2 Tavārīḵẖ 27

yahūdāh kā bādshāh yūtām

¹yūtām 25 sāl kī umr meṅ bādshāh banā aur yarūshalam meṅ rah kar 16 sāl tak hukūmat kartā rahā. us kī māṅ yarūsā bint sadoq thī. ²yūtām ne vah kuchh kiyā jo rabb ko pasand thā. vah apne bāp uzziyāh ke namūne par chaltā rahā, agarchi us ne kabhī bhī bāp kī tarah rabb ke ghar meṅ ghus jāne kī koshish na kī. lekin ām log apnī ġalat rāhoṅ se na haṭe.

³yūtām ne rabb ke ghar kā bālāī darvāzā tāmīr kiyā. ofal pahāṛī jis par rabb kā ghar thā us kī dīvār ko us ne bahut jagahoṅ par mazbūt banā diyā. ⁴yahūdāh ke pahāṛī ilāqe meṅ us ne shahar tāmīr kie aur jaṅglī ilāqoṅ meṅ qilae aur burj banāe. ⁵jab ammonī bādshāh ke sāth jaṅg chhiṛ gaī to us ne ammoniyoṅ ko shikast dī. tīn sāl tak unheṅ use sālānā ḵẖarāj ke taur par taqrīban 3,400 kilogrām chāṅdī, 16,00,000 kilogrām gandum aur 13,50,000 kilogrām jau adā karnā paṛā. ⁶yūṅ yūtām kī tāqat baṛhtī gaī. aur vajah yah thī ki vah sābitqadmī se rabb apne ḵẖudā ke huzūr chaltā rahā.

⁷bāqī jo kuchh yūtām kī hukūmat ke daurān huā vah ‘shāhān-e-isrāīl-o-yahūdāh’ kī kitāb meṅ qalamband hai. us meṅ us kī tamām jaṅgoṅ aur bāqī kāmoṅ kā zikr hai. ⁸vah 25 sāl kī umr meṅ bādshāh banā aur yarūshalam meṅ rah kar 16 sāl hukūmat kartā rahā. ⁹jab vah mar kar apne bāpdādā se jā milā to use yarūshalam ke us hisse meṅ jo ‘dāūd kā shahar’ kahalātā hai dafnāyā gayā. phir us kā beṭā āḵẖaz taḵẖtnashīn huā.