1 Salātīn 6
rabb ke ghar kī tāmīr
1sulemān ne apnī hukūmat ke chauthe sāl ke dūsre mahīne zīb meṅ rabb ke ghar kī tāmīr shurū kī. isrāīl ko misr se nikle 480 sāl guzar chuke the.
2imārat kī lambāī 90 fuṭ, chauṛāī 30 fuṭ aur ūṅchāī 45 fuṭ thī. 3sāmne ek barāmdā banāyā gayā jo imārat jitnā chauṛā yānī 30 fuṭ aur āge kī taraf 15 fuṭ lambā thā. 4imārat kī dīvāroṅ meṅ khiṛkiyāṅ thīṅ jin par jaṅgle lage the. 5imārat se bāhar ā kar sulemān ne dāeṅ bāeṅ kī dīvāroṅ aur pichhlī dīvār ke sāth ek ḍhāṅchā khaṛā kiyā jis kī tīn manzileṅ thīṅ aur jis meṅ muḵẖtalif kamre the. 6nichlī manzil kī andrūnī dīvār kī chauṛāī sāḍhe 7 fuṭ thī, darmiyānī manzil kī 9 fuṭ aur ūpar kī manzil kī sāḍhe 10 fuṭ. yānī darmiyānī manzil kī imārat vālī dīvār nichlī kī dīvār kī nisbat kam moṭī aur ūpar vālī manzil kī imārat vālī dīvār darmiyānī manzil kī dīvār kī nisbat kam moṭī thī. yūṅ is ḍhāṅche kī chhatoṅ ke shahatīroṅ ko imārat kī dīvār toṛ kar us meṅ lagāne kī zarūrat nahīṅ thī balki unheṅ imārat kī dīvār par hī rakhā gayā.
7jo patthar rabb ke ghar kī tāmīr ke liye istemāl hue unheṅ patthar kī kān ke andar hī tarāsh kar tayyār kiyā gayā. is liye jab unheṅ zer-e-tāmīr imārat ke pās lā kar joṛā gayā to na hathauṛoṅ, na chhainī na lohe ke kisī aur auzār kī āvāz sunāī dī.
8is ḍhāṅche meṅ dāḵẖil hone ke liye imārat kī dahanī dīvār meṅ darvāzā banāyā gayā. vahāṅ se ek sīṛhī parastār ko darmiyānī aur ūpar kī manzil tak pahuṅchātī thī. 9yūṅ sulemān ne imārat ko takmīl tak pahuṅchāyā. chhat ko deodār ke shahatīroṅ aur taḵẖtoṅ se banāyā gayā. 10jo ḍhāṅchā imārat ke tīnoṅ taraf khaṛā kiyā gayā use deodār ke shahatīroṅ se imārat kī bāhar vālī dīvār ke sāth joṛā gayā. us kī tīnoṅ manziloṅ kī ūṅchāī sāḍhe sāt sāt fuṭ thī.
11ek din rabb sulemān se hamkalām huā, 12“jahāṅ tak merī sukūnatgāh kā tālluq hai jo tū mere liye banā rahā hai, agar tū mere tamām ahkām aur hidāyāt ke mutābiq zindagī guzāre to maiṅ tere liye vah kuchh karūṅgā jis kā vādā maiṅ ne tere bāp dāūd se kiyā hai. 13tab maiṅ isrāīl ke darmiyān rahūṅgā aur apnī qaum ko kabhī tark nahīṅ karūṅgā.”
rabb ke ghar kā andrūnī hissā
14jab imārat kī dīvāreṅ aur chhat mukammal huīṅ 15to andrūnī dīvāroṅ par farsh se le kar chhat tak deodār ke taḵẖte lagāe gae. farsh par jūnīpar ke taḵẖte lagāe gae. 16ab tak imārat kā ek hī kamrā thā, lekin ab us ne deodār ke taḵẖtoṅ se farsh se le kar chhat tak dīvār khaṛī karke pichhle hisse meṅ alag kamrā banā diyā jis kī lambāī 30 fuṭ thī. yah muqaddastarīn kamrā ban gayā. 17jo hissā sāmne rah gayā use muqaddas kamrā muqarrar kiyā gayā. us kī lambāī 60 fuṭ thī. 18imārat kī tamām andrūnī dīvāroṅ par deodār ke taḵẖte yūṅ lage the ki kahīṅ bhī patthar nazar na āyā. taḵẖtoṅ par tūṁbe aur phūl kandā kie gae the.
19pichhle kamre meṅ rabb ke ahd kā sandūq rakhnā thā. 20is kamre kī lambāī 30 fuṭ, chauṛāī 30 fuṭ aur ūṅchāī 30 fuṭ thī. sulemān ne is kī tamām dīvāroṅ aur farsh par ḵẖālis sonā chaṛhāyā. muqaddastarīn kamre ke sāmne deodār kī qurbāngāh thī. us par bhī sonā maṅḍhā gayā 21balki imārat ke sāmne vāle kamre kī dīvāroṅ, chhat aur farsh par bhī sonā maṅḍhā gayā. muqaddastarīn kamre ke darvāze par sone kī zanjīreṅ lagāī gaīṅ. 22chunāṅche imārat kī tamām andrūnī dīvāroṅ, chhat aur farsh par sonā maṅḍhā gayā, aur isī tarah muqaddastarīn kamre ke sāmne kī qurbāngāh par bhī.
23phir sulemān ne zaitūn kī lakṛī se do karūbī farishte banvāe jinheṅ muqaddastarīn kamre meṅ rakhā gayā. in mujassamoṅ kā qad 15 fuṭ thā. 24-25 donoṅ shakl-o-sūrat meṅ ek jaise the. har ek ke do par the, aur har par kī lambāī sāḍhe sāt sāt fuṭ thī. chunāṅche ek par ke sire se dūsre par ke sire tak kā fāsilā 15 fuṭ thā. 26har ek kā qad 15 fuṭ thā. 27unheṅ muqaddastarīn kamre meṅ yūṅ ek dūsre ke sāth khaṛā kiyā gayā ki har farishte kā ek par dūsre ke par se lagtā jabki dāīṅ aur bāīṅ taraf har ek kā dūsrā par dīvār ke sāth lagtā thā. 28in farishtoṅ par bhī sonā maṅḍhā gayā.
29muqaddas aur muqaddastarīn kamroṅ kī dīvāroṅ par karūbī farishte, khajūr ke daraḵẖt aur phūl kandā kie gae. 30donoṅ kamroṅ ke farsh par bhī sonā maṅḍhā gayā. 31sulemān ne muqaddastarīn kamre kā darvāzā zaitūn kī lakṛī se banvāyā. us ke do kivāṛ the, aur chaukhaṭ kī lakṛī ke pāṅch kone the. 32darvāze ke kivāṛoṅ par karūbī farishte, khajūr ke daraḵẖt aur phūl kandā kie gae. in kivāṛoṅ par bhī farishtoṅ aur khajūr ke daraḵẖtoṅ samet sonā maṅḍhā gayā. 33sulemān ne imārat meṅ dāḵẖil hone vāle darvāze ke liye bhī zaitūn kī lakṛī se chaukhaṭ banvāī, lekin us kī lakṛī ke chār kone the. 34is darvāze ke do kivāṛ jūnīpar kī lakṛī ke bane hue the. donoṅ kivāṛ dīvār tak ghūm sakte the. 35in kivāṛoṅ par bhī karūbī farishte, khajūr ke daraḵẖt aur phūl kandā kie gae the. phir un par sonā yūṅ maṅḍhā gayā ki vah acchhī tarah in bel-būṭoṅ ke sāth lag gayā.
36imārat ke sāmne ek andrūnī sahan banāyā gayā jis kī chārdīvārī yūṅ tāmīr huī ki patthar ke har tīn raddoṅ ke bād deodār ke shahatīroṅ kā ek raddā lagāyā gayā.
37rabb ke ghar kī bunyād sulemān kī hukūmat ke chauthe sāl ke dūsre mahīne zīb meṅ ḍālī gaī, 38aur us kī hukūmat ke gyāraveṅ sāl ke āṭhveṅ mahīne būl meṅ imārat mukammal huī. sab kuchh naqshe ke ain mutābiq banā. is kām par kul sāt sāl sarf hue.