1 Salātīn 5

hīrām bādshāh ke sāth sulemān kā muāhadā

¹sūr kā bādshāh hīrām hameshā dāūd kā acchhā dost rahā thā. jab use ḵẖabar milī ki dāūd ke bād sulemān ko masah karke bādshāh banāyā gayā hai to us ne apne safīroṅ ko use mubārakabād dene ke liye bhej diyā. ²tab sulemān ne hīrām ko paiġām bhejā, ³“āp jānte haiṅ ki mere bāp dāūd rabb apne ḵẖudā ke nām ke liye ghar tāmīr karnā chāhate the. lekin yah un ke bas kī bāt nahīṅ thī, kyūṅki un ke jīte jī ird-gird ke mamālik un se jaṅg karte rahe. go rabb ne dāūd ko tamām dushmanoṅ par fatah baḵẖshī thī, lekin laṛte laṛte vah rabb kā ghar na banā sake. ⁴ab hālāt farq haiṅ : rabb mere ḵẖudā ne mujhe pūrā sukūn atā kiyā hai. chāroṅ taraf na koī muḵẖālif nazar ātā hai, na koī ḵẖatrā. ⁵is liye maiṅ rabb apne ḵẖudā ke nām ke liye ghar tāmīr karnā chāhatā hūṅ. kyūṅki mere bāp dāūd ke jīte jī rabb ne un se vādā kiyā thā, ‘tere jis beṭe ko maiṅ tere bād taḵẖt par biṭhāūṅgā vahī mere nām ke liye ghar banāegā.’ ⁶ab guzārish hai ki āp ke lakaṛahāre lubnān meṅ mere liye deodār ke daraḵẖt kāṭ deṅ. mere log un ke sāth mil kar kām kareṅge. āp ke logoṅ kī mazdūrī maiṅ hī adā karūṅgā. jo kuchh bhī āp kaheṅge maiṅ unheṅ dūṅgā. āp to ḵẖūb jānte haiṅ ki hamāre hāṅ saidā ke lakkaṛahāroṅ jaise māhir nahīṅ haiṅ.”

⁷jab hīrām ko sulemān kā paiġām milā to vah bahut ḵẖush ho kar bol uṭhā, “āj rabb kī hamd ho jis ne dāūd ko is baṛī qaum par hukūmat karne ke liye itnā dānishmand beṭā atā kiyā hai!” ⁸sulemān ko hīrām ne javāb bhejā, “mujhe āp kā paiġām mil gayā hai, aur maiṅ āp kī zarūr madad karūṅgā. deodār aur jūnīpar kī jitnī lakṛī āp ko chāhie vah maiṅ āp ke pās pahuṅchā dūṅgā. ⁹mere log daraḵẖtoṅ ke tane lubnān ke pahāṛī ilāqe se nīche sāhil tak lāeṅge jahāṅ ham un ke beṛe bāṅdh kar samundar par us jagah pahuṅchā deṅge jo āp muqarrar kareṅge. vahāṅ ham tanoṅ ke rasse khol deṅge, aur āp unheṅ le jā sakeṅge. muāvaze meṅ āp mujhe itnī ḵẖurāk muhayyā kareṅ ki mere darbār kī zarūriyāt pūrī ho jāeṅ.”

¹⁰chunāṅche hīrām ne sulemān ko deodār aur jūnīpar kī utnī lakṛī muhayyā kī jitnī use zarūrat thī. ¹¹muāvaze meṅ sulemān use sālānā taqrīban 32,50,000 kilogrām gandum aur taqrīban 4,40,000 liṭar zaitūn kā tel bhejtā rahā. ¹²is ke ilāvā sulemān aur hīrām ne āpas meṅ sulah kā muāhadā kiyā. yūṅ rabb ne sulemān ko hikmat atā kī jis tarah us ne us se vādā kiyā thā.

rabb kā ghar banāne kī pahalī tayyāriyāṅ

^13-14 sulemān bādshāh ne lubnān meṅ yah kām karne ke liye isrāīl meṅ se 30,000 ādmiyoṅ kī begār par bhartī kī. us ne adūnīrām ko un par muqarrar kiyā. har māh vah bārī bārī 10,000 afrād ko lubnān meṅ bhejtā rahā. yūṅ har mazdūr ek māh lubnān meṅ aur do māh ghar meṅ rahatā. ¹⁵sulemān ne 80,000 ādmiyoṅ ko kānoṅ meṅ lagāyā tāki vah patthar nikāleṅ. 70,000 afrād yah patthar yarūshalam lāte the. ¹⁶un logoṅ par 3,300 nigrān muqarrar the. ¹⁷bādshāh ke hukm par vah kānoṅ se behtarīn patthar ke baṛe baṛe ṭukṛe nikāl lāe aur unheṅ tarāsh kar rabb ke ghar kī bunyād ke liye tayyār kiyā. ¹⁸jabal ke kārīgaroṅ ne sulemān aur hīrām ke kārīgaroṅ kī madad kī. unhoṅ ne mil kar patthar ke baṛe baṛe ṭukṛe aur lakṛī ko tarāsh kar rabb ke ghar kī tāmīr ke liye tayyār kiyā.