2 Tavārīḵẖ 1
sulemān rabb se hikmat māṅgtā hai
1sulemān bin dāūd kī hukūmat mazbūt ho gaī. rabb us kā ḵẖudā us ke sāth thā, aur vah us kī tāqat baṛhātā rahā.
2ek din sulemān ne tamām isrāīl ko apne pās bulāyā. un meṅ hazār hazār aur sau sau faujiyoṅ par muqarrar afsar, qāzī, tamām buzurg aur kuṁboṅ ke sarparast shāmil the. 3phir sulemān un ke sāth jibaūn kī us pahāṛī par gayā jahāṅ allāh kā mulāqāt kā ḵẖaimā thā, vahī jo rabb ke ḵẖādim mūsā ne registān meṅ banvāyā thā. 4ahd kā sandūq us meṅ nahīṅ thā, kyūṅki dāūd ne use qiryat-yārīm se yarūshalam lā kar ek ḵẖaime meṅ rakh diyā thā jo us ne vahāṅ us ke liye tayyār kar rakhā thā. 5lekin pītal kī jo qurbāngāh bazalīel bin ūrī bin hūr ne banāī thī vah ab tak jibaūn meṅ rabb ke ḵẖaime ke sāmne thī. ab sulemān aur isrāīl us ke sāmne jamā hue tāki rabb kī marzī darayāft kareṅ. 6vahāṅ rabb ke huzūr sulemān ne pītal kī us qurbāngāh par bhasm hone vālī 1,000 qurbāniyāṅ chaṛhāīṅ.
7usī rāt rabb sulemān par zāhir huā aur farmāyā, “terā dil kyā chāhatā hai? mujhe batā de to maiṅ terī ḵẖwāhish pūrī karūṅgā.” 8sulemān ne javāb diyā, “tū mere bāp dāūd par baṛī meharbānī kar chukā hai, aur ab tū ne us kī jagah mujhe taḵẖt par biṭhā diyā hai. 9tū ne mujhe ek aisī qaum par bādshāh banā diyā hai jo zamīn kī ḵẖāk kī tarah beshumār hai. chunāṅche ai rabb ḵẖudā, vah vādā pūrā kar jo tū ne mere bāp dāūd se kiyā hai. 10mujhe hikmat aur samajh atā farmā tāki maiṅ is qaum kī rāhanumāī kar sakūṅ. kyūṅki kaun terī is azīm qaum kā insāf kar saktā hai?”
11allāh ne sulemān se kahā, “maiṅ ḵẖush hūṅ ki tū dil se yahī kuchh chāhatā hai. tū ne na māl-o-daulat, na izzat, na apne dushmanoṅ kī halākat aur na umr kī darāzī balki hikmat aur samajh māṅgī hai tāki merī us qaum kā insāf kar sake jis par maiṅ ne tujhe bādshāh banā diyā hai. 12is liye maiṅ terī yah daraḵẖwāst pūrī karke tujhe hikmat aur samajh atā karūṅgā. sāth sāth maiṅ tujhe utnā māl-o-daulat aur utnī izzat dūṅgā jitnī na māzī meṅ kisī bādshāh ko hāsil thī, na mustaqbil meṅ kabhī kisī ko hāsil hogī.”
13is ke bād sulemān jibaūn kī us pahāṛī se utrā jis par mulāqāt kā ḵẖaimā thā aur yarūshalam vāpas chalā gayā jahāṅ vah isrāīl par hukūmat kartā thā.
sulemān kī daulat
14sulemān ke 1,400 rath aur 12,000 ghoṛe the. kuchh us ne rathoṅ ke liye maḵẖsūs kie gae shaharoṅ meṅ aur kuchh yarūshalam meṅ apne pās rakhe. 15bādshāh kī sargarmiyoṅ ke bāis chāṅdī patthar jaisī ām ho gaī aur deodār kī qīmtī lakṛī maġrib ke nishebī pahāṛī ilāqe kī anjīr-tūt kī sastī lakṛī jaisī ām ho gaī. 16bādshāh apne ghoṛe misr aur kūe yānī kilikiyā se dar’āmad kartā thā. us ke tājir in jagahoṅ par jā kar unheṅ ḵẖarīd lāte the. 17bādshāh ke rath misr se dar’āmad hote the. har rath kī qīmat chāṅdī ke 600 sikke aur har ghoṛe kī qīmat chāṅdī ke 150 sikke thī. sulemān ke tājir yah ghoṛe bar’āmad karte hue tamām hittī aur arāmī bādshāhoṅ tak bhī pahuṅchāte the.