2 Tavārīḵẖ 20

ammoniyoṅ kā yahūdāh par hamlā

¹kuchh der ke bād moābī, ammonī aur kuchh maūnī yahūsafat se jaṅg karne ke liye nikle. ²ek qāsid ne ā kar bādshāh ko ittilā dī, “mulk-e-adom se ek baṛī fauj āp se laṛne ke liye ā rahī hai. vah bahīrā-e-murdār ke dūsre kināre se baṛhtī baṛhtī is vaqt hassūn-tamar pahuṅch chukī hai” (hassūn ain-jadī kā dūsrā nām hai).

³yah sun kar yahūsafat ghabrā gayā. us ne rabb se rāhanumāī māṅgne kā faislā karke elān kiyā ki tamām yahūdāh rozā rakhe. ⁴yahūdāh ke tamām shaharoṅ se log yarūshalam āe tāki mil kar madad ke liye rabb se duā māṅgeṅ. ⁵vah rabb ke ghar ke nae sahan meṅ jamā hue aur yahūsafat ne sāmne ā kar ⁶duā kī,

“ai rabb, hamāre bāpdādā ke ḵẖudā! tū hī āsmān par taḵẖtnashīn ḵẖudā hai, aur tū hī duniyā ke tamām mamālik par hukūmat kartā hai. tere hāth meṅ qudrat aur tāqat hai. koī bhī terā muqāblā nahīṅ kar saktā. ⁷ai hamāre ḵẖudā, tū ne is mulk ke purāne bāshindoṅ ko apnī qaum isrāīl ke āge se nikāl diyā. ibrāhīm terā dost thā, aur us kī aulād ko tū ne yah mulk hameshā ke liye de diyā. ⁸is meṅ terī qaum ābād huī. tere nām kī tāzīm meṅ maqdis banā kar unhoṅ ne kahā, ⁹‘jab bhī āfat ham par āe to ham yahāṅ tere huzūr ā sakeṅge, chāhe jaṅg, vabā, kāl yā koī aur sazā ho. agar ham us vaqt is ghar ke sāmne khaṛe ho kar madad ke liye tujhe pukāreṅ to tū hamārī sun kar hameṅ bachāegā, kyūṅki is imārat par tere hī nām kā ṭhappā lagā hai.’

¹⁰ab ammon, moāb aur pahāṛī mulk saīr kī harkatoṅ ko dekh! jab isrāīl misr se niklā to tū ne use in qaumoṅ par hamlā karne aur in ke ilāqe meṅ se guzarne kī ijāzat na dī. isrāīl ko mutbādil rāstā iḵẖtiyār karnā paṛā, kyūṅki use inheṅ halāk karne kī ijāzat na milī. ¹¹ab dhyān de ki yah badle meṅ kyā kar rahe haiṅ. yah hameṅ us maurūsī zamīn se nikālnā chāhate haiṅ jo tū ne hameṅ dī thī. ¹²ai hamāre ḵẖudā, kyā tū un kī adālat nahīṅ karegā? ham to is baṛī fauj ke muqāble meṅ bebas haiṅ. is ke hamle se bachne kā rāstā hameṅ nazar nahīṅ ātā, lekin hamārī āṅkheṅ madad ke liye tujh par lagī haiṅ.”

¹³yahūdāh ke tamām mard, aurteṅ aur bacche vahāṅ rabb ke huzūr khaṛe rahe. ¹⁴tab rabb kā rūh ek lāvī banām yahazīel par nāzil huā jab vah jamāat ke darmiyān khaṛā thā. yah ādmī āsaf ke ḵẖāndān kā thā, aur us kā pūrā nām yahazīel bin zakariyāh bin bināyāh bin yaīel bin mattaniyāh thā. ¹⁵us ne kahā, “yahūdāh aur yarūshalam ke logo, merī bāt suneṅ! ai bādshāh, āp bhī is par dhyān deṅ. rabb farmātā hai ki ḍaro mat, aur is baṛī fauj ko dekh kar mat ghabrānā. kyūṅki yah jaṅg tumhārā nahīṅ balki merā muāmalā hai. ¹⁶kal un ke muqāble ke liye niklo. us vaqt vah darrā-e-sīs se ho kar tumhārī taraf baṛh rahe hoṅge. tumhārā un se muqāblā us vādī ke sire par hogā jahāṅ yarūel kā registān shurū hotā hai. ¹⁷lekin tumheṅ laṛne kī zarūrat nahīṅ hogī. bas dushman ke āmne-sāmne khaṛe ho kar ruk jāo aur dekho ki rabb kis tarah tumheṅ chhuṭkārā degā. lihāzā mat ḍaro, ai yahūdāh aur yarūshalam, aur dahshat mat khāo. kal un kā sāmnā karne ke liye niklo, kyūṅki rabb tumhāre sāth hogā.”

¹⁸yah sun kar yahūsafat muṅh ke bal jhuk gayā. yahūdāh aur yarūshalam ke tamām logoṅ ne bhī auṅdhe muṅh jhuk kar rabb kī parastish kī. ¹⁹phir qihāt aur qorah ke ḵẖāndānoṅ ke kuchh lāvī khaṛe ho kar buland āvāz se rabb isrāīl ke ḵẖudā kī hamd-o-sanā karne lage.

ammoniyoṅ par fatah

²⁰agle din subah-savere yahūdāh kī fauj taqūa ke registān ke liye ravānā huī. nikalte vaqt yahūsafat ne un ke sāmne khaṛe ho kar kahā, “yahūdāh aur yarūshalam ke mardo, merī bāt suneṅ! rabb apne ḵẖudā par bharosā rakheṅ to āp qāim raheṅge. us ke nabiyoṅ kī bātoṅ kā yaqīn kareṅ to āp ko kāmyābī hāsil hogī.” ²¹logoṅ se mashvrā karke yahūsafat ne kuchh mardoṅ ko rabb kī tāzīm meṅ gīt gāne ke liye muqarrar kiyā. muqaddas libās pahane hue vah fauj ke āge āge chal kar hamd-o-sanā kā yah gīt gāte rahe, “rabb kī sitāish karo, kyūṅki us kī shafqat abdī hai.”

²²us vaqt rabb hamlāāvar fauj ke muḵẖālifoṅ ko khaṛā kar chukā thā. ab jab yahūdāh ke mard hamd ke gīt gāne lage to vah tāk meṅ se nikal kar baṛhtī huī fauj par ṭūṭ paṛe aur use shikast dī. ²³phir ammoniyoṅ aur moābiyoṅ ne mil kar pahāṛī mulk saīr ke mardoṅ par hamlā kiyā tāki unheṅ mukammal taur par ḵẖatm kar deṅ. jab yah halāk hue to ammonī aur moābī ek dūsre ko maut ke ghāṭ utārne lage. ²⁴yahūdāh ke faujiyoṅ ko is kā ilm nahīṅ thā. chalte chalte vah us maqām tak pahuṅch gae jahāṅ se registān nazar ātā hai. vahāṅ vah dushman ko talāsh karne lage, lekin lāsheṅ hī lāsheṅ zamīn par bikhrī nazar āīṅ. ek bhī dushman nahīṅ bachā thā. ²⁵yahūsafat aur us ke logoṅ ke liye sirf dushman ko lūṭne kā kām bāqī rah gayā thā. kasrat ke jānvar, qism qism kā sāmān, kapṛe aur kaī qīmtī chīzeṅ thīṅ. itnā sāmān thā ki vah use ek vaqt meṅ uṭhā kar apne sāth le jā nahīṅ sakte the. sārā māl jamā karne meṅ tīn din lage.

²⁶chauthe din vah qarīb kī ek vādī meṅ jamā hue tāki rabb kī tārīf kareṅ. us vaqt se vādī kā nām ‘tārīf kī vādī’ paṛ gayā. ²⁷is ke bād yahūdāh aur yarūshalam ke tamām mard yahūsafat kī rāhanumāī meṅ ḵẖushī manāte hue yarūshalam vāpas āe. kyūṅki rabb ne unheṅ dushman kī shikast se ḵẖushī kā sunaharā mauqā atā kiyā thā. ²⁸sitār, sarod aur turam bajāte hue vah yarūshalam meṅ dāḵẖil hue aur rabb ke ghar ke pās jā pahuṅche. ²⁹jab ird-gird ke mamālik ne sunā ki kis tarah rabb isrāīl ke dushmanoṅ se laṛā hai to un meṅ allāh kī dahshat phail gaī. ³⁰us vaqt se yahūsafat sukūn se hukūmat kar sakā, kyūṅki allāh ne use chāroṅ taraf ke mamālik ke hamloṅ se mahfūz rakhā thā.

yahūsafat ke āḵẖirī sāl aur maut

³¹yahūsafat 35 sāl kī umr meṅ bādshāh banā, aur vah yarūshalam meṅ rah kar 25 sāl hukūmat kartā rahā. us kī māṅ azūbā bint silhī thī. ³²vah apne bāp āsā ke namūne par chaltā aur vah kuchh kartā rahā jo rabb ko pasand thā. ³³lekin us ne bhī ūṅche maqāmoṅ ke mandiroṅ ko ḵẖatm na kiyā, aur logoṅ ke dil apne bāpdādā ke ḵẖudā kī taraf māil na hue.

³⁴bāqī jo kuchh yahūsafat kī hukūmat ke daurān huā vah shurū se le kar āḵẖir tak yāhū bin hanānī kī tārīḵẖ meṅ bayān kiyā gayā hai. bād meṅ sab kuchh ‘shāhān-e-isrāīl kī tārīḵẖ’ kī kitāb meṅ darj kiyā gayā.

³⁵bād meṅ yahūdāh ke bādshāh yahūsafat ne isrāīl ke bādshāh aḵẖaziyāh se ittihād kiyā, go us kā ravayyā bedīnī kā thā. ³⁶donoṅ ne mil kar tijārtī jahāzoṅ kā aisā beṛā banvāyā jo tarsīs tak pahuṅch sake. jab yah jahāz bandargāh asyūn-jābar meṅ tayyār hue ³⁷to maresā kā rahane vālā ilīazar bin dūdāvāhū ne yahūsafat ke ḵẖilāf peshgoī kī, “chūṅki āp aḵẖaziyāh ke sāth muttahid ho gae haiṅ is liye rabb āp kā kām tabāh kar degā!” aur vāqaī, yah jahāz kabhī apnī manzil-e-maqsūd tarsīs tak pahuṅch na sake, kyūṅki vah pahale hī ṭukṛe ṭukṛe ho gae.