 obed-adom bhī darbān thā. allāh ne use barkat de kar āṭh beṭe die the. baṛe se le kar chhoṭe tak un ke nām samāyāh, yahūzabad, yūāḵẖ, sakār, natanīel, ammīel, ishkār aur faūllatī the. 6samāyāh bin obed-adom ke beṭe ḵẖāndānī sarbarāh the, kyūṅki vah kāfī asar-o-rasūḵẖ rakhte the. 7un ke nām utnī, rafāel, obed aur ilzabad the. samāyāh ke rishtedār ilīhū aur samakiyāh bhī guroh meṅ shāmil the, kyūṅki vah bhī ḵẖās haisiyat rakhte the. 8obed-adom se nikle yah tamām ādmī lāiq the. vah apne beṭoṅ aur rishtedāroṅ samet kul 62 afrād the aur sab mahārat se apnī ḵẖidmat sar’anjām dete the.
9masalamiyāh ke beṭe aur rishtedār kul 18 ādmī the. sab lāiq the.
10mirārī ke ḵẖāndān kā fard hūsā ke chār beṭe simrī, ḵẖilaqiyāh, tabaliyāh aur zakariyāh the. hūsā ne simrī ko ḵẖidmat ke guroh kā sarbarāh banā diyā thā agarchi vah pahalauṭhā nahīṅ thā. 11dūsre beṭe baṛe se le kar chhoṭe tak ḵẖilaqiyāh, tabaliyāh aur zakariyāh the. hūsā ke kul 13 beṭe aur rishtedār the.
12darbānoṅ ke in gurohoṅ meṅ ḵẖāndānī sarparast aur tamām ādmī shāmil the. bāqī lāviyoṅ kī tarah yah bhī rabb ke ghar meṅ apnī ḵẖidmat sar’anjām dete the. 13qur’ā-andāzī se muqarrar kiyā gayā ki kaun sā guroh sahan ke kis darvāze kī paharādārī kare. is silsile meṅ baṛe aur chhoṭe ḵẖāndānoṅ meṅ imtiyāz na kiyā gayā. 14yūṅ jab qur’ā ḍālā gayā to masalamiyāh ke ḵẖāndān kā nām mashriqī darvāze kī paharādārī karne ke liye niklā. zakariyāh bin masalamiyāh ke ḵẖāndān kā nām shimālī darvāze kī paharādārī karne ke liye niklā. zakariyāh apne dānā mashvaroṅ ke liye mashhūr thā. 15jab qur’ā junūbī darvāze kī paharādārī ke liye ḍālā gayā to obed-adom kā nām niklā. us ke beṭoṅ ko godām kī paharādārī karne kī zimmādārī dī gaī. 16jab maġribī darvāze aur salkat darvāze ke liye qur’ā ḍālā gayā to suffīm aur hūsā ke nām nikle. salkat darvāzā chaṛhne vāle rāste par hai.
paharādārī kī ḵẖidmat yūṅ bāṅṭī gaī :
17rozānā mashriqī darvāze par chhah lāvī paharā dete the, shimālī aur junūbī darvāzoṅ par chār chār afrād aur godām par do. 18rabb ke ghar ke sahan ke maġribī darvāze par chhah lāvī paharā dete the, chār rāste par aur do sahan meṅ.
19yah sab darbānoṅ ke guroh the. sab qorah aur mirārī ke ḵẖāndānoṅ kī aulād the.
ḵẖidmat ke liye lāviyoṅ ke mazīd guroh
20dūsre kuchh lāvī allāh ke ghar ke ḵẖazānoṅ aur rabb ke liye maḵẖsūs kī gaī chīzeṅ saṁbhālte the.
21-22 do bhāī zaitām aur yoel rabb ke ghar ke ḵẖazānoṅ kī paharādārī karte the. vah yahīel ke ḵẖāndān ke sarparast the aur yūṅ lādān jairsonī kī aulād the. 23amrām, izhār , habrūn aur uzzīel ke ḵẖāndānoṅ kī yah zimmādāriyāṅ thīṅ :
24sabūel bin jairsom bin mūsā ḵẖazānoṅ kā nigrān thā. 25jairsom ke bhāī ilīazar kā beṭā rahabiyāh thā. rahabiyāh kā beṭā yasāyāh, yasāyāh kā beṭā yūrām, yūrām kā beṭā zikrī aur zikrī kā beṭā salūmīt thā. 26salūmīt apne bhāiyoṅ ke sāth un muqaddas chīzoṅ ko saṁbhāltā thā jo dāūd bādshāh, ḵẖāndānī sarparastoṅ, hazār hazār aur sau sau faujiyoṅ par muqarrar afsaroṅ aur dūsre ālā afsaroṅ ne rabb ke liye maḵẖsūs kī thīṅ. 27yah chīzeṅ jaṅgoṅ meṅ lūṭe hue māl meṅ se le kar rabb ke ghar ko mazbūt karne ke liye maḵẖsūs kī gaī thīṅ. 28in meṅ vah sāmān bhī shāmil thā jo samūel ġaibbīn, sāūl bin qīs, abinair bin nair aur yoāb bin zarūyāh ne maqdis ke liye maḵẖsūs kiyā thā. salūmīt aur us ke bhāī in tamām chīzoṅ ko saṁbhālte the.
29izhār ke ḵẖāndān ke afrād yānī kananiyāh aur us ke beṭoṅ ko rabb ke ghar se bāhar kī zimmādāriyāṅ dī gaīṅ. unheṅ nigrānoṅ aur qāziyoṅ kī haisiyat se isrāīl par muqarrar kiyā gayā. 30habrūn ke ḵẖāndān ke afrād yānī hasabiyāh aur us ke bhāiyoṅ ko daryā-e-yardan ke maġrib ke ilāqe ko saṁbhālne kī zimmādārī dī gaī. vahāṅ vah rabb ke ghar se mutālliq kāmoṅ ke ilāvā bādshāh kī ḵẖidmat bhī sar’anjām dete the. in lāiq ādmiyoṅ kī kul tādād 1,700 thī.
31dāūd bādshāh kī hukūmat ke 40veṅ sāl meṅ nasbanāme kī tahqīq kī gaī tāki habrūn ke ḵẖāndān ke bāre meṅ mālūmāt hāsil ho jāeṅ. patā chalā ki us ke kaī lāiq rukan jiliād ke ilāqe ke shahar yāzer meṅ ābād haiṅ. yariyāh un kā sarparast thā. 32dāūd bādshāh ne use rūbin, jad aur manassī ke mashriqī ilāqe ko saṁbhālne kī zimmādārī dī. yariyāh kī is ḵẖidmat meṅ us ke ḵẖāndān ke mazīd 2,700 afrād bhī shāmil the. sab lāiq aur apne apne ḵẖāndānoṅ ke sarparast the. us ilāqe meṅ vah rabb ke ghar se mutālliq kāmoṅ ke ilāvā bādshāh kī ḵẖidmat bhī sar’anjām dete the.