2 Tavārīḵẖ 19

¹lekin yahūdāh kā bādshāh yahūsafat sahīh-salāmat yarūshalam aur apne mahal meṅ pahuṅchā. ²us vaqt yāhū bin hanānī jo ġaibbīn thā use milne ke liye niklā aur bādshāh se kahā, “kyā yah ṭhīk hai ki āp sharīr kī madad kareṅ? āp kyūṅ un ko piyār karte haiṅ jo rabb se nafrat karte haiṅ? yah dekh kar rabb kā ġazab āp par nāzil huā hai. ³to bhī āp meṅ acchhī bāteṅ bhī pāī jātī haiṅ. āp ne yasīrat devī ke khamboṅ ko mulk se dūr karke allāh ke tālib hone kā pakkā irādā kar rakhā hai.”

yahūsafat qānūnī kār-ravāī kī islāh kartā hai

⁴is ke bād yahūsafat yarūshalam meṅ rahā. lekin ek din vah dubārā niklā. is bār us ne junūb meṅ bair-sabā se le kar shimāl meṅ ifrāīm ke pahāṛī ilāqe tak pūre yahūdāh kā daurā kiyā. har jagah vah logoṅ ko rabb un ke bāpdādā ke ḵẖudā ke pās vāpas lāyā. ⁵us ne yahūdāh ke tamām qil’āband shaharoṅ meṅ qāzī bhī muqarrar kie. ⁶unheṅ samjhāte hue us ne kahā, “apnī ravish par dhyān deṅ! yād rahe ki āp insān ke javābdih nahīṅ haiṅ balki rabb ke. vahī āp ke sāth hogā jab āp faisle kareṅge. ⁷chunāṅche allāh kā ḵẖauf mān kar ehatiyāt se logoṅ kā insāf kareṅ. kyūṅki jahāṅ rabb hamārā ḵẖudā hai vahāṅ beinsāfī, jānibdārī aur rishvatakhorī ho hī nahīṅ saktī.”

⁸yarūshalam meṅ yahūsafat ne kuchh lāviyoṅ, imāmoṅ aur ḵẖāndānī sarparastoṅ ko insāf karne kī zimmādārī dī. rabb kī sharīat se mutālliq kisī muāmale yā yarūshalam ke bāshindoṅ ke darmiyān jhagṛe kī sūrat meṅ unheṅ faislā karnā thā. ⁹yahūsafat ne unheṅ samjhāte hue kahā, “rabb kā ḵẖauf mān kar apnī ḵẖidmat ko vafādārī aur pūre dil se sar’anjām deṅ. ¹⁰āp ke bhāī shaharoṅ se ā kar āp ke sāmne apne jhagṛe pesh kareṅge tāki āp un kā faislā kareṅ. āp ko qatl ke muqaddamoṅ kā faislā karnā paṛegā. aise muāmalāt bhī hoṅge jo rabb kī sharīat, kisī hukm, hidāyat yā usūl se tālluq rakheṅge. jo bhī ho, lāzim hai ki āp unheṅ samjhāeṅ tāki vah rabb kā gunāh na kareṅ. varnā us kā ġazab āp aur āp ke bhāiyoṅ par nāzil hogā. agar āp yah kareṅ to āp bequsūr raheṅge. ¹¹imām-e-āzam amariyāh rabb kī sharīat se tālluq rakhne vāle muāmalāt kā hatmī faislā karegā. jo muqaddme bādshāh se tālluq rakhte haiṅ un kā hatmī faislā yahūdāh ke qabīle kā sarbarāh zabadiyāh bin ismāīl karegā. adālat kā intizām chalāne meṅ lāvī āp kī madad kareṅge. ab hauslā rakh kar apnī ḵẖidmat sar’anjām deṅ. jo bhī sahīh kām karegā us ke sāth rabb hogā.”