1 Samūel 22

adullām ke ġār aur moāb meṅ

¹is tarah dāūd jāt se bach niklā aur adullām ke ġār meṅ chhup gayā. jab us ke bhāiyoṅ aur bāp ke gharāne ko is kī ḵẖabar milī to vah bait-laham se ā kar vahāṅ us ke sāth jā mile. ²aur log bhī jaldī se us ke gird jamā ho gae, aise jo kisī musībat meṅ phaṅse hue the yā apnā qarz adā nahīṅ kar sakte the aur aise bhī jin kā dil talḵẖī se bharā huā thā. hote hote dāūd taqrīban 400 afrād kā rāhanumā ban gayā.

³dāūd adullām se ravānā ho kar mulk-e-moāb ke shahar misfāh chalā gayā. us ne moābī bādshāh se guzārish kī, “mere māṅ-bāp ko us vaqt tak yahāṅ panāh deṅ jab tak mujhe patā na ho ki allāh mere liye kyā irādā rakhtā hai.” ⁴vah apne māṅ-bāp ko bādshāh ke pās le āyā, aur vah utnī der tak vahāṅ ṭhahare jitnī der dāūd apne pahāṛī qilae meṅ rahā.

⁵ek din jād nabī ne dāūd se kahā, “yahāṅ pahāṛī qilae meṅ mat raheṅ balki dubārā yahūdāh ke ilāqe meṅ vāpas chale jāeṅ.” dāūd us kī sun kar hārat ke jaṅgal meṅ jā basā.

sāūl nob ke imāmoṅ se badlā letā hai

⁶sāūl ko ittilā dī gaī ki dāūd aur us ke ādmī dubārā yahūdāh meṅ pahuṅch gae haiṅ. us vaqt sāūl apnā nezā pakṛe jhāo ke us daraḵẖt ke sāy meṅ baiṭhā thā jo jibiā kī pahāṛī par thā. sāūl ke ird-gird us ke mulāzim khaṛe the. ⁷vah pukār uṭhā, “binyamīn ke mardo! suneṅ, kyā yassī kā beṭā āp sab ko khet aur aṅgūr ke bāġ degā? kyā vah fauj meṅ āp ko hazār hazār aur sau sau afrād par muqarrar karegā? ⁸lagtā hai ki āp is kī ummīd rakhte haiṅ, varnā āp yūṅ mere ḵẖilāf sāzish na karte. kyūṅki āp meṅ se kisī ne bhī mujhe yah nahīṅ batāyā ki mere apne beṭe ne is ādmī ke sāth ahd bāṅdhā hai. āp ko merī fikr tak nahīṅ, varnā mujhe ittilā dete ki yūntan ne mere mulāzim dāūd ko ubhārā hai ki vah merī tāk meṅ baiṭh jāe. kyūṅki āj to aisā hī ho rahā hai.”

⁹doeg adomī sāūl ke afsaroṅ ke sāth vahāṅ khaṛā thā. ab vah bol uṭhā, “maiṅ ne yassī ke beṭe ko dekhā hai. us vaqt vah nob meṅ aḵẖīmlik bin aḵẖītūb se milne āyā. ¹⁰aḵẖīmlik ne rabb se darayāft kiyā ki dāūd kā aglā qadam kyā ho. sāth sāth us ne use safar ke liye khānā aur filistī mard jālūt kī talvār bhī dī.”

¹¹bādshāh ne fauran aḵẖīmlik bin aḵẖītūb aur us ke bāp ke pūre ḵẖāndān ko bulāyā. sab nob meṅ imām the. ¹²jab pahuṅche to sāūl bolā, “aḵẖītūb ke beṭe, suneṅ.” aḵẖīmlik ne javāb diyā, “jī mere āqā, hukm.” ¹³sāūl ne ilzām lagā kar kahā, “āp ne yassī ke beṭe dāūd ke sāth mere ḵẖilāf sāzisheṅ kyūṅ kī haiṅ? batāeṅ, āp ne use roṭī aur talvār kyūṅ dī? āp ne allāh se darayāft kyūṅ kiyā ki dāūd āge kyā kare? āp hī kī madad se vah sarkash ho kar merī tāk meṅ baiṭh gayā hai, kyūṅki āj to aisā hī ho rahā hai.”

¹⁴aḵẖīmlik bolā, “lekin mere āqā, kyā mulāzimoṅ meṅ se koī aur āp ke dāmād dāūd jaisā vafādār sābit huā hai? vah to āp ke muhāfiz daste kā kaptān aur āp ke gharāne kā muazzaz maimbar hai. ¹⁵aur yah pahalī bār nahīṅ thā ki maiṅ ne us ke liye allāh se hidāyat māṅgī. is muāmale meṅ bādshāh mujh aur mere ḵẖāndān par ilzām na lagāe. maiṅ ne to kisī sāzish kā zikr tak nahīṅ sunā.”

¹⁶lekin bādshāh bolā, “aḵẖīmlik, tujhe aur tere bāp ke pūre ḵẖāndān ko marnā hai.” ¹⁷us ne sāth khaṛe apne muhāfizoṅ ko hukm diyā, “jā kar imāmoṅ ko mār do, kyūṅki yah bhī dāūd ke ittihādī haiṅ. go in ko mālūm thā ki dāūd mujh se bhāg rahā hai to bhī inhoṅ ne mujhe ittilā na dī.”

lekin muhāfizoṅ ne rabb ke imāmoṅ ko mār ḍālne se inkār kiyā. ¹⁸tab bādshāh ne doeg adomī ko hukm diyā, “phir tum hī imāmoṅ ko mār do.” doeg ne un ke pās jā kar un sab ko qatl kar diyā. katān kā bālāposh pahanne vāle kul 85 ādmī us din māre gae. ¹⁹phir us ne jā kar imāmoṅ ke shahar nob ke tamām bāshindoṅ ko mār ḍālā. shahar ke mard, aurteṅ, bacche shīraḵẖwāroṅ samet, gāy-bail, gadhe aur bheṛ-bakriyāṅ sab us din halāk hue.

²⁰sirf ek hī shaḵẖs bach gayā, abiyātar jo aḵẖīmlik bin aḵẖītūb kā beṭā thā. vah bhāg kar dāūd ke pās āyā ²¹aur use ittilā dī ki sāūl ne rabb ke imāmoṅ ko qatl kar diyā hai. ²²dāūd ne kahā, “us din jab maiṅ ne doeg adomī ko vahāṅ dekhā to mujhe mālūm thā ki vah zarūr sāūl ko ḵẖabar pahuṅchāegā. yah merā hī qusūr hai ki āp ke bāp kā pūrā ḵẖāndān halāk ho gayā hai. ²³ab mere sāth raheṅ aur mat ḍareṅ. jo ādmī āp ko qatl karnā chāhatā hai vah mujhe bhī qatl karnā chāhatā hai. āp mere sāth rah kar mahfūz raheṅge.”