2 Tavārīḵẖ 28

yahūdāh kā bādshāh āḵẖaz

¹āḵẖaz 20 sāl kī umr meṅ bādshāh banā aur yarūshalam meṅ rah kar 16 sāl hukūmat kartā rahā. vah apne bāp dāūd ke namūne par na chalā balki vah kuchh kartā rahā jo rabb ko nāpsand thā. ²kyūṅki us ne isrāīl ke bādshāhoṅ kā chāl-chalan apnāyā. bāl ke but ḍhalvā kar ³us ne na sirf vādī-e-bin-hinnūm meṅ butoṅ ko qurbāniyāṅ pesh kīṅ balki apne beṭoṅ ko bhī qurbānī ke taur par jalā diyā. yūṅ vah un qaumoṅ ke ghinaune rasm-o-rivāj adā karne lagā jinheṅ rabb ne isrāīliyoṅ ke āge mulk se nikāl diyā thā. ⁴āḵẖaz baḵẖūr jalā kar apnī qurbāniyāṅ ūṅche maqāmoṅ, pahāṛiyoṅ kī choṭiyoṅ aur har ghane daraḵẖt ke sāy meṅ chaṛhātā thā.

⁵isī liye rabb us ke ḵẖudā ne use shām ke bādshāh ke havāle kar diyā. shām kī fauj ne use shikast dī aur yahūdāh ke bahut se logoṅ ko qaidī banā kar damishq le gaī. āḵẖaz ko isrāīl ke bādshāh fiqah bin ramaliyāh ke havāle bhī kar diyā gayā jis ne use shadīd nuqsān pahuṅchāyā. ⁶ek hī din meṅ yahūdāh ke 1,20,000 tajaribākār faujī shahīd hue. yah sab kuchh is liye huā ki qaum ne rabb apne bāpdādā ke ḵẖudā ko tark kar diyā thā. ⁷us vaqt ifrāīm ke qabīle ke pahalavān zikrī ne āḵẖaz ke beṭe māsiyāh, mahal ke iṅchārj azrīqām aur bādshāh ke bād sab se ālā afsar ilqānā ko mār ḍālā. ⁸isrāīliyoṅ ne yahūdāh kī 2,00,000 aurteṅ aur bacche chhīn liye aur kasrat kā māl lūṭ kar sāmriyā le gae.

isrāīl qaidiyoṅ ko rihā kar detā hai

⁹sāmriyā meṅ rabb kā ek nabī banām odīd rahatā thā. jab isrāīlī faujī maidān-e-jaṅg se vāpas āe to odīd un se milne ke liye niklā. us ne un se kahā, “dekheṅ, rabb āp ke bāpdādā kā ḵẖudā yahūdāh se nārāz thā, is liye us ne unheṅ āp ke havāle kar diyā. lekin āp log taish meṅ ā kar un par yūṅ ṭūṭ paṛe ki un kā qatl-e-ām āsmān tak pahuṅch gayā hai. ¹⁰lekin yah kāfī nahīṅ thā. ab āp yahūdāh aur yarūshalam ke bache huoṅ ko apne ġulām banānā chāhate haiṅ. kyā āp samajhte haiṅ ki ham un se acchhe haiṅ? nahīṅ, āp se bhī rabb apne ḵẖudā ke ḵẖilāf gunāh sarzad hue haiṅ. ¹¹chunāṅche merī bāt suneṅ! in qaidiyoṅ ko vāpas kareṅ jo āp ne apne bhāiyoṅ se chhīn liye haiṅ. kyūṅki rabb kā saḵẖt ġazab āp par nāzil hone vālā hai.”

¹²ifrāīm ke qabīle ke kuchh sarparastoṅ ne bhī faujiyoṅ kā sāmnā kiyā. un ke nām azariyāh bin yūhanān, barakiyāh bin masillamot, yahizaqiyāh bin sallūm aur amāsā bin ḵẖadlī the. ¹³unhoṅ ne kahā, “in qaidiyoṅ ko yahāṅ mat le āeṅ, varnā ham rabb ke sāmne qusūrvār ṭhahareṅge. kyā āp chāhate haiṅ ki ham apne gunāhoṅ meṅ izāfā kareṅ? hamārā qusūr pahale hī bahut baṛā hai. hāṅ, rabb isrāīl par saḵẖt ġusse hai.”

¹⁴tab faujiyoṅ ne apne qaidiyoṅ ko āzād karke unheṅ lūṭe hue māl ke sāth buzurgoṅ aur pūrī jamāat ke havāle kar diyā. ¹⁵mazkūrā chār ādmiyoṅ ne sāmne ā kar qaidiyoṅ ko apne pās mahfūz rakhā. lūṭe hue māl meṅ se kapṛe nikāl kar unhoṅ ne unheṅ un meṅ taqsīm kiyā jo barahanā the. is ke bād unhoṅ ne tamām qaidiyoṅ ko kapṛe aur jūte de die, unheṅ khānā khilāyā, pānī pilāyā aur un ke zaḵẖmoṅ kī marham-paṭṭī kī. jitne thakāvaṭ kī vajah se chal na sakte the unheṅ unhoṅ ne gadhoṅ par biṭhāyā, phir chalte chalte sab ko khajūr ke shahar yarīhū tak pahuṅchāyā jahāṅ un ke apne log the. phir vah sāmriyā lauṭ āe.

āḵẖaz asūr ke bādshāh se madad letā hai

¹⁶us vaqt āḵẖaz bādshāh ne asūr ke bādshāh se iltimās kī, “hamārī madad karne āeṅ.” ¹⁷kyūṅki adomī yahūdāh meṅ ghus kar kuchh logoṅ ko giriftār karke apne sāth le gae the. ¹⁸sāth sāth filistī maġribī yahūdāh ke nishebī pahāṛī ilāqe aur junūbī ilāqe meṅ ghus āe the aur zail ke shaharoṅ par qabzā karke un meṅ rahane lage the : bait-shams, ayyālon, jadīrot, nīz sokā, timnat aur jimzū gird-o-navāh kī ābādiyoṅ samet. ¹⁹is tarah rabb ne yahūdāh ko āḵẖaz kī vajah se zer kar diyā, kyūṅki bādshāh ne yahūdāh meṅ belagām berāharavī phailne dī aur rabb se apnī bevafāī kā sāf izhār kiyā thā.

²⁰asūr ke bādshāh tiglat-pilesar apnī fauj le kar mulk meṅ āyā, lekin āḵẖaz kī madad karne ke bajāy us ne use taṅg kiyā. ²¹āḵẖaz ne rabb ke ghar, shāhī mahal aur apne ālā afsaroṅ ke ḵẖazānoṅ ko lūṭ kar sārā māl asūr ke bādshāh ko bhej diyā, lekin befāidā. is se use sahīh madad na milī.

²²go vah us vaqt baṛī musībat meṅ thā to bhī rabb se aur dūr ho gayā. ²³vah shām ke devtāoṅ ko qurbāniyāṅ pesh karne lagā, kyūṅki us kā ḵẖayāl thā ki in hī ne mujhe shikast dī hai. us ne sochā, “shām ke devtā apne bādshāhoṅ kī madad karte haiṅ! ab se maiṅ unheṅ qurbāniyāṅ pesh karūṅgā tāki vah merī bhī madad kareṅ.” lekin yah devtā bādshāh āḵẖaz aur pūrī qaum ke liye tabāhī kā bāis ban gae. ²⁴āḵẖaz ne hukm diyā ki allāh ke ghar kā sārā sāmān nikāl kar ṭukṛe ṭukṛe kar diyā jāe. phir us ne rabb ke ghar ke darvāzoṅ par tālā lagā diyā. us kī jagah us ne yarūshalam ke kone kone meṅ qurbāngāheṅ khaṛī kar dīṅ. ²⁵sāth sāth us ne dīgar mābūdoṅ ko qurbāniyāṅ pesh karne ke liye yahūdāh ke har shahar kī ūṅchī jagahoṅ par mandir tāmīr kie. aisī harkatoṅ se vah rabb apne bāpdādā ke ḵẖudā ko taish dilātā rahā.

²⁶bāqī jo kuchh us kī hukūmat ke daurān huā aur jo kuchh us ne kiyā vah shurū se le kar āḵẖir tak ‘shāhān-e-yahūdāh-o-isrāīl’ kī kitāb meṅ darj hai. ²⁷jab āḵẖaz mar kar apne bāpdādā se jā milā to use yarūshalam meṅ dafan kiyā gayā, lekin shāhī qabristān meṅ nahīṅ. phir us kā beṭā hizaqiyāh taḵẖtnashīn huā.