1 Samūel 21

dāūd nob meṅ aḵẖīmlik ke pās ṭhahartā hai

¹dāūd nob meṅ aḵẖīmlik imām ke pās gayā. aḵẖīmlik kāṁpte hue us se milne ke liye āyā aur pūchhā, “āp akele kyūṅ āe haiṅ? koī āp ke sāth nahīṅ.” ²dāūd ne javāb diyā, “bādshāh ne mujhe ek ḵẖās zimmādārī dī hai jis kā zikr tak karnā manā hai. kisī ko bhī is ke bāre meṅ jānnā nahīṅ chāhie. maiṅ ne apne ādmiyoṅ ko hukm diyā hai ki fulāṅ fulāṅ jagah par merā intizār kareṅ. ³ab mujhe zarā batāeṅ ki khāne ke liye kyā mil saktā hai? mujhe pāṅch roṭiyāṅ de deṅ, yā jo kuchh bhī āp ke pās hai.”

⁴imām ne javāb diyā, “mere pās ām roṭī nahīṅ hai. maiṅ āp ko sirf rabb ke liye maḵẖsūsashudā roṭī de saktā hūṅ. shart yah hai ki āp ke ādmī pichhle dinoṅ meṅ aurtoṅ se hambistar na hue hoṅ.” ⁵dāūd ne use tasallī de kar kahā, “fikr na kareṅ. pahale kī tarah hameṅ is muhimm ke daurān bhī aurtoṅ se dūr rahanā paṛā hai. mere faujī ām muhimmoṅ ke liye bhī apne āp ko pāk rakhte haiṅ, to is dafā vah kahīṅ ziyādā pāk-sāf haiṅ.”

⁶phir imām ne dāūd ko maḵẖsūsashudā roṭiyāṅ dīṅ yānī vah roṭiyāṅ jo mulāqāt ke ḵẖaime meṅ rabb ke huzūr rakhī jātī thīṅ aur usī din tāzā roṭiyoṅ se tabdīl huī thīṅ. ⁷us vaqt sāūl ke charvāhoṅ kā adomī iṅchārj doeg vahāṅ thā. vah kisī majbūrī ke bāis rabb ke huzūr ṭhaharā huā thā. us kī maujūdgī meṅ ⁸dāūd ne aḵẖīmlik se pūchhā, “kyā āp ke pās koī nezā yā talvār hai? mujhe bādshāh kī muhimm ke liye itnī jaldī se nikalnā paṛā ki apnī talvār yā koī aur hathiyār sāth lāne ke liye fursat na milī.”

⁹aḵẖīmlik ne javāb diyā, “jī hai. vādī-e-ailā meṅ āp ke hāthoṅ māre gae filistī mard jālūt kī talvār mere pās hai. vah ek kapṛe meṅ lipṭī mere bālāposh ke pīchhe paṛī hai. agar āp use apne sāth le jānā chāheṅ to le jāeṅ. mere pās koī aur hathiyār nahīṅ hai.” dāūd ne kahā, “is qism kī talvār kahīṅ aur nahīṅ miltī. mujhe de deṅ.”

dāūd filistī bādshāh ke pās

¹⁰usī din dāūd āge niklā tāki sāūl se bach sake. isrāīl ko chhoṛ kar vah filistī shahar jāt ke bādshāh akīs ke pās gayā. ¹¹lekin akīs ke mulāzimoṅ ne bādshāh ko āgāh kiyā, “kyā yah mulk kā bādshāh dāūd nahīṅ hai? isī ke bāre meṅ isrāīlī nāch kar gīt gāte haiṅ, ‘sāūl ne hazār halāk kie jabki dāūd ne das hazār’.”

¹²yah sun kar dāūd ghabrā gayā aur jāt ke bādshāh akīs se bahut ḍarne lagā. ¹³achānak vah pāgal ādmī kā rūp bhar kar un ke darmiyān ajīb ajīb harkateṅ karne lagā. shahar ke darvāze ke pās jā kar us ne us par betuke se nishān lagāe aur apnī dāṛhī par rāl ṭapakne dī.

¹⁴yah dekh kar akīs ne apne mulāzimoṅ ko jhiṛkā, “tum is ādmī ko mere pās kyūṅ le āe ho? tum ḵẖud dekh sakte ho ki yah pāgal hai. ¹⁵kyā mere pās pāgloṅ kī kamī hai ki tum is ko mere sāmne le āe ho tāki is tarah kī harkateṅ kare? kyā mujhe aise mehamān kī zarūrat hai?”