1 Samūel 20
dāūd aur yūntan ahd bāṅdhte haiṅ
1ab dāūd rāmā ke nayot se bhī bhāg gayā. chupke se vah yūntan ke pās āyā aur pūchhā, “mujh se kyā ġaltī huī hai? merā kyā qusūr hai? mujh se āp ke bāp ke ḵẖilāf kyā jurm sarzad huā hai ki vah mujhe qatl karnā chāhate haiṅ?”
2yūntan ne etirāz kiyā, “yah kabhī nahīṅ ho saktā! āp nahīṅ mareṅge. merā bāp to mujhe hameshā sab kuchh batā detā hai, ḵẖwāh bāt baṛī ho yā chhoṭī. to phir vah aisā koī mansūbā mujh se kyūṅ chhupāe? āp kī yah bāt sarāsar ġalat hai.”
3lekin dāūd ne qasam khā kar isrār kiyā, “zāhir hai ki āp ko is ke bāre meṅ ilm nahīṅ. āp ke bāp ko sāf mālūm hai ki maiṅ āp ko pasand hūṅ. ‘vah to sochte hoṅge, yūntan ko is bāt kā ilm na ho, varnā vah dukh mahsūs karegā.’ lekin rabb kī aur āp kī jān kī qasam, maiṅ baṛe ḵẖatre meṅ hūṅ, aur maut se bachnā mushkil hī hai.”
4yūntan ne kahā, “mujhe batāeṅ ki maiṅ kyā karūṅ to maiṅ use karūṅgā.” 5tab dāūd ne apnā mansūbā pesh kiyā. “kal nae chāṅd kī īd hai, aur bādshāh tavaqqo kareṅge ki maiṅ un kī ziyāfat meṅ sharīk hūṅ. lekin is martabā mujhe parsoṅ shām tak bāhar khule maidān meṅ chhupā rahane kī ijāzat deṅ. 6agar āp ke bāp merā patā kareṅ to unheṅ kah denā, ‘dāūd ne baṛe zor se mujh se apne shahar bait-laham ko jāne kī ijāzat māṅgī. use baṛī jaldī thī, kyūṅki us kā pūrā ḵẖāndān apnī sālānā qurbānī chaṛhānā chāhatā hai.’ 7agar āp ke bāp javāb deṅ ki ṭhīk hai to phir mālūm hogā ki ḵẖatrā ṭal gayā hai. lekin agar vah baṛe ġusse meṅ ā jāeṅ to yaqīn jāneṅ ki vah mujhe nuqsān pahuṅchāne kā irādā rakhte haiṅ. 8barāh-e-karam mujh par meharbānī karke yād rakheṅ ki āp ne rabb ke sāmne apne ḵẖādim se ahd bāṅdhā hai. agar maiṅ vāqaī qusūrvār ṭhaharūṅ to āp ḵẖud mujhe mār ḍāleṅ. lekin kisī sūrat meṅ bhī mujhe apne bāp ke havāle na kareṅ.”
9yūntan ne javāb diyā, “fikr na kareṅ, maiṅ kabhī aisā nahīṅ karūṅgā. jab bhī mujhe ishārā mil jāe ki merā bāp āp ko qatl karne kā irādā rakhtā hai to maiṅ zarūr āp ko fauran ittilā dūṅgā.” 10dāūd ne pūchhā, “agar āp ke bāp ġusse meṅ javāb deṅ to kaun mujhe ḵẖabar pahuṅchāegā?”
11yūntan ne javāb meṅ kahā, “āeṅ ham nikal kar khule maidān meṅ jāeṅ.” donoṅ nikle 12to yūntan ne dāūd se kahā, “rabb isrāīl ke ḵẖudā kī qasam, parsoṅ is vaqt tak maiṅ apne bāp se bāt mālūm kar lūṅgā. agar vah āp ke bāre meṅ acchhī soch rakhe aur maiṅ āp ko ittilā na dūṅ 13to rabb mujhe saḵẖt sazā de. lekin agar mujhe patā chale ki merā bāp āp ko mār dene par tulā huā hai to maiṅ āp ko is kī ittilā bhī dūṅgā. is sūrat meṅ maiṅ āp ko nahīṅ rokūṅgā balki āp ko salāmatī se jāne dūṅgā. rabb usī tarah āp ke sāth ho jis tarah vah pahale mere bāp ke sāth thā. 14lekin daraḵẖwāst hai ki mere jīte jī mujh par rabb kī sī meharbānī kareṅ tāki maiṅ mar na jāūṅ. 15mere ḵẖāndān par bhī hameshā tak meharbānī kareṅ. vah kabhī bhī āp kī meharbānī se maharūm na ho jāe, us vaqt bhī nahīṅ jab rabb ne āp ke tamām dushmanoṅ ko rū-e-zamīn par se miṭā diyā hogā.”
16chunāṅche yūntan ne dāūd se ahd bāṅdh kar kahā, “rabb dāūd ke dushmanoṅ se badlā le.” 17vah bolā, “qasam khāeṅ ki āp yah ahd utne puḵẖtā irāde se qāim rakheṅge jitnī āp mujh se muhabbat rakhte haiṅ.” kyūṅki yūntan dāūd ko apnī jān ke barābar azīz rakhtā thā.
18phir yūntan ne apnā mansūbā pesh kiyā. “kal to nae chāṅd kī īd hai. jaldī se patā chalegā ki āp nahīṅ āe, kyūṅki āp kī kursī ḵẖālī rahegī. 19is liye parsoṅ shām ke vaqt khule maidān meṅ vahāṅ chale jāeṅ jahāṅ pahale chhup gae the. patthar ke ḍher ke qarīb baiṭh jāeṅ. 20us vaqt maiṅ ghar se nikal kar tīn tīr patthar ke ḍher kī taraf chalāūṅgā goyā meṅ kisī chīz ko nishānā banā kar mashq kar rahā hūṅ. 21phir maiṅ laṛke ko tīroṅ ko le āne ke liye bhej dūṅgā. agar maiṅ use batā dūṅ, ‘tīr urlī taraf paṛe haiṅ, unheṅ jā kar le āo’ to āp ḵẖauf khāe baġair chhupne kī jagah se nikal kar mere pās ā sakeṅge. rabb kī hayāt kī qasam, is sūrat meṅ koī ḵẖatrā nahīṅ hogā. 22lekin agar maiṅ laṛke ko batā dūṅ, ‘tīr parlī taraf paṛe haiṅ’ to āp ko fauran hijrat karnī paṛegī. is sūrat meṅ rabb ḵẖud āp ko yahāṅ se bhej rahā hogā. 23lekin jo bāteṅ ham ne āj āpas meṅ kī haiṅ rabb ḵẖud hameshā tak in kā gavāh rahe.”
sāūl kī dāūd se alāniyā dushmanī
24chunāṅche dāūd khule maidān meṅ chhup gayā. nae chāṅd kī īd āī to bādshāh ziyāfat ke liye baiṭh gayā. 25māmūl ke mutābiq vah dīvār ke pās baiṭh gayā. abinair us ke sāth baiṭhā thā aur yūntan us ke muqābil. lekin dāūd kī jagah ḵẖālī rahī.
26us din sāūl ne bāt na chheṛī, kyūṅki us ne sochā, “dāūd kisī vajah se nāpāk ho gayā hogā, is liye nahīṅ āyā.”
27lekin agle din jab dāūd kī jagah phir ḵẖālī rahī to sāūl ne yūntan se pūchhā, “yassī kā beṭā na to kal, na āj ziyāfat meṅ sharīk huā hai. kyā vajah hai?” 28yūntan ne javāb diyā, “dāūd ne baṛe zor se mujh se bait-laham jāne kī ijāzat māṅgī. 29us ne kahā, ‘meharbānī karke mujhe jāne deṅ, kyūṅki merā ḵẖāndān ek ḵẖās qurbānī chaṛhā rahā hai, aur mere bhāī ne mujhe āne kā hukm diyā hai. agar āp ko manzūr ho to barāh-e-karam mujhe apne bhāiyoṅ ke pās jāne kī ijāzat deṅ.’ yahī vajah hai ki vah bādshāh kī ziyāfat meṅ sharīk nahīṅ huā.”
30yah sun kar sāūl āpe se bāhar ho gayā. vah garjā, “harāmzāde! mujhe ḵẖūb mālūm hai ki tū ne dāūd kā sāth diyā hai. sharm kī bāt hai, tere liye aur terī māṅ ke liye. 31jab tak yassī kā beṭā zindā hai tab tak na tū aur na terī bādashāhat qāim rahegī. ab jā, use le ā, kyūṅki use marnā hī hai.”
32yūntan ne kahā, “kyūṅ? us ne kyā kiyā jo sazā-e-maut ke lāiq hai?” 33javāb meṅ sāūl ne apnā nezā zor se yūntan kī taraf phaiṅk diyā tāki use mār ḍāle. yah dekh kar yūntan ne jān liyā ki sāūl dāūd ko qatl karne kā puḵẖtā irādā rakhtā hai. 34baṛe ġusse ke ālam meṅ vah khaṛā huā aur chalā gayā. us din us ne khānā khāne se inkār kiyā. use bahut dukh thā ki merā bāp dāūd kī itnī beizzatī kar rahā hai.
35agle din yūntan subah ke vaqt ghar se nikal kar khule maidān meṅ us jagah ā gayā jahāṅ dāūd se milnā thā. ek laṛkā us ke sāth thā. 36us ne laṛke ko hukm diyā, “chalo, us taraf bhāgnā shurū karo jis taraf maiṅ tīroṅ ko chalāūṅgā tāki tujhe mālūm ho ki vah kahāṅ haiṅ.” chunāṅche laṛkā dauṛne lagā, aur yūntan ne tīr itne zor se chalāyā ki vah us se āge kahīṅ dūr jā girā. 37jab laṛkā tīr ke qarīb pahuṅch gayā to yūntan ne āvāz dī, “tīr parlī taraf hai. 38jaldī karo, bhāg kar āge niklo aur na ruko!” phir laṛkā tīr ko uṭhā kar apne mālik ke pās vāpas ā gayā. 39vah nahīṅ jāntā thā ki is ke pīchhe kyā maqsad hai. sirf yūntan aur dāūd ko ilm thā.
40phir yūntan ne kamān aur tīroṅ ko laṛke ke sapurd karke use hukm diyā, “jāo, sāmān le kar shahar meṅ vāpas chale jāo.” 41laṛkā chalā gayā to dāūd patthar ke ḍher ke junūb se nikal kar yūntan ke pās āyā. tīn martabā vah yūntan ke sāmne muṅh ke bal jhuk gayā. ek dūsre ko chūm kar donoṅ ḵẖūb roe, ḵẖāskar dāūd. 42phir yūntan bolā, “salāmatī se jāeṅ! aur kabhī vah vāde na bhūleṅ jo ham ne rabb kī qasam khā kar ek dūsre se kie haiṅ. yah ahd āp ke aur mere aur āp kī aur merī aulād ke darmiyān hameshā qāim rahe. rabb ḵẖud hamārā gavāh hai.”
phir dāūd ravānā huā, aur yūntan shahar ko vāpas chalā gayā.