2 Tavārīḵẖ 16

shām ke sāth āsā kā muāhadā

¹āsā kī hukūmat ke 36veṅ sāl meṅ isrāīl ke bādshāh bāshā ne yahūdāh par hamlā karke rāmā shahar kī qil’ābandī kī. maqsad yah thā ki na koī yahūdāh ke mulk meṅ dāḵẖil ho sake, na koī vahāṅ se nikal sake.

²javāb meṅ āsā ne shām ke bādshāh bin-hadad ke pās vafad bhejā jis kā dār-ul-hakūmat damishq thā. us ne rabb ke ghar aur shāhī mahal ke ḵẖazānoṅ kī sonā-chāṅdī vafad ke sapurd karke damishq ke bādshāh ko paiġām bhejā, ³“merā āp ke sāth ahd hai jis tarah mere bāp kā āp ke bāp ke sāth ahd thā. guzārish hai ki āp sone-chāṅdī kā yah tuhfā qabūl karke isrāīl ke bādshāh bāshā ke sāth apnā ahd mansūḵẖ kar deṅ tāki vah mere mulk se nikal jāe.”

⁴bin-hadad muttafiq huā. us ne apne faujī afsaroṅ ko isrāīl ke shaharoṅ par hamlā karne ke liye bhej diyā to unhoṅ ne aiyyūn, dān, abīl-māim aur naftālī ke un tamām shaharoṅ par qabzā kar liyā jin meṅ shāhī godām the. ⁵jab bāshā ko is kī ḵẖabar milī to us ne rāmā kī qil’ābandī karne se bāz ā kar apnī yah muhimm chhoṛ dī.

⁶phir āsā bādshāh ne yahūdāh ke tamām mardoṅ kī bhartī karke unheṅ rāmā bhej diyā tāki vah un tamām pattharoṅ aur shahatīroṅ ko uṭhā kar le jāeṅ jin se bāshā bādshāh rāmā kī qil’ābandī karnā chāhatā thā. is sāmān se āsā ne jibā aur misfāh shaharoṅ kī qil’ābandī kī.

āsā ke āḵẖirī sāl aur maut

⁷us vaqt hanānī ġaibbīn yahūdāh ke bādshāh āsā ko milne āyā. us ne kahā, “afsos ki āp ne rabb apne ḵẖudā par etimād na kiyā balki arām ke bādshāh par, kyūṅki is kā burā natījā niklā hai. rabb shām ke bādshāh kī fauj ko āp ke havāle karne ke liye tayyār thā, lekin ab yah mauqā jātā rahā hai. ⁸kyā āp bhūl gae haiṅ ki ethopiyā aur libiyā kī kitnī baṛī fauj āp se laṛne āī thī? un ke sāth kasrat ke rath aur ghuṛsavār bhī the. lekin us vaqt āp ne rabb par etimād kiyā, aur javāb meṅ us ne unheṅ āp ke havāle kar diyā. ⁹rabb to apnī nazar pūrī rū-e-zamīn par dauṛātā rahatā hai tāki un kī taqviyat kare jo pūrī vafādārī se us se lipṭe rahate haiṅ. āp kī ahamaqānā harkat kī vajah se āp ko ab se mutvātir jaṅgeṅ taṅg kartī raheṅgī.” ¹⁰yah sun kar āsā ġusse se lāl-pīlā ho gayā. āpe se bāhar ho kar us ne hukm diyā ki nabī ko giriftār karke us ke pāoṅ kāṭh meṅ ṭhoṅko. us vaqt se āsā apnī qaum ke kaī logoṅ par zulm karne lagā.

¹¹bāqī jo kuchh shurū se le kar āḵẖir tak āsā kī hukūmat ke daurān huā vah ‘shāhān-e-yahūdāh-o-isrāīl kī tārīḵẖ’ kī kitāb meṅ bayān kiyā gayā hai. ¹²hukūmat ke 39veṅ sāl meṅ us ke pāoṅ ko bīmārī lag gaī. go us kī burī hālat thī to bhī us ne rabb ko talāsh na kiyā balki sirf ḍākṭaroṅ ke pīchhe paṛ gayā. ¹³hukūmat ke 41veṅ sāl meṅ āsā mar kar apne bāpdādā se jā milā. ¹⁴us ne yarūshalam ke us hisse meṅ jo ‘dāūd kā shahar’ kahalātā hai apne liye chaṭān meṅ qabr tarāshī thī. ab use is meṅ dafan kiyā gayā. janāze ke vaqt logoṅ ne lāsh ko ek palaṅg par liṭāyā diyā jo balsān ke tel aur muḵẖtalif qism ke ḵẖushbūdār marhamoṅ se ḍhāṁpā gayā thā. phir us ke ehatirām meṅ lakṛī kā zabardast ḍher jalāyā gayā.