1 Salātīn 10

sabā kī malikā sulemān se miltī hai

¹sulemān kī shuharat sabā kī malikā tak pahuṅch gaī. jab us ne us ke bāre meṅ sunā aur yah bhī ki us ne rabb ke nām ke liye kyā kuchh kiyā hai to vah sulemān se milne ke liye ravānā huī tāki use mushkil paheliyāṅ pesh karke us kī dānishmandī jāṅch le. ²vah nihāyat baṛe qāfile ke sāth yarūshalam pahuṅchī jis ke ūṅṭ balsān, kasrat ke sone aur qīmtī javāhir se lade hue the.

malikā kī sulemān se mulāqāt huī to us ne us se vah tamām mushkil savālāt pūchhe jo us ke zahan meṅ the. ³sulemān us ke har savāl kā javāb de sakā. koī bhī bāt itnī pechīdā nahīṅ thī ki bādshāh us kā matlab malikā ko batā na saktā. ⁴sabā kī malikā sulemān kī vasī hikmat aur us ke nae mahal se bahut mut’assir huī. ⁵us ne bādshāh kī mezoṅ par ke muḵẖtalif khāne dekhe aur yah ki us ke afsar kis tartīb se us par biṭhāe jāte the. us ne bairoṅ kī ḵẖidmat, un kī shāndār vardiyoṅ aur sāqiyoṅ par bhī ġaur kiyā. jab us ne in bātoṅ ke ilāvā bhasm hone vālī vah qurbāniyāṅ bhī dekhīṅ jo sulemān rabb ke ghar meṅ chaṛhātā thā to malikā hakkā-bakkā rah gaī.

⁶vah bol uṭhī, “vāqaī, jo kuchh maiṅ ne apne mulk meṅ āp ke shāhakāroṅ aur hikmat ke bāre meṅ sunā thā vah durust hai. ⁷jab tak maiṅ ne ḵẖud ā kar yah sab kuchh apnī āṅkhoṅ se na dekhā mujhe yaqīn nahīṅ ātā thā. balki haqīqat meṅ mujhe āp ke bāre meṅ ādhā bhī nahīṅ batāyā gayā thā. āp kī hikmat aur daulat un riporṭoṅ se kahīṅ ziyādā hai jo mujh tak pahuṅchī thīṅ. ⁸āp ke log kitne mubārak haiṅ! āp ke afsar kitne mubārak haiṅ jo musalsal āp ke sāmne khaṛe rahate aur āp kī dānish bharī bāteṅ sunte haiṅ! ⁹rabb āp ke ḵẖudā kī tamjīd ho jis ne āp ko pasand karke isrāīl ke taḵẖt par biṭhāyā hai. rabb isrāīl se abdī muhabbat rakhtā hai, isī liye us ne āp ko bādshāh banā diyā hai tāki insāf aur rāstbāzī qāim rakheṅ.”

¹⁰phir malikā ne sulemān ko taqrīban 4,000 kilogrām sonā, bahut ziyādā balsān aur javāhir die. bād meṅ kabhī bhī utnā balsān isrāīl meṅ nahīṅ lāyā gayā jitnā us vaqt sabā kī malikā lāī.

¹¹hīrām ke jahāz ofīr se na sirf sonā lāe balki unhoṅ ne qīmtī lakṛī aur javāhir bhī baṛī miqdār meṅ isrāīl tak pahuṅchāe. ¹²jitnī qīmtī lakṛī un dinoṅ meṅ dar’āmad huī utnī āj tak kabhī yahūdāh meṅ nahīṅ lāī gaī. is lakṛī se bādshāh ne rabb ke ghar aur apne mahal ke liye kaṭahare banvāe. yah mūsīqāroṅ ke sarod aur sitār banāne ke liye bhī istemāl huī.

¹³sulemān bādshāh ne apnī taraf se sabā kī malikā ko bahut se tuhfe die. nīz, jo kuchh bhī malikā chāhatī thī yā us ne māṅgā vah use diyā gayā. phir vah apne naukar-chākroṅ aur afsaroṅ ke hamrāh apne vatan vāpas chalī gaī.

sulemān kī daulat aur shuharat

¹⁴jo sonā sulemān ko sālānā miltā thā us kā vazan taqrīban 23,000 kilogrām thā. ¹⁵is meṅ vah ṭaiks shāmil nahīṅ the jo use saudāgaroṅ, tājiroṅ, arab bādshāhoṅ aur zilaoṅ ke afsaroṅ se milte the.

^16-17 sulemān bādshāh ne 200 baṛī aur 300 chhoṭī ḍhāleṅ banvāīṅ. un par sonā maṅḍhā gayā. har baṛī ḍhāl ke liye taqrīban 7 kilogrām sonā istemāl huā aur har chhoṭī ḍhāl ke liye taqrīban sāḍhe 3 kilogrām. sulemān ne unheṅ ‘lubnān kā jaṅgal’ nāmī mahal meṅ mahfūz rakhā.

¹⁸in ke ilāvā bādshāh ne hāthīdāṅt se ārāstā ek baṛā taḵẖt banvāyā jis par ḵẖālis sonā chaṛhāyā gayā. ^19-20 taḵẖt kī pusht kā ūpar kā hissā gol thā, aur us ke har bāzū ke sāth sherbabar kā mujassmā thā. taḵẖt kuchh ūṅchā thā, aur bādshāh chhah pāe vālī sīṛhī par chaṛh kar us par baiṭhtā thā. dāīṅ aur bāīṅ taraf har pāe par sherbabar kā mujassmā thā. is qism kā taḵẖt kisī aur saltanat meṅ nahīṅ pāyā jātā thā.

²¹sulemān ke tamām piyāle sone ke the, balki ‘lubnān kā jaṅgal’ nāmī mahal meṅ tamām bartan ḵẖālis sone ke the. koī bhī chīz chāṅdī kī nahīṅ thī, kyūṅki sulemān ke zamāne meṅ chāṅdī kī koī qadar nahīṅ thī. ²²bādshāh ke apne baharī jahāz the jo hīrām ke jahāzoṅ ke sāth mil kar muḵẖtalif jagahoṅ par jāte the. har tīn sāl ke bād vah sone-chāṅdī, hāthīdāṅt, bandaroṅ aur moroṅ se lade hue vāpas āte the.

²³sulemān kī daulat aur hikmat duniyā ke tamām bādshāhoṅ se kahīṅ ziyādā thī. ²⁴pūrī duniyā us se milne kī koshish kartī rahī tāki vah hikmat sun le jo allāh ne us ke dil meṅ ḍāl dī thī. ²⁵sāl-ba-sāl jo bhī sulemān ke darbār meṅ ātā vah koī na koī tuhfā lātā. yūṅ use sone-chāṅdī ke bartan, qīmtī libās, hathiyār, balsān, ghoṛe aur ḵẖacchar milte rahe.

²⁶sulemān ke 1,400 rath aur 12,000 ghoṛe the. kuchh us ne rathoṅ ke liye maḵẖsūs kie gae shaharoṅ meṅ aur kuchh yarūshalam meṅ apne pās rakhe. ²⁷bādshāh kī sargarmiyoṅ ke bāis chāṅdī patthar jaisī ām ho gaī aur deodār kī qīmtī lakṛī yahūdāh ke maġrib ke nishebī pahāṛī ilāqe kī anjīr-tūt kī sastī lakṛī jaisī ām ho gaī. ²⁸bādshāh apne ghoṛe misr aur kūe yānī kilikiyā se dar’āmad kartā thā. us ke tājir in jagahoṅ par jā kar unheṅ ḵẖarīd lāte the. ²⁹bādshāh ke rath misr se dar’āmad hote the. har rath kī qīmat chāṅdī ke 600 sikke aur har ghoṛe kī qīmat chāṅdī ke 150 sikke thī. sulemān ke tājir yah ghoṛe bar’āmad karte hue tamām hittī aur arāmī bādshāhoṅ tak bhī pahuṅchāte the.