1 Samūel 18

dāūd aur yūntan kī dostī

¹is guftagu ke bād dāūd kī mulāqāt bādshāh ke beṭe yūntan se huī. un meṅ fauran gaharī dostī paidā ho gaī, aur yūntan dāūd ko apnī jān ke barābar azīz rakhne lagā. ²us din se sāūl ne dāūd ko apne darbār meṅ rakh liyā aur use bāp ke ghar vāpas jāne na diyā. ³aur yūntan ne dāūd se ahd bāṅdhā, kyūṅki vah dāūd ko apnī jān ke barābar azīz rakhtā thā. ⁴ahd kī tasdīq ke liye yūntan ne apnā choġā utār kar use apne zirābaktar, talvār, kamān aur peṭī samet dāūd ko de diyā.

⁵jahāṅ bhī sāūl ne dāūd ko laṛne ke liye bhejā vahāṅ vah kāmyāb huā. yah dekh kar sāūl ne use fauj kā baṛā afsar banā diyā. yah bāt avām aur sāūl ke afsaroṅ ko pasand āī.

sāūl dāūd se hasad kartā hai

⁶jab dāūd filistiyoṅ ko shikast dene se vāpas āyā to tamām shaharoṅ se aurteṅ nikal kar sāūl bādshāh se milne āīṅ. daf aur sāz bajāte hue vah ḵẖushī ke gīt gā gā kar nāchne lagīṅ. ⁷aur nāchte nāchte vah gātī rahīṅ, “sāūl ne to hazār halāk kie jabki dāūd ne das hazār.”

⁸sāūl baṛe ġusse meṅ ā gayā, kyūṅki aurtoṅ kā gīt use nihāyat burā lagā. us ne sochā, “un kī nazar meṅ dāūd ne das hazār halāk kie jabki maiṅ ne sirf hazār. ab sirf yah bāt rah gaī hai ki use bādshāh muqarrar kiyā jāe.” ⁹us vaqt se sāūl dāūd ko shak kī nazar se dekhne lagā. ^10-11 agle din allāh ne dubārā sāūl par burī rūh āne dī, aur vah ghar ke andar vajd kī hālat meṅ ā gayā. dāūd māmūl ke mutābiq sāz bajāne lagā tāki bādshāh ko sukūn mile. sāūl ke hāth meṅ nezā thā. achānak us ne use phaiṅk kar dāūd ko dīvār ke sāth chhed ḍālne kī koshish kī. lekin dāūd ek taraf haṭ kar bach niklā. ek aur dafā aisā huā, lekin dāūd phir bach gayā.

¹²yah dekh kar sāūl dāūd se ḍarne lagā, kyūṅki us ne jān liyā ki rabb mujhe chhoṛ kar dāūd kā hāmī ban gayā hai. ¹³āḵẖirkār us ne dāūd ko darbār se dūr karke hazār faujiyoṅ par muqarrar kar diyā. in ādmiyoṅ ke sāth dāūd muḵẖtalif jaṅgoṅ ke liye nikaltā rahā. ¹⁴aur jo kuchh bhī vah kartā us meṅ kāmyāb rahatā, kyūṅki rabb us ke sāth thā. ¹⁵jab sāūl ne dekhā ki dāūd ko kitnī ziyādā kāmyābī huī hai to vah us se mazīd ḍar gayā. ¹⁶lekin isrāīl aur yahūdāh ke bāqī log dāūd se bahut muhabbat rakhte the, kyūṅki vah har jaṅg meṅ nikalte vaqt se le kar ghar vāpas āte vaqt tak un ke āge āge chaltā thā.

dāūd sāūl kā dāmād ban jātā hai

¹⁷ek din sāūl ne dāūd se bāt kī, “maiṅ apnī baṛī beṭī mīrab kā rishtā āp ke sāth bāṅdhnā chāhatā hūṅ. lekin pahale sābit kareṅ ki āp acchhe faujī haiṅ, jo rabb kī jaṅgoṅ meṅ ḵẖūb hissā le.” lekin dil hī dil meṅ sāūl ne sochā, “ḵẖud to maiṅ dāūd par hāth nahīṅ uṭhāūṅgā, behatar hai ki vah filistiyoṅ ke hāthoṅ mārā jāe.” ¹⁸lekin dāūd ne etirāz kiyā, “maiṅ kaun hūṅ ki bādshāh kā dāmād banūṅ? isrāīl meṅ to mere ḵẖāndān aur ābāī kuṁbe kī koī haisiyat nahīṅ.”

¹⁹to bhī shādī kī tayyāriyāṅ kī gaīṅ. lekin jab muqarrarā vaqt ā gayā to sāūl ne mīrab kī shādī ek aur ādmī banām adrīel mahūlātī se karvā dī.

²⁰itne meṅ sāūl kī chhoṭī beṭī mīkal dāūd se muhabbat karne lagī. jab sāūl ko is kī ḵẖabar milī to vah ḵẖush huā. ²¹us ne sochā, “ab maiṅ beṭī kā rishtā us ke sāth bāṅdh kar use yūṅ phaṅsā dūṅgā ki vah filistiyoṅ se laṛte laṛte mar jāegā.” dāūd se us ne kahā, “āj āp ko merā dāmād banne kā dubārā mauqā milegā.”

²²phir us ne apne mulāzimoṅ ko hukm diyā ki vah chupke se dāūd ko batāeṅ, “suneṅ, āp bādshāh ko pasand haiṅ, aur us ke tamām afsar bhī āp ko piyār karte haiṅ. āp zarūr bādshāh kī peshkash qabūl karke us kā dāmād ban jāeṅ.” ²³lekin dāūd ne etirāz kiyā, “kyā āp kī dānist meṅ bādshāh kā dāmād bannā chhoṭī sī bāt hai? maiṅ to ġarīb ādmī hūṅ, aur merī koī haisiyat nahīṅ.”

²⁴mulāzimoṅ ne bādshāh ke pās vāpas jā kar use dāūd ke alfāz batāe. ²⁵sāūl ne unheṅ phir dāūd ke pās bhej kar use ittilā dī, “bādshāh mahar ke liye paise nahīṅ māṅgtā balki yah ki āp un ke dushmanoṅ se badlā le kar 100 filistiyoṅ ko qatl kar deṅ. sabūt ke taur par āp ko un kā ḵẖatnā karke jild kā kaṭā huā hissā bādshāh ke pās lānā paṛegā.” shart kā maqsad yah thā ki dāūd filistiyoṅ ke hāthoṅ mārā jāe.

²⁶jab dāūd ko yah ḵẖabar milī to use sāūl kī peshkash pasand āī. muqarrarā vaqt se pahale ²⁷us ne apne ādmiyoṅ ke sāth nikal kar 200 filistiyoṅ ko mār diyā. lāshoṅ kā ḵẖatnā karke vah jild ke kul 200 ṭukṛe bādshāh ke pās lāyā tāki bādshāh kā dāmād bane. yah dekh kar sāūl ne us kī shādī mīkal se karvā dī.

²⁸sāūl ko mānnā paṛā ki rabb dāūd ke sāth hai aur ki merī beṭī mīkal use bahut piyār kartī hai. ²⁹tab vah dāūd se aur bhī ḍarne lagā. is ke bād vah jīte jī dāūd kā dushman banā rahā. ³⁰un dinoṅ meṅ filistī sardār isrāīl se laṛte rahe. lekin jab bhī vah jaṅg ke liye nikle to dāūd sāūl ke bāqī afsaroṅ kī nisbat ziyādā kāmyāb hotā thā. natīje meṅ us kī shuharat pūre mulk meṅ phail gaī.