2 Tavārīḵẖ 2

rabb ke ghar kī tāmīr kī tayyāriyāṅ

¹phir sulemān ne rabb ke liye ghar aur apne liye shāhī mahal banāne kā hukm diyā. ²is ke liye us ne 1,50,000 ādmiyoṅ kī bhartī kī. 80,000 ko us ne pahāṛī kānoṅ meṅ lagāyā tāki vah patthar nikāleṅ jabki 70,000 afrād kī zimmādārī yah patthar yarūshalam lānā thī. in sab par sulemān ne 3,600 nigrān muqarrar kie. ³us ne sūr ke bādshāh hīrām ko ittilā dī, “jis tarah āp mere bāp dāūd ko deodār kī lakṛī bhejte rahe jab vah apne liye mahal banā rahe the usī tarah mujhe bhī deodār kī lakṛī bhejeṅ. ⁴maiṅ ek ghar tāmīr karke use rabb apne ḵẖudā ke nām ke liye maḵẖsūs karnā chāhatā hūṅ. kyūṅki hameṅ aisī jagah kī zarūrat hai jis meṅ us ke huzūr ḵẖushbūdār baḵẖūr jalāyā jāe, rabb ke liye maḵẖsūs roṭiyāṅ bāqāidagī se mez par rakhī jāeṅ aur ḵẖās mauqoṅ par bhasm hone vālī qurbāniyāṅ pesh kī jāeṅ yānī har subah-o-shām, sabat ke din, nae chāṅd kī īdoṅ aur rabb hamāre ḵẖudā kī dīgar muqarrarā īdoṅ par. yah isrāīl kā dāimī farz hai.

⁵jis ghar ko maiṅ banāne ko hūṅ vah nihāyat azīm hogā, kyūṅki hamārā ḵẖudā dīgar tamām mābūdoṅ se kahīṅ azīm hai. ⁶lekin kaun us ke liye aisā ghar banā saktā hai jo us ke lāiq ho? bulandtarīn āsmān bhī us kī rihāish ke liye chhoṭā hai. to phir merī kyā haisiyat hai ki us ke liye ghar banāūṅ? maiṅ sirf aisī jagah banā saktā hūṅ jis meṅ us ke liye qurbāniyāṅ chaṛhāī jā sakeṅ.

⁷chunāṅche mere pās kisī aise samajhdār kārīgar ko bhej deṅ jo mahārat se sone-chāṅdī, pītal aur lohe kā kām jāntā ho. vah nīle, arġvānī aur qirmizī raṅg kā kapṛā banāne aur kandākārī kā ustād bhī ho. aisā shaḵẖs yarūshalam aur yahūdāh meṅ mere un kārīgaroṅ kā iṅchārj bane jinheṅ mere bāp dāūd ne kām par lagāyā hai. ⁸is ke ilāvā mujhe lubnān se deodār, jūnīpar aur dīgar qīmtī daraḵẖtoṅ kī lakṛī bhej deṅ. kyūṅki maiṅ jāntā hūṅ ki āp ke log umdā qism ke lakaṛahāre haiṅ. mere ādmī āp ke logoṅ ke sāth mil kar kām kareṅge. ⁹hameṅ bahut sī lakṛī kī zarūrat hogī, kyūṅki jo ghar maiṅ banānā chāhatā hūṅ vah baṛā aur shāndār hogā. ¹⁰āp ke lakkaṛahāroṅ ke kām ke muāvaze meṅ maiṅ 32,75,000 kilogrām gandum, 27,00,000 kilogrām jau, 4,40,000 liṭar mai aur 4,40,000 liṭar zaitūn kā tel dūṅgā.”

¹¹sūr ke bādshāh hīrām ne ḵẖat likh kar sulemān ko javāb diyā, “rabb apnī qaum ko piyār kartā hai, is liye us ne āp ko us kā bādshāh banāyā hai. ¹²rabb isrāīl ke ḵẖudā kī hamd ho jis ne āsmān-o-zamīn ko ḵẖalaq kiyā hai ki us ne dāūd bādshāh ko itnā dānishmand beṭā atā kiyā hai. us kī tamjīd ho ki yah aqalmand aur samajhdār beṭā rabb ke liye ghar aur apne liye mahal tāmīr karegā. ¹³maiṅ āp ke pās ek māhir aur samajhdār kārīgar ko bhej detā hūṅ jis kā nām hīrām-abī hai. ¹⁴us kī isrāīlī māṅ, dān ke qabīle kī hai jabki us kā bāp sūr kā hai. hīrām sone-chāṅdī, pītal, lohe, patthar aur lakṛī kī chīzeṅ banāne meṅ mahārat rakhtā hai. vah nīle, arġvānī aur qirmizī raṅg kā kapṛā aur katān kā bārīk kapṛā banā saktā hai. vah har qism kī kandākārī meṅ bhī māhir hai. jo bhī mansūbā use pesh kiyā jāe use vah pāyā-e-takmīl tak pahuṅchā saktā hai. yah ādmī āp ke aur āp ke muazzaz bāp dāūd ke kārīgaroṅ ke sāth mil kar kām karegā. ¹⁵chunāṅche jis gandum, jau, zaitūn ke tel aur mai kā zikr mere āqā ne kiyā vah apne ḵẖādimoṅ ko bhej deṅ. ¹⁶muāvaze meṅ ham āp ke liye darkār daraḵẖtoṅ ko lubnān meṅ kaṭavāeṅge aur un ke beṛe bāṅdh kar samundar ke zarīe yāfā shahar tak pahuṅchā deṅge. vahāṅ se āp unheṅ yarūshalam le jā sakeṅge.”

¹⁷sulemān ne isrāīl meṅ ābād tamām ġairmulkiyoṅ kī mardumashumārī karvāī. (us ke bāp dāūd ne bhī un kī mardumashumārī karvāī thī.) mālūm huā ki isrāīl meṅ 1,53,600 ġairmulkī rahate haiṅ. ¹⁸in meṅ se us ne 80,000 ko pahāṛī kānoṅ meṅ lagāyā tāki vah patthar nikāleṅ jabki 70,000 afrād kī zimmādārī yah patthar yarūshalam lānā thī. in sab par sulemān ne 3,600 nigrān muqarrar kie.