1 Salātīn 17
kavve ilyās nabī ko khānā khilāte haiṅ
1ek din ilyās nabī ne jo jiliād ke shahar tishbī kā thā aḵẖiyab bādshāh se kahā, “rabb isrāīl ke ḵẖudā kī qasam jis kī ḵẖidmat maiṅ kartā hūṅ, āne vāle sāloṅ meṅ na os, na bārish paṛegī jab tak maiṅ na kahūṅ.”
2phir rabb ne ilyās se kahā, 3“yahāṅ se chalā jā! mashriq kī taraf safar karke vādī-e-karīt meṅ chhup jā jis kī nadī daryā-e-yardan meṅ bahatī hai. 4pānī tū nadī se pī saktā hai, aur maiṅ ne kavvoṅ ko tujhe vahāṅ khānā khilāne kā hukm diyā hai.” 5ilyās rabb kī sun kar ravānā huā aur vādī-e-karīt meṅ rahane lagā jis kī nadī daryā-e-yardan meṅ bahatī hai. 6subah-o-shām kavve use roṭī aur gosht pahuṅchāte rahe, aur pānī vah nadī se pītā thā.
ilyās sārpat kī bevā ke pās
7is pūre arse meṅ bārish na huī, is liye nadī āhistā āhistā sūkh gaī. jab us kā pānī bilkul ḵẖatm ho gayā 8to rabb dubārā ilyās se hamkalām huā, 9“yahāṅ se ravānā ho kar saidā ke shahar sārpat meṅ jā bas. maiṅ ne vahāṅ kī ek bevā ko tujhe khānā khilāne kā hukm diyā hai.” 10chunāṅche ilyās sārpat ke liye ravānā huā.
safar karte karte vah shahar ke darvāze ke pās pahuṅch gayā. vahāṅ ek bevā jalāne ke liye lakṛiyāṅ chun kar jamā kar rahī thī. use bulā kar ilyās ne kahā, “zarā kisī bartan meṅ pānī bhar kar mujhe thoṛā sā pilāeṅ.”
11vah abhī pānī lāne jā rahī thī ki ilyās ne us ke pīchhe āvāz de kar kahā, “mere liye roṭī kā ṭukṛā bhī lānā!” 12yah sun kar bevā ruk gaī aur bolī, “rabb āp ke ḵẖudā kī qasam, mere pās kuchh nahīṅ hai. bas, ek bartan meṅ muṭṭhī bhar maidā aur dūsre meṅ thoṛā sā tel rah gayā hai. ab maiṅ jalāne ke liye chand ek lakṛiyāṅ chun rahī hūṅ tāki apne aur apne beṭe ke liye āḵẖirī khānā pakāūṅ. is ke bād hamārī maut yaqīnī hai.”
13ilyās ne use tasallī dī, “ḍareṅ mat! beshak vah kuchh kareṅ jo āp ne kahā hai. lekin pahale mere liye chhoṭī sī roṭī banā kar mere pās le āeṅ. phir jo bāqī rah gayā ho us se apne aur apne beṭe ke liye roṭī banāeṅ. 14kyūṅki rabb isrāīl kā ḵẖudā farmātā hai, ‘jab tak rabb bārish barasne na de tab tak maide aur tel ke bartan ḵẖālī nahīṅ hoṅge’.”
15-16 aurat ne jā kar vaisā hī kiyā jaisā ilyās ne use kahā thā. vāqaī maidā aur tel kabhī ḵẖatm na huā. roz-ba-roz ilyās, bevā aur us ke beṭe ke liye khānā dastayāb rahā. sab kuchh vaisā hī huā jaisā rabb ne ilyās kī mārifat farmāyā thā.
17ek din bevā kā beṭā bīmār ho gayā. us kī tabīat bahut ḵẖarāb huī, aur hote hote us kī jān nikal gaī. 18tab bevā ilyās se shikāyat karne lagī, “mard-e-ḵẖudā, merā āp ke sāth kyā vāstā? āp to sirf is maqsad se yahāṅ āe haiṅ ki rabb ko mere gunāh kī yād dilā kar mere beṭe ko mār ḍāleṅ!”
19ilyās ne javāb meṅ kahā, “apne beṭe ko mujhe de deṅ.” vah laṛke ko aurat kī god meṅ se uṭhā kar chhat par apne kamre meṅ le gayā aur vahāṅ use chārpāī par rakh kar 20duā karne lagā, “ai rabb mere ḵẖudā, tū ne is bevā ko jis kā mehamān maiṅ hūṅ aisī musībat meṅ kyūṅ ḍāl diyā hai? tū ne us ke beṭe ko marne kyūṅ diyā?” 21vah tīn bār lāsh par darāz huā aur sāth sāth rabb se iltimās kartā rahā, “ai rabb mere ḵẖudā, barāh-e-karam bacche kī jān ko us meṅ vāpas āne de!”
22rabb ne ilyās kī sunī, aur laṛke kī jān us meṅ vāpas āī. 23ilyās use uṭhā kar nīche le āyā aur use us kī māṅ ko vāpas de kar bolā, “dekheṅ, āp kā beṭā zindā hai!” 24aurat ne javāb diyā, “ab maiṅ ne jān liyā hai ki āp allāh ke paiġambar haiṅ aur ki jo kuchh āp rabb kī taraf se bolte haiṅ vah sacch hai.”