1 Samūel 29
filistī dāūd par shak karte haiṅ
1filistiyoṅ ne apnī faujoṅ ko afīq ke pās jamā kiyā, jabki isrāīliyoṅ kī lashkargāh yazrael ke chashme ke pās thī. 2filistī sardār jaṅg ke liye nikalne lage. un ke pīchhe sau sau aur hazār hazār sipāhiyoṅ ke guroh ho liye. āḵẖir meṅ dāūd aur us ke ādmī bhī akīs ke sāth chalne lage.
3yah dekh kar filistī kamāṅḍaroṅ ne pūchhā, “yah isrāīlī kyūṅ sāth jā rahe haiṅ?” akīs ne javāb diyā, “yah dāūd hai, jo pahale isrāīlī bādshāh sāūl kā faujī afsar thā aur ab kāfī der se mere sāth hai. jab se vah sāūl ko chhoṛ kar mere pās āyā hai maiṅ ne us meṅ aib nahīṅ dekhā.”
4lekin filistī kamāṅḍar ġusse se bole, “use us shahar vāpas bhej deṅ jo āp ne us ke liye muqarrar kiyā hai! kahīṅ aisā na ho ki vah hamāre sāth nikal kar achānak ham par hī hamlā kar de. kyā apne mālik se sulah karāne kā koī behatar tarīqā hai ki vah apne mālik ko hamāre kaṭe hue sar pesh kare? 5kyā yah vahī dāūd nahīṅ jis ke bāre meṅ isrāīlī nāchte hue gāte the, ‘sāūl ne hazār halāk kie jabki dāūd ne das hazār’?”
6chunāṅche akīs ne dāūd ko bulā kar kahā, “rabb kī hayāt kī qasam, āp diyānatdār haiṅ, aur merī ḵẖwāhish thī ki āp isrāīl se laṛne ke liye mere sāth nikleṅ, kyūṅki jab se āp merī ḵẖidmat karne lage haiṅ maiṅ ne āp meṅ aib nahīṅ dekhā. lekin afsos, āp sardāroṅ ko pasand nahīṅ haiṅ. 7is liye meharbānī karke salāmatī se lauṭ jāeṅ aur kuchh na kareṅ jo unheṅ burā lage.”
8dāūd ne pūchhā, “mujh se kyā ġaltī huī hai? kyā āp ne us din se mujh meṅ nuqs pāyā hai jab se maiṅ āp kī ḵẖidmat karne lagā hūṅ? maiṅ apne mālik aur bādshāh ke dushmanoṅ se laṛne ke liye kyūṅ nahīṅ nikal saktā?”
9akīs ne javāb diyā, “mere nazdīk to āp allāh ke farishte jaise acchhe haiṅ. lekin filistī kamāṅḍar is bāt par bazid haiṅ ki āp isrāīl se laṛne ke liye hamāre sāth na nikleṅ. 10chunāṅche kal subah-savere uṭh kar apne ādmiyoṅ ke sāth ravānā ho jānā. jab din chaṛhe to der na karnā balki jaldī se apne ghar chale jānā.”
11dāūd aur us ke ādmiyoṅ ne aisā hī kiyā. agle din vah subah-savere uṭh kar filistī mulk meṅ vāpas chale gae jabki filistī yazrael ke liye ravānā hue.