1 Salātīn 9

rabb sulemān se hamkalām hotā hai

¹chunāṅche sulemān ne rabb ke ghar aur shāhī mahal ko takmīl tak pahuṅchāyā. jo kuchh bhī us ne ṭhān liyā thā vah pūrā huā. ²us vaqt rabb dubārā us par zāhir huā, us tarah jis tarah vah jibaūn meṅ us par zāhir huā thā. ³us ne sulemān se kahā,

“jo duā aur iltijā tū ne mere huzūr kī use maiṅ ne sun kar is imārat ko jo tū ne banāī hai apne liye maḵẖsūs-o-muqaddas kar liyā hai. us meṅ maiṅ apnā nām abad tak qāim rakhūṅgā. merī āṅkheṅ aur dil abad tak vahāṅ hāzir raheṅge. ⁴jahāṅ tak terā tālluq hai, apne bāp dāūd kī tarah diyānatdārī aur rāstī se mere huzūr chaltā rah. kyūṅki agar tū mere tamām ahkām aur hidāyāt kī pairvī kartā rahe ⁵to maiṅ terī isrāīl par hukūmat hameshā tak qāim rakhūṅgā. phir merā vah vādā qāim rahegā jo maiṅ ne tere bāp dāūd se kiyā thā ki isrāīl par terī aulād kī hukūmat hameshā tak qāim rahegī.

⁶lekin ḵẖabardār! agar tū yā terī aulād mujh se dūr ho kar mere die gae ahkām aur hidāyāt ke tābe na rahe balki dīgar mābūdoṅ kī taraf rujū karke un kī ḵẖidmat aur parastish kare ⁷to maiṅ isrāīl ko us mulk meṅ se miṭā dūṅgā jo maiṅ ne un ko de diyā thā. na sirf yah balki maiṅ is ghar ko bhī radd kar dūṅgā jo maiṅ ne apne nām ke liye maḵẖsūs-o-muqaddas kar liyā hai. us vaqt isrāīl tamām aqvām meṅ mazāq aur lān-tān kā nishānā ban jāegā. ⁸is shāndār ghar kī burī hālat dekh kar yahāṅ se guzarne vāle tamām logoṅ ke roṅgṭe khaṛe ho jāeṅge, aur vah apnī hiqārat kā izhār karke pūchheṅge, ‘rabb ne is mulk aur is ghar se aisā sulūk kyūṅ kiyā?’ ⁹tab log javāb deṅge, ‘is liye ki go rabb un kā ḵẖudā un ke bāpdādā ko misr se nikāl kar yahāṅ lāyā to bhī yah log use tark karke dīgar mābūdoṅ se chimaṭ gae haiṅ. chūṅki vah un kī parastish aur ḵẖidmat karne se bāz na āe is liye rabb ne unheṅ is sārī musībat meṅ ḍāl diyā hai’.”

hīrām kī madad kā silā

¹⁰rabb ke ghar aur shāhī mahal ko tāmīr karne meṅ 20 sāl sarf hue the. ¹¹us daurān sūr kā bādshāh hīrām sulemān ko deodār aur jūnīpar kī utnī lakṛī aur utnā sonā bhejtā rahā jitnā sulemān chāhatā thā. jab imārateṅ takmīl tak pahuṅch gaīṅ to sulemān ne hīrām ko muāvaze meṅ galīl ke 20 shahar de die. ¹²lekin jab hīrām un kā muāinā karne ke liye sūr se galīl āyā to vah use pasand na āe. ¹³us ne savāl kiyā, “mere bhāī, yah kaise shahar haiṅ jo āp ne mujhe die haiṅ?” aur us ne us ilāqe kā nām kābūl yānī ‘kuchh bhī nahīṅ’ rakhā. yah nām āj tak rāij hai. ¹⁴bāt yah thī ki hīrām ne isrāīl ke bādshāh ko taqrīban 4,000 kilogrām sonā bhejā thā.

sulemān kī muḵẖtalif muhimmāt

¹⁵sulemān ne apne tāmīrī kām ke liye begārī lagāe. aise hī logoṅ kī madad se us ne na sirf rabb kā ghar, apnā mahal, ird-gird ke chabūtre aur yarūshalam kī fasīl banvāī balki tīnoṅ shahar hasūr, majiddo aur jazar ko bhī.

¹⁶jazar shahar par misr ke bādshāh firaaun ne hamlā karke qabzā kar liyā thā. us ke kan’ānī bāshindoṅ ko qatl karke us ne pūre shahar ko jalā diyā thā. jab sulemān kī firaaun kī beṭī se shādī huī to misrī bādshāh ne jahez ke taur par use yah ilāqā de diyā. ¹⁷ab sulemān ne jazar kā shahar dubārā tāmīr kiyā. is ke ilāvā us ne nishebī bait-haurūn, ¹⁸bālāt aur registān ke shahar tadmūr meṅ bahut sā tāmīrī kām karāyā.

¹⁹sulemān ne apne godāmoṅ ke liye aur apne rathoṅ aur ghoṛoṅ ko rakhne ke liye bhī shahar banvāe. jo kuchh bhī vah yarūshalam, lubnān yā apnī saltanat kī kisī aur jagah banvānā chāhatā thā vah us ne banvāyā.

^20-21 jin ādmiyoṅ kī sulemān ne begār par bhartī kī vah isrāīlī nahīṅ the balki amorī, hittī, farizzī, hivvī aur yabūsī yānī kan’ān ke pahale bāshindoṅ kī vah aulād the jo bāqī rah gae the. mulk par qabzā karte vaqt isrāīlī in qaumoṅ ko pūre taur par miṭā na sake, aur āj tak in kī aulād ko isrāīl ke liye begār meṅ kām karnā paṛtā hai. ²²lekin sulemān ne isrāīliyoṅ meṅ se kisī ko bhī aise kām karne par majbūr na kiyā balki vah us ke faujī, sarkārī afsar, fauj ke afsar aur rathoṅ ke faujī ban gae, aur unheṅ us ke rathoṅ aur ghoṛoṅ par muqarrar kiyā gayā. ²³sulemān ke tāmīrī kām par bhī 550 isrāīlī muqarrar the jo zilaoṅ par muqarrar afsaroṅ ke tābe the. yah log tāmīrī kām karne vāloṅ kī nigrānī karte the.

²⁴jab firaaun kī beṭī yarūshalam ke purāne hisse banām ‘dāūd kā shahar’ se us mahal meṅ muntaqil huī jo sulemān ne us ke liye tāmīr kiyā thā to vah ird-gird ke chabūtre banvāne lagā. ²⁵sulemān sāl meṅ tīn bār rabb ko bhasm hone vālī aur salāmatī kī qurbāniyāṅ pesh kartā thā. vah unheṅ rabb ke ghar kī us qurbāngāh par chaṛhātā thā jo us ne rabb ke liye banvāī thī. sāth sāth vah baḵẖūr bhī jalātā thā. yūṅ us ne rabb ke ghar ko takmīl tak pahuṅchāyā.

²⁶is ke ilāvā sulemān bādshāh ne baharī jahāzoṅ kā beṛā bhī banvāyā. is kām kā markaz ailāt ke qarīb shahar asyūn-jābar thā. yah bandargāh mulk-e-adom meṅ bahar-e-qulzum ke sāhil par hai. ²⁷hīrām bādshāh ne use tajaribākār mallāh bheje tāki vah sulemān ke ādmiyoṅ ke sāth mil kar jahāzoṅ ko chalāeṅ. ²⁸unhoṅ ne ofīr tak safar kiyā aur vahāṅ se taqrīban 14,000 kilogrām sonā sulemān ke pās le āe.