1 Samūel 19
yūntan dāūd kī sifārish kartā hai
1ab sāūl ne apne beṭe yūntan aur tamām mulāzimoṅ ko sāf batāyā ki dāūd ko halāk karnā hai. lekin dāūd yūntan ko bahut piyārā thā, 2is liye us ne use āgāh kiyā, “merā bāp āp ko mār dene ke mavāqe ḍhūṅḍ rahā hai. kal subah ḵẖabardār raheṅ. kahīṅ chhup kar merā intizār kareṅ. 3phir maiṅ apne bāp ke sāth shahar se nikal kar āp ke qarīb se guzarūṅgā. vahāṅ maiṅ un se āp kā muāmalā chheṛ kar mālūm karūṅgā ki vah kyā irādā rakhte haiṅ. jo kuchh bhī vah kaheṅge maiṅ āp ko batā dūṅgā.”
4aglī subah jab yūntan ne apne bāp se bāt kī to us ne dāūd kī sifārish karke kahā, “bādshāh apne ḵẖādim dāūd kā gunāh na kareṅ, kyūṅki us ne āp kā gunāh nahīṅ kiyā balki hameshā āp ke liye fāidāmand rahā hai. 5usī ne apnī jān ko ḵẖatre meṅ ḍāl kar filistī ko mār ḍālā, aur rabb ne us ke vasīle se tamām isrāīl ko baṛī najāt baḵẖshī. us vaqt āp ḵẖud bhī sab kuchh dekh kar ḵẖush hue. to phir āp gunāh karke us jaise bequsūr ādmī ko kyūṅ bilāvajah marvānā chāhate haiṅ?”
6yūntan kī bāteṅ sun kar sāūl mān gayā. us ne vādā kiyā, “rabb kī hayāt kī qasam, dāūd ko mārā nahīṅ jāegā.” 7bād meṅ yūntan ne dāūd ko bulā kar use sab kuchh batāyā, phir use sāūl ke pās lāyā. tab dāūd pahale kī tarah bādshāh kī ḵẖidmat karne lagā.
sāūl kā dāūd par dūsrā hamlā
8ek bār phir jaṅg chhiṛ gaī, aur dāūd nikal kar filistiyoṅ se laṛā. is dafā bhī us ne unheṅ yūṅ shikast dī ki vah farār ho gae. 9lekin ek din jab sāūl apnā nezā pakṛe ghar meṅ baiṭhā thā to allāh kī bhejī huī burī rūh us par ġālib āī. us vaqt dāūd sarod bajā rahā thā. 10achānak sāūl ne neze ko phaiṅk kar dāūd ko dīvār ke sāth chhed ḍālne kī koshish kī. lekin vah ek taraf haṭ gayā aur nezā us ke qarīb se guzar kar dīvār meṅ dhaṅs gayā. dāūd bhāg gayā aur us rāt sāūl ke hāth se bach gayā.
11sāūl ne fauran apne ādmiyoṅ ko dāūd ke ghar ke pās bhej diyā tāki vah makān kī paharādārī karke dāūd ko subah ke vaqt qatl kar deṅ. lekin dāūd kī bīvī mīkal ne us ko āgāh kar diyā, “āj rāt ko hī yahāṅ se chale jāeṅ, varnā āp nahīṅ bacheṅge balki kal subah hī mār die jāeṅge.” 12chunāṅche dāūd ghar kī khiṛkī meṅ se niklā, aur mīkal ne utarne meṅ us kī madad kī. tab dāūd bhāg kar bach gayā.
13mīkal ne dāūd kī chārpāī par but rakh kar us ke sar par bakriyoṅ ke bāl lagā die aur bāqī hisse par kambal bichhā diyā. 14jab sāūl ke ādmī dāūd ko pakaṛne ke liye āe to mīkal ne kahā, “vah bīmār hai.” 15faujiyoṅ ne sāūl ko ittilā dī to us ne unheṅ hukm diyā, “use chārpāī samet hī mere pās le āo tāki use mār dūṅ.”
16jab vah dāūd ko le jāne ke liye āe to kyā dekhte haiṅ ki us kī chārpāī par but paṛā hai jis ke sar par bakriyoṅ ke bāl lage haiṅ. 17sāūl ne apnī beṭī ko bahut jhiṛkā, “tū ne mujhe is tarah dhokā de kar mere dushman kī farār hone meṅ madad kyūṅ kī? terī hī vajah se vah bach gayā.” mīkal ne javāb diyā, “us ne mujhe dhamkī dī ki maiṅ tujhe qatl kar dūṅgā agar tū farār hone meṅ merī madad na kare.”
dāūd rāmā meṅ samūel ke pās
18is tarah dāūd bach niklā. vah rāmā meṅ samūel ke pās farār huā aur use sab kuchh sunāyā jo sāūl ne us ke sāth kiyā thā. phir donoṅ mil kar nayot chale gae. vahāṅ vah ṭhahare. 19sāūl ko ittilā dī gaī, “dāūd rāmā ke nayot meṅ ṭhaharā huā hai.” 20us ne fauran apne ādmiyoṅ ko use pakaṛne ke liye bhej diyā. jab vah pahuṅche to dekhā ki nabiyoṅ kā pūrā guroh vahāṅ nubuvvat kar rahā hai, aur samūel ḵẖud un kī rāhanumāī kar rahā hai. unheṅ dekhte hī allāh kā rūh sāūl ke ādmiyoṅ par nāzil huā, aur vah bhī nubuvvat karne lage. 21sāūl ko is bāt kī ḵẖabar milī to us ne mazīd ādmiyoṅ ko rāmā bhej diyā. lekin vah bhī vahāṅ pahuṅchte hī nubuvvat karne lage. sāūl ne tīsrī bār ādmiyoṅ ko bhej diyā, lekin yahī kuchh un ke sāth bhī huā.
22āḵẖir meṅ sāūl ḵẖud rāmā ke liye ravānā huā. chalte chalte vah sīkū ke baṛe hauz par pahuṅchā. vahāṅ us ne logoṅ se pūchhā, “dāūd aur samūel kahāṅ haiṅ?” unhoṅ ne javāb diyā, “rāmā kī ābādī nayot meṅ.”
23sāūl abhī nayot nahīṅ pahuṅchā thā ki allāh kā rūh us par bhī nāzil huā, aur vah nubuvvat karte karte nayot pahuṅch gayā. 24vahāṅ vah apne kapṛoṅ ko utār kar samūel ke sāmne nubuvvat kartā rahā. nubuvvat karte karte vah zamīn par leṭ gayā aur vahāṅ pūre din aur pūrī rāt paṛā rahā. isī vajah se yah qaul mashhūr huā, “kyā sāūl ko bhī nabiyoṅ meṅ shumār kiyā jātā hai?”