2 Tavārīḵẖ 13
yahūdāh kā bādshāh abiyāh
1abiyāh isrāīl ke bādshāh yarubiām avval kī hukūmat ke 18veṅ sāl meṅ yahūdāh kā bādshāh banā. 2vah tīn sāl bādshāh rahā, aur us kā dār-ul-hakūmat yarūshalam thā. us kī māṅ mākā bint ūrīel jibiā kī rahane vālī thī.
ek din abiyāh aur yarubiām ke darmiyān jaṅg chhiṛ gaī. 34,00,000 tajaribākār faujiyoṅ ko jamā karke abiyāh yarubiām se laṛne ke liye niklā. yarubiām 8,00,000 tajaribākār faujiyoṅ ke sāth us ke muqābil saf’ārā huā. 4phir abiyāh ne ifrāīm ke pahāṛī ilāqe ke pahāṛ samraim par chaṛh kar buland āvāz se pukārā,
“yarubiām aur tamām isrāīliyo, merī bāt suneṅ! 5kyā āp ko nahīṅ mālūm ki rabb isrāīl ke ḵẖudā ne dāūd se namak kā abdī ahd bāṅdh kar use aur us kī aulād ko hameshā ke liye isrāīl kī saltanat atā kī hai? 6to bhī sulemān bin dāūd kā mulāzim yarubiām bin nabāt apne mālik ke ḵẖilāf uṭh kar bāġī ho gayā. 7us ke ird-gird kuchh badam’āsh jamā hue aur rahubiām bin sulemān kī muḵẖālafat karne lage. us vaqt vah javān aur nātajaribākār thā, is liye un kā sahīh muqāblā na kar sakā.
8aur ab āp vāqaī samajhte haiṅ ki ham rabb kī bādshāhī par fatah pā sakte haiṅ, usī bādshāhī par jo dāūd kī aulād ke hāth meṅ hai. āp samajhte haiṅ ki āp kī fauj bahut hī baṛī hai, aur ki sone ke bachhṛe āp ke sāth haiṅ, vahī but jo yarubiām ne āp kī pūjā ke liye tayyār kar rakhe haiṅ. 9lekin āp ne rabb ke imāmoṅ yānī hārūn kī aulād ko lāviyoṅ samet mulk se nikāl kar un kī jagah aise pujārī ḵẖidmat ke liye muqarrar kie jaise butparast qaumoṅ meṅ pāe jāte haiṅ. jo bhī chāhatā hai ki use maḵẖsūs karke imām banāyā jāe use sirf ek javān bail aur sāt meṅḍhe pesh karne kī zarūrat hai. yah in nām-nihād ḵẖudāoṅ kā pujārī banne ke liye kāfī hai.
10lekin jahāṅ tak hamārā tālluq hai rabb hī hamārā ḵẖudā hai. ham ne use tark nahīṅ kiyā. sirf hārūn kī aulād hī hamāre imām haiṅ. sirf yah aur lāvī rabb kī ḵẖidmat karte haiṅ. 11yahī subah-shām use bhasm hone vālī qurbāniyāṅ aur ḵẖushbūdār baḵẖūr pesh karte haiṅ. pāk mez par rabb ke liye maḵẖsūs roṭiyāṅ rakhnā aur sone ke shamādān ke charāġ jalānā in hī kī zimmādārī rahī hai. ġaraz, ham rabb apne ḵẖudā kī hidāyāt par amal karte haiṅ jabki āp ne use tark kar diyā hai. 12chunāṅche allāh hamāre sāth hai. vahī hamārā rāhanumā hai, aur us ke imām turam bajā kar āp se laṛne kā elān kareṅge. isrāīl ke mardo, ḵẖabardār! rabb apne bāpdādā ke ḵẖudā se mat laṛnā. yah jaṅg āp jīt hī nahīṅ sakte!”
13itne meṅ yarubiām ne chupke se kuchh dastoṅ ko yahūdāh kī fauj ke pīchhe bhej diyā tāki vahāṅ tāk meṅ baiṭh jāeṅ. yūṅ us kī fauj kā ek hissā yahūdāh kī fauj ke sāmne aur dūsrā hissā us ke pīchhe thā. 14achānak yahūdāh ke faujiyoṅ ko patā chalā ki dushman sāmne aur pīchhe se ham par hamlā kar rahā hai. chīḵẖte chillāte hue unhoṅ ne rabb se madad māṅgī. imāmoṅ ne apne turam bajāy 15aur yahūdāh ke mardoṅ ne jaṅg kā nārā lagāyā. jab un kī āvāzeṅ buland huīṅ to allāh ne yarubiām aur tamām isrāīliyoṅ ko shikast de kar abiyāh aur yahūdāh kī fauj ke sāmne se bhagā diyā. 16isrāīlī farār hue, lekin allāh ne unheṅ yahūdāh ke havāle kar diyā. 17abiyāh aur us ke log unheṅ baṛā nuqsān pahuṅchā sake. isrāīl ke 5,00,000 tajaribākār faujī maidān-e-jaṅg meṅ māre gae. 18us vaqt isrāīl kī baṛī beizzatī huī jabki yahūdāh ko taqviyat milī. kyūṅki vah rabb apne bāpdādā ke ḵẖudā par bharosā rakhte the.
19abiyāh ne yarubiām kā tāqqub karte karte us se tīn shahar gird-o-navāh kī ābādiyoṅ samet chhīn liye, bait-el, yasānā aur ifron. 20abiyāh ke jīte jī yarubiām dubārā taqviyat na pā sakā, aur thoṛī der ke bād rabb ne use mār diyā. 21us ke muqāble meṅ abiyāh kī tāqat baṛhtī gaī. us kī 14 bīviyoṅ ke 22 beṭe aur 16 beṭiyāṅ paidā huīṅ.
22bāqī jo kuchh abiyāh kī hukūmat ke daurān huā aur jo kuchh us ne kiyā aur kahā, vah iddū nabī kī kitāb meṅ bayān kiyā gayā hai.