1 Salātīn 3

sulemān rabb se hikmat māṅgtā hai

¹sulemān firaaun kī beṭī se shādī karke misrī bādshāh kā dāmād ban gayā. shurū meṅ us kī bīvī shahar ke us hisse meṅ rahatī thī jo ‘dāūd kā shahar’ kahalātā thā. kyūṅki us vaqt nayā mahal, rabb kā ghar aur shahar kī fasīl zer-e-tāmīr the.

²un dinoṅ meṅ rabb ke nām kā ghar tāmīr nahīṅ huā thā, is liye isrāīlī apnī qurbāniyāṅ muḵẖtalif ūṅchī jagahoṅ par chaṛhāte the. ³sulemān rabb se piyār kartā thā aur is liye apne bāp dāūd kī tamām hidāyāt ke mutābiq zindagī guzārtā thā. lekin vah bhī jānvaroṅ kī apnī qurbāniyāṅ aur baḵẖūr aise hī maqāmoṅ par rabb ko pesh kartā thā.

⁴ek din bādshāh jibaūn gayā aur vahāṅ bhasm hone vālī 1,000 qurbāniyāṅ chaṛhāīṅ, kyūṅki us shahar kī ūṅchī jagah qurbāniyāṅ chaṛhāne kā sab se aham markaz thī. ⁵jab vah vahāṅ ṭhaharā huā thā to rabb ḵẖwāb meṅ us par zāhir huā aur farmāyā, “terā dil kyā chāhatā hai? mujhe batā de to maiṅ terī ḵẖwāhish pūrī karūṅgā.”

⁶sulemān ne javāb diyā, “tū mere bāp dāūd par baṛī meharbānī kar chukā hai. vajah yah thī ki terā ḵẖādim vafādārī, insāf aur ḵẖulūsdilī se tere huzūr chaltā rahā. terī us par meharbānī āj tak jārī rahī hai, kyūṅki tū ne us kā beṭā us kī jagah taḵẖtnashīn kar diyā hai. ⁷ai rabb mere ḵẖudā, tū ne apne ḵẖādim ko mere bāp dāūd kī jagah taḵẖt par biṭhā diyā hai. lekin maiṅ abhī chhoṭā bacchā hūṅ jise apnī zimmādāriyāṅ sahīh taur par saṁbhālne kā tajribā nahīṅ huā. ⁸to bhī tere ḵẖādim ko terī chunī huī qaum ke bīch meṅ khaṛā kiyā gayā hai, itnī azīm qaum ke darmiyān ki use ginā nahīṅ jā saktā. ⁹chunāṅche mujhe sunne vālā dil atā farmā tāki maiṅ terī qaum kā insāf karūṅ aur sahīh aur ġalat bātoṅ meṅ imtiyāz kar sakūṅ. kyūṅki kaun terī is azīm qaum kā insāf kar saktā hai?”

¹⁰sulemān kī yah daraḵẖwāst rabb ko pasand āī, ¹¹is liye us ne javāb diyā, “maiṅ ḵẖush hūṅ ki tū ne na umr kī darāzī, na daulat aur na apne dushmanoṅ kī halākat balki imtiyāz karne kī salāhiyat māṅgī hai tāki sun kar insāf kar sake. ¹²is liye maiṅ terī daraḵẖwāst pūrī karke tujhe itnā dānishmand aur samajhdār banā dūṅgā ki utnā na māzī meṅ koī thā, na mustaqbil meṅ kabhī koī hogā. ¹³balki tujhe vah kuchh bhī de dūṅgā jo tū ne nahīṅ māṅgā, yānī daulat aur izzat. tere jīte jī koī aur bādshāh tere barābar nahīṅ pāyā jāegā. ¹⁴agar tū merī rāhoṅ par chaltā rahe aur apne bāp dāūd kī tarah mere ahkām ke mutābiq zindagī guzāre to phir maiṅ terī umr darāz karūṅgā.”

¹⁵sulemān jāg uṭhā to mālūm huā ki maiṅ ne ḵẖwāb dekhā hai. vah yarūshalam ko vāpas chalā gayā aur rabb ke ahd ke sandūq ke sāmne khaṛā huā. vahāṅ us ne bhasm hone vālī aur salāmatī kī qurbāniyāṅ pesh kīṅ, phir baṛī ziyāfat kī jis meṅ tamām darbārī sharīk hue.

do kasbiyoṅ ke bacche ke bāre meṅ sulemān kā faislā

¹⁶ek din do kasbiyāṅ bādshāh ke pās āīṅ. ¹⁷ek bāt karne lagī, “mere āqā, ham donoṅ ek hī ghar meṅ bastī haiṅ. kuchh der pahale is kī maujūdgī meṅ ghar meṅ mere bacchā paidā huā. ¹⁸do din ke bād is ke bhī bachā huā. ham akelī hī thīṅ, hamāre sivā ghar meṅ koī aur nahīṅ thā. ¹⁹ek rāt ko merī sāthī kā bacchā mar gayā. māṅ ne sote meṅ karvaṭeṅ badalte badalte apne bacche ko dabā diyā thā. ²⁰rātoṅ rāt ise mālūm huā ki beṭā mar gayā hai. maiṅ abhī gaharī nīṅd so rahī thī. yah dekh kar is ne mere bacche ko uṭhāyā aur apne murde beṭe ko merī god meṅ rakh diyā. phir vah mere beṭe ke sāth so gaī. ²¹subah ke vaqt jab maiṅ apne beṭe ko dūdh pilāne ke liye uṭhī to dekhā ki us se jān nikal gaī hai. lekin jab din mazīd chaṛhā aur maiṅ ġaur se use dekh sakī to kyā dekhtī hūṅ ki yah vah bacchā nahīṅ hai jise maiṅ ne janm diyā hai!”

²²dūsrī aurat ne us kī bāt kāṭ kar kahā, “hargiz nahīṅ! yah jhūṭ hai. merā beṭā zindā hai aur terā to mar gayā hai.” pahalī aurat chīḵẖ uṭhī, “kabhī bhī nahīṅ! zindā bacchā merā aur murdā bacchā terā hai.” aisī bāteṅ karte karte donoṅ bādshāh ke sāmne jhagaṛtī rahīṅ.

²³phir bādshāh bolā, “sīdhī sī bāt yah hai ki donoṅ hī dāvā kartī haiṅ ki zindā bacchā merā hai aur murdā bacchā dūsrī kā hai. ²⁴ṭhīk hai, phir mere pās talvār le āeṅ!” us ke pās talvār lāī gaī. ²⁵tab us ne hukm diyā, “zindā bacche ko barābar ke do hissoṅ meṅ kāṭ kar har aurat ko ek ek hissā de deṅ.” ²⁶yah sun kar bacche kī haqīqī māṅ ne jis kā dil apne beṭe ke liye taṛaptā thā bādshāh se iltimās kī, “nahīṅ mere āqā, use mat māreṅ! barāh-e-karam use isī ko de dījie.”

lekin dūsrī aurat bolī, “ṭhīk hai, use kāṭ deṅ. agar yah merā nahīṅ hogā to kam az kam terā bhī nahīṅ hogā.”

²⁷yah dekh kar bādshāh ne hukm diyā, “rukeṅ! bacche par talvār mat chalāeṅ balki use pahalī aurat ko de deṅ jo chāhatī hai ki zindā rahe. vahī us kī māṅ hai.” ²⁸jald hī sulemān ke is faisle kī ḵẖabar pūre mulk meṅ phail gaī, aur logoṅ par bādshāh kā ḵẖauf chhā gayā, kyūṅki unhoṅ ne jān liyā ki allāh ne use insāf karne kī ḵẖās hikmat atā kī hai.