1 Tavārīḵẖ 29
rabb ke ghar kī tāmīr ke liye nazrāne
1phir dāūd dubārā pūrī jamāat se muḵẖātib huā, “allāh ne mere beṭe sulemān ko chun kar muqarrar kiyā hai ki vah aglā bādshāh bane. lekin vah abhī javān aur nātajaribākār hai, aur yah tāmīrī kām bahut vasī hai. use to yah mahal insān ke liye nahīṅ banānā hai balki rabb hamāre ḵẖudā ke liye. 2maiṅ pūrī jāṅfishānī se apne ḵẖudā ke ghar kī tāmīr ke liye sāmān jamā kar chukā hūṅ. is meṅ sonā-chāṅdī, pītal, lohā, lakṛī, aqīq-e-ahmar [a] charanelian , muḵẖtalif jaṛe hue javāhir aur pacchīkārī ke muḵẖtalif patthar baṛī miqdār meṅ shāmil haiṅ. 3aur chūṅki mujh meṅ apne ḵẖudā kā ghar banāne ke liye bojh hai is liye maiṅ ne in chīzoṅ ke ilāvā apne zātī ḵẖazānoṅ se bhī sonā aur chāṅdī dī hai 4yānī taqrīban 1,00,000 kilogrām ḵẖālis sonā aur 235 kilogrām ḵẖālis chāṅdī. maiṅ chāhatā hūṅ ki yah kamroṅ kī dīvāroṅ par chaṛhāī jāe. 5kuchh kārīgaroṅ ke bāqī kāmoṅ ke liye bhī istemāl ho saktā hai. ab maiṅ āp se pūchhtā hūṅ, āj kaun merī tarah ḵẖushī se rabb ke kām ke liye kuchh dene ko tayyār hai?”
6yah sun kar vahāṅ hāzir ḵẖāndānī sarparastoṅ, qabīloṅ ke buzurgoṅ, hazār hazār aur sau sau faujiyoṅ par muqarrar afsaroṅ aur bādshāh ke ālā sarkārī afsaroṅ ne ḵẖushī se kām ke liye hadie die. 7us din rabb ke ghar ke liye taqrīban 1,70,000 kilogrām sonā, sone ke 10,000 sikke, 3,40,000 kilogrām chāṅdī, 6,10,000 kilogrām pītal aur 34,00,000 kilogrām lohā jamā huā. 8jis ke pās javāhir the us ne unheṅ yahīel jairsonī ke havāle kar diyā jo ḵẖazānchī thā aur jis ne unheṅ rabb ke ghar ke ḵẖazāne meṅ mahfūz kar liyā. 9pūrī qaum is farāḵẖdilī ko dekh kar ḵẖush huī, kyūṅki sab ne dilī ḵẖushī aur fayyāzī se apne hadie rabb ko pesh kie. dāūd bādshāh bhī nihāyat ḵẖush huā.
dāūd kī duā
10is ke bād dāūd ne pūrī jamāat ke sāmne rabb kī tamjīd karke kahā,
“ai rabb hamāre bāp isrāīl ke ḵẖudā, azal se abad tak terī hamd ho. 11ai rabb, azmat, qudrat, jalāl aur shān-o-shaukat tere hī haiṅ, kyūṅki jo kuchh bhī āsmān aur zamīn meṅ hai vah terā hī hai. ai rabb, saltanat tere hāth meṅ hai, aur tū tamām chīzoṅ par sarfarāz hai. 12daulat aur izzat tujh se miltī hai, aur tū sab par hukmarān hai. tere hāth meṅ tāqat aur qudrat hai, aur har insān ko tū hī tāqatvar aur mazbūt banā saktā hai. 13ai hamāre ḵẖudā, yah dekh kar ham terī sitāish aur tere jalālī nām kī tārīf karte haiṅ.
14merī aur merī qaum kī kyā haisiyat hai ki ham itnī fayyāzī se yah chīzeṅ de sake? āḵẖir hamārī tamām milkiyat terī taraf se hai. jo kuchh bhī ham ne tujhe de diyā vah hameṅ tere hāth se milā hai. 15apne bāpdādā kī tarah ham bhī tere nazdīk pardesī aur ġairshaharī haiṅ. duniyā meṅ hamārī zindagī sāy kī tarah ārizī hai, aur maut se bachne kī koī ummīd nahīṅ. 16ai rabb hamāre ḵẖudā, ham ne yah sārā tāmīrī sāmān is liye ikaṭṭhā kiyā hai ki tere muqaddas nām ke liye ghar banāyā jāe. lekin haqīqat meṅ yah sab kuchh pahale se tere hāth se hāsil huā hai. yah pahale se terā hī hai. 17ai mere ḵẖudā, maiṅ jāntā hūṅ ki tū insān kā dil jāṅch letā hai, ki diyānatdārī tujhe pasand hai. jo kuchh bhī maiṅ ne diyā hai vah maiṅ ne ḵẖushī se aur acchhī nīyat se diyā hai. ab mujhe yah dekh kar ḵẖushī hai ki yahāṅ hāzir terī qaum ne bhī itnī fayyāzī se tujhe hadie die haiṅ.
18ai rabb hamāre bāpdādā ibrāhīm, ishāq aur isrāīl ke ḵẖudā, guzārish hai ki tū hameshā tak apnī qaum ke diloṅ meṅ aisī hī taṛap qāim rakh. atā kar ki un ke dil tere sāth lipṭe raheṅ. 19mere beṭe sulemān kī bhī madad kar tāki vah pūre dil-o-jān se tere ahkām aur hidāyāt par amal kare aur us mahal ko takmīl tak pahuṅchā sake jis ke liye maiṅ ne tayyāriyāṅ kī haiṅ.”
20phir dāūd ne pūrī jamāat se kahā, “āeṅ, rabb apne ḵẖudā kī sitāish kareṅ!” chunāṅche sab rabb apne bāpdādā ke ḵẖudā kī tamjīd karke rabb aur bādshāh ke sāmne muṅh ke bal jhuk gae.
21agle din tamām isrāīl ke liye bhasm hone vālī bahut sī qurbāniyāṅ un kī mai kī nazroṅ samet rabb ko pesh kī gaīṅ. is ke liye 1,000 javān bailoṅ, 1,000 meṅḍhoṅ aur 1,000 bheṛ ke bacchoṅ ko chaṛhāyā gayā. sāth sāth zabah kī beshumār qurbāniyāṅ bhī pesh kī gaīṅ. 22us din unhoṅ ne rabb ke huzūr khāte-pīte hue baṛī ḵẖushī manāī. phir unhoṅ ne dubārā is kī tasdīq kī ki dāūd kā beṭā sulemān hamārā bādshāh hai. tel se use masah karke unhoṅ ne use rabb ke huzūr bādshāh aur sadoq ko imām qarār diyā.
sulemān kī zabardast hukūmat
23yūṅ sulemān apne bāp dāūd kī jagah rabb ke taḵẖt par baiṭh gayā. use kāmyābī hāsil huī, aur tamām isrāīl us ke tābe rahā. 24tamām ālā afsar, baṛe baṛe faujī aur dāūd ke bāqī beṭoṅ ne bhī apnī tābedārī kā izhār kiyā. 25isrāīl ke dekhte dekhte rabb ne sulemān ko bahut sarfarāz kiyā. us ne us kī saltanat ko aisī shān-o-shaukat se navāzā jo māzī meṅ isrāīl ke kisī bhī bādshāh ko hāsil nahīṅ huī thī.
dāūd kī vafāt
26-27 dāūd bin yassī kul 40 sāl tak isrāīl kā bādshāh rahā, 7 sāl habrūn meṅ aur 33 sāl yarūshalam meṅ. 28vah bahut umrrasīdā aur umr, daulat aur izzat se āsūdā ho kar intiqāl kar gayā. phir sulemān taḵẖtnashīn huā.
29bāqī jo kuchh dāūd kī hukūmat ke daurān huā vah tīnoṅ kitāboṅ ‘samūel ġaibbīn kī tārīḵẖ,’ ‘nātan nabī kī tārīḵẖ’ aur ‘jād ġaibbīn kī tārīḵẖ’ meṅ darj hai. 30in meṅ us kī hukūmat aur asar-o-rasūḵẖ kī tafsīlāt bayān kī gaī haiṅ, nīz vah kuchh jo us ke sāth, isrāīl ke sāth aur gird-o-navāh ke mamālik ke sāth huā.