1 Salātīn 1
adūniyāh kī sāzish
1dāūd bādshāh bahut būṛhā ho chukā thā. use hameshā sardī lagtī thī, aur us par mazīd bistar ḍālne se koī fāidā na hotā thā. 2yah dekh kar mulāzimoṅ ne bādshāh se kahā, “agar ijāzat ho to ham bādshāh ke liye ek naujavān kuṅvārī ḍhūṅḍ leṅ jo āp kī ḵẖidmat meṅ hāzir rahe aur āp kī dekh-bhāl kare. laṛkī āp ke sāth leṭ kar āp ko garm rakhe.” 3chunāṅche vah pūre mulk meṅ kisī ḵẖūbsūrat laṛkī kī talāsh karne lage. ḍhūṅḍte ḍhūṅḍte abīshāg shūnīmī ko chun kar bādshāh ke pās lāyā gayā. 4ab se vah us kī ḵẖidmat meṅ hāzir hotī aur us kī dekh-bhāl kartī rahī. laṛkī nihāyat ḵẖūbsūrat thī, lekin bādshāh ne kabhī us se sohbat na kī.
5-6 un dinoṅ meṅ adūniyāh bādshāh banne kī sāzish karne lagā. vah dāūd kī bīvī hajjīt kā beṭā thā. yūṅ vah abīslūm kā sautelā bhāī aur us ke marne par dāūd kā sab se baṛā beṭā thā. shakl-o-sūrat ke lihāz se log us kī baṛī tārīf kiyā karte the, aur bachpan se us ke bāp ne use kabhī nahīṅ ḍāṅṭā thā ki tū kyā kar rahā hai. ab adūniyāh apne āp ko logoṅ ke sāmne pesh karke elān karne lagā, “maiṅ hī bādshāh banūṅgā.” is maqsad ke tahat us ne apne liye rath aur ghoṛe ḵẖarīd kar 50 ādmiyoṅ ko rakh liyā tāki vah jahāṅ bhī jāe us ke āge āge chalte raheṅ. 7us ne yoāb bin zarūyāh aur abiyātar imām se bāt kī to vah us ke sāthī ban kar us kī himāyat karne ke liye tayyār hue. 8lekin sadoq imām, bināyāh bin yahoyadā aur nātan nabī us ke sāth nahīṅ the, na simaī, reī yā dāūd ke muhāfiz.
9ek din adūniyāh ne ain-rājil chashme ke qarīb kī chaṭān zuhalat ke pās ziyāfat kī. kāfī bheṛ-bakriyāṅ, gāy-bail aur moṭe-tāze bachhṛe zabah kie gae. adūniyāh ne bādshāh ke tamām beṭoṅ aur yahūdāh ke tamām shāhī afsaroṅ ko dāvat dī thī. 10kuchh logoṅ ko jān-būjh kar is meṅ shāmil nahīṅ kiyā gayā thā. un meṅ us kā bhāī sulemān, nātan nabī, bināyāh aur dāūd ke muhāfiz shāmil the.
dāūd sulemān ko bādshāh qarār detā hai
11tab nātan sulemān kī māṅ bat-sabā se milā aur bolā, “kyā yah ḵẖabar āp tak nahīṅ pahuṅchī ki hajjīt ke beṭe adūniyāh ne apne āp ko bādshāh banā liyā hai? aur hamāre āqā dāūd ko is kā ilm tak nahīṅ! 12āp kī aur āp ke beṭe sulemān kī zindagī baṛe ḵẖatre meṅ hai. is liye lāzim hai ki āp mere mashvre par fauran amal kareṅ. 13dāūd bādshāh ke pās jā kar use batā denā, ‘ai mere āqā aur bādshāh, kyā āp ne qasam khā kar mujh se vādā nahīṅ kiyā thā ki terā beṭā sulemān mere bād taḵẖtnashīn hogā? to phir adūniyāh kyūṅ bādshāh ban gayā hai?’ 14āp kī bādshāh se guftagu abhī ḵẖatm nahīṅ hogī ki maiṅ dāḵẖil ho kar āp kī bāt kī tasdīq karūṅgā.”
15bat-sabā fauran bādshāh ke pās gaī jo sone ke kamre meṅ leṭā huā thā. us vaqt to vah bahut umrrasīdā ho chukā thā, aur abīshāg us kī dekh-bhāl kar rahī thī. 16bat-sabā kamre meṅ dāḵẖil ho kar bādshāh ke sāmne muṅh ke bal jhuk gaī. dāūd ne pūchhā, “kyā bāt hai?” 17bat-sabā ne kahā, “mere āqā, āp ne to rabb apne ḵẖudā kī qasam khā kar mujh se vādā kiyā thā ki terā beṭā sulemān mere bād taḵẖtnashīn hogā. 18lekin ab adūniyāh bādshāh ban baiṭhā hai aur mere āqā aur bādshāh ko is kā ilm tak nahīṅ. 19us ne ziyāfat ke liye bahut se gāy-bail, moṭe-tāze bachhṛe aur bheṛ-bakriyāṅ zabah karke tamām shahazādoṅ ko dāvat dī hai. abiyātar imām aur fauj kā kamāṅḍar yoāb bhī in meṅ shāmil haiṅ, lekin āp ke ḵẖādim sulemān ko dāvat nahīṅ milī. 20ai bādshāh mere āqā, is vaqt tamām isrāīl kī āṅkheṅ āp par lagī haiṅ. sab āp se yah jānne ke liye taṛapte haiṅ ki āp ke bād kaun taḵẖtnashīn hogā. 21agar āp ne jald hī qadam na uṭhāyā to āp ke kūch kar jāne ke fauran bād maiṅ aur merā beṭā adūniyāh kā nishānā ban kar mujrim ṭhahareṅge.”
22-23 bat-sabā abhī bādshāh se bāt kar hī rahī thī ki dāūd ko ittilā dī gaī ki nātan nabī āp se milne āyā hai. nabī kamre meṅ dāḵẖil ho kar bādshāh ke sāmne auṅdhe muṅh jhuk gayā. 24phir us ne kahā, “mere āqā, lagtā hai ki āp is haq meṅ haiṅ ki adūniyāh āp ke bād taḵẖtnashīn ho. 25kyūṅki āj us ne ain-rājil jā kar bahut se gāy-bail, moṭe-tāze bachhṛe aur bheṛ-bakriyoṅ ko zabah kiyā hai. ziyāfat ke liye us ne tamām shahazādoṅ, tamām faujī afsaroṅ aur abiyātar imām ko dāvat dī hai. is vaqt vah us ke sāth khānā khā khā kar aur mai pī pī kar nārā lagā rahe haiṅ, ‘adūniyāh bādshāh zindābād!’ 26kuchh logoṅ ko jān-būjh kar dāvat nahīṅ dī. un meṅ maiṅ āp kā ḵẖādim, sadoq imām, bināyāh bin yahoyadā aur āp kā ḵẖādim sulemān bhī shāmil haiṅ. 27mere āqā, kyā āp ne vāqaī is kā hukm diyā hai? kyā āp ne apne ḵẖādimoṅ ko ittilā die baġair faislā kiyā hai ki yah shaḵẖs bādshāh banegā?”
28javāb meṅ dāūd ne kahā, “bat-sabā ko bulāeṅ!” vah vāpas āī aur bādshāh ke sāmne khaṛī ho gaī. 29bādshāh bolā, “rabb kī hayāt kī qasam jis ne fidyā de kar mujhe har musībat se bachāyā hai, 30āp kā beṭā sulemān mere bād bādshāh hogā balki āj hī mere taḵẖt par baiṭh jāegā. hāṅ, āj hī maiṅ vah vādā pūrā karūṅgā jo maiṅ ne rabb isrāīl ke ḵẖudā kī qasam khā kar āp se kiyā thā.” 31yah sun kar bat-sabā auṅdhe muṅh jhuk gaī aur kahā, “merā mālik dāūd bādshāh zindābād!”
32phir dāūd ne hukm diyā, “sadoq imām, nātan nabī aur bināyāh bin yahoyadā ko bulā lāeṅ.” tīnoṅ āe 33to bādshāh un se muḵẖātib huā, “mere beṭe sulemān ko mere ḵẖacchar par biṭhāeṅ. phir mere afsaroṅ ko sāth le kar use jaihūn chashme tak pahuṅchā deṅ. 34vahāṅ sadoq aur nātan use masah karke isrāīl kā bādshāh banā deṅ. narsiṅge ko bajā bajā kar nārā lagānā, ‘sulemān bādshāh zindābād!’ 35is ke bād mere beṭe ke sāth yahāṅ vāpas ā jānā. vah mahal meṅ dāḵẖil ho kar mere taḵẖt par baiṭh jāe aur merī jagah hukūmat kare, kyūṅki maiṅ ne use isrāīl aur yahūdāh kā hukmarān muqarrar kiyā hai.”
36bināyāh bin yahoyadā ne javāb diyā, “āmīn, aisā hī ho! rabb mere āqā kā ḵẖudā is faisle par apnī barkat de. 37aur jis tarah rabb āp ke sāth rahā usī tarah vah sulemān ke sāth bhī ho, balki vah us ke taḵẖt ko āp ke taḵẖt se kahīṅ ziyādā sarbuland kare!” 38phir sadoq imām, nātan nabī, bināyāh bin yahoyadā aur bādshāh ke muhāfiz karetiyoṅ aur faletiyoṅ ne sulemān ko bādshāh ke ḵẖacchar par biṭhā kar use jaihūn chashme tak pahuṅchā diyā. 39sadoq ke pās tel se bharā meṅḍhe kā vah sīṅg thā jo muqaddas ḵẖaime meṅ paṛā rahatā thā. ab us ne yah tel le kar sulemān ko masah kiyā. phir narsiṅgā bajāyā gayā aur log mil kar nārā lagāne lage, “sulemān bādshāh zindābād! sulemān bādshāh zindābād!” 40tamām log bāṅsrī bajāte aur ḵẖushī manāte hue sulemān ke pīchhe chalne lage. jab vah dubārā yarūshalam meṅ dāḵẖil huā to itnā shor thā ki zamīn laraz uṭhī.
adūniyāh kī shikast
41logoṅ kī yah āvāzeṅ adūniyāh aur us ke mehamānoṅ tak bhī pahuṅch gaīṅ. thoṛī der pahale vah khāne se fāriġ hue the. narsiṅge kī āvāz sun kar yoāb chauṅk uṭhā aur pūchhā, “yah kyā hai? shahar se itnā shor kyūṅ sunāī de rahā hai?” 42vah abhī yah bāt kar hī rahā thā ki abiyātar kā beṭā yūntan pahuṅch gayā. yoāb bolā, “hamāre pās āeṅ. āp jaise lāiq ādmī acchhī ḵẖabar le kar ā rahe hoṅge.”
43yūntan ne javāb diyā, “afsos, aisā nahīṅ hai. hamāre āqā dāūd bādshāh ne sulemān ko bādshāh banā diyā hai. 44us ne use sadoq imām, nātan nabī, bināyāh bin yahoyadā aur bādshāh ke muhāfiz karetiyoṅ aur faletiyoṅ ke sāth jaihūn chashme ke pās bhej diyā hai. sulemān bādshāh ke ḵẖacchar par savār thā. 45jaihūn chashme ke pās sadoq imām aur nātan nabī ne use masah karke bādshāh banā diyā. phir vah ḵẖushī manāte hue shahar meṅ vāpas chale gae. pūre shahar meṅ halchal mach gaī. yahī vah shor hai jo āp ko sunāī de rahā hai. 46ab sulemān taḵẖt par baiṭh chukā hai, 47aur darbārī hamāre āqā dāūd bādshāh ko mubārakabād dene ke liye us ke pās pahuṅch gae haiṅ. vah kah rahe haiṅ, ‘āp kā ḵẖudā kare ki sulemān kā nām āp ke nām se bhī ziyādā mashhūr ho jāe. us kā taḵẖt āp ke taḵẖt se kahīṅ ziyādā sarbuland ho.’ bādshāh ne apne bistar par jhuk kar allāh kī parastish kī 48aur kahā, ‘rabb isrāīl ke ḵẖudā kī tamjīd ho jis ne mere beṭoṅ meṅ se ek ko merī jagah taḵẖt par biṭhā diyā hai. us kā shukr hai ki maiṅ apnī āṅkhoṅ se yah dekh sakā’.”
49yūntan ke muṅh se yah ḵẖabar sun kar adūniyāh ke tamām mehamān ghabrā gae. sab uṭh kar chāroṅ taraf muntashir ho gae. 50adūniyāh sulemān se ḵẖauf khā kar muqaddas ḵẖaime ke pās gayā aur qurbāngāh ke sīṅgoṅ se lipaṭ gayā. 51kisī ne sulemān ke pās jā kar use ittilā dī, “adūniyāh ko sulemān bādshāh se ḵẖauf hai, is liye vah qurbāngāh ke sīṅgoṅ se lipṭe hue kah rahā hai, ‘sulemān bādshāh pahale qasam khāe ki vah mujhe maut ke ghāṭ nahīṅ utāregā’.” 52sulemān ne vādā kiyā, “agar vah lāiq sābit ho to us kā ek bāl bhī bīkā nahīṅ hogā. lekin jab bhī us meṅ badī pāī jāe vah zarūr maregā.”
53sulemān ne apne logoṅ ko adūniyāh ke pās bhej diyā tāki vah use bādshāh ke pās pahuṅchāeṅ. adūniyāh āyā aur sulemān ke sāmne auṅdhe muṅh jhuk gayā. sulemān bolā, “apne ghar chale jāo!”