2 Tavārīḵẖ 29

hizaqiyāh bādshāh rabb ke ghar ko dubārā khol detā hai

¹jab hizaqiyāh bādshāh banā to us kī umr 25 sāl thī. yarūshalam meṅ rah kar vah 29 sāl hukūmat kartā rahā. us kī māṅ abiyāh bint zakariyāh thī.

²apne bāp dāūd kī tarah us ne aisā kām kiyā jo rabb ko pasand thā. ³apnī hukūmat ke pahale sāl ke pahale mahīne meṅ us ne rabb ke ghar ke darvāzoṅ ko khol kar un kī marammat karvāī. ⁴lāviyoṅ aur imāmoṅ ko bulā kar us ne unheṅ rabb ke ghar ke mashriqī sahan meṅ jamā kiyā ⁵aur kahā,

“ai lāviyo, merī bāt suneṅ! apne āp ko ḵẖidmat ke liye maḵẖsūs-o-muqaddas kareṅ, aur rabb apne bāpdādā ke ḵẖudā ke ghar ko bhī maḵẖsūs-o-muqaddas kareṅ. tamām nāpāk chīzeṅ maqdis se nikāleṅ! ⁶hamāre bāpdādā bevafā ho kar vah kuchh karte gae jo rabb hamāre ḵẖudā ko nāpsand thā. unhoṅ ne use chhoṛ diyā, apne muṅh ko rabb kī sukūnatgāh se pher kar dūsrī taraf chal paṛe. ⁷rabb ke ghar ke sāmne vāle barāmde ke darvāzoṅ par unhoṅ ne tālā lagā kar charāġoṅ ko bujhā diyā. na isrāīl ke ḵẖudā ke liye baḵẖūr jalāyā jātā, na bhasm hone vālī qurbāniyāṅ maqdis meṅ pesh kī jātī thīṅ. ⁸isī vajah se rabb kā ġazab yahūdāh aur yarūshalam par nāzil huā hai. hamārī hālat ko dekh kar log ghabrā gae, un ke roṅgṭe khaṛe ho gae haiṅ. ham dūsroṅ ke liye mazāq kā nishānā ban gae haiṅ. āp ḵẖud is ke gavāh haiṅ. ⁹hamārī bevafāī kī vajah se hamāre bāp talvār kī zad meṅ ā kar māre gae aur hamāre beṭe-beṭiyāṅ aur bīviyāṅ ham se chhīn lī gaī haiṅ. ¹⁰lekin ab maiṅ rabb isrāīl ke ḵẖudā ke sāth ahd bāṅdhnā chāhatā hūṅ tāki us kā saḵẖt qahar ham se ṭal jāe. ¹¹mere beṭo, ab sustī na dikhāeṅ, kyūṅki rabb ne āp ko chun kar apne ḵẖādim banāyā hai. āp ko us ke huzūr khaṛe ho kar us kī ḵẖidmat karne aur baḵẖūr jalāne kī zimmādārī dī gaī hai.”

¹²phir zail ke lāvī ḵẖidmat ke liye tayyār hue :

qihāt ke ḵẖāndān kā mahat bin amāsī aur yoel bin azariyāh,

mirārī ke ḵẖāndān kā qīs bin abdī aur azariyāh bin yahallal-el,

jairson ke ḵẖāndān kā yūāḵẖ bin zimmā aur adan bin yūāḵẖ,

¹³ilīsafan ke ḵẖāndān kā simrī aur yaīel,

āsaf ke ḵẖāndān kā zakariyāh aur mattaniyāh,

¹⁴haimān ke ḵẖāndān kā yahīel aur simaī,

yadūtūn ke ḵẖāndān kā samāyāh aur uzzīel.

¹⁵bāqī lāviyoṅ ko bulā kar unhoṅ ne apne āp ko rabb kī ḵẖidmat ke liye maḵẖsūs-o-muqaddas kiyā. phir vah bādshāh ke hukm ke mutābiq rabb ke ghar ko pāk-sāf karne lage. kām karte karte unhoṅ ne is kā ḵẖayāl kiyā ki sab kuchh rabb kī hidāyāt ke mutābiq ho rahā ho. ¹⁶imām rabb ke ghar meṅ dāḵẖil hue aur us meṅ se har nāpāk chīz nikāl kar use sahan meṅ lāe. vahāṅ se lāviyoṅ ne sab kuchh uṭhā kar shahar se bāhar vādī-e-qidron meṅ phaiṅk diyā. ¹⁷rabb ke ghar kī quddūsiyat bahāl karne kā kām pahale mahīne ke pahale din shurū huā, aur ek hafte ke bād vah sāmne vāle barāmde tak pahuṅch gae the. ek aur haftā pūre ghar ko maḵẖsūs-o-muqaddas karne meṅ sarf huā.

pahale mahīne ke 16veṅ din kām mukammal huā. ¹⁸hizaqiyāh bādshāh ke pās jā kar unhoṅ ne kahā, “ham ne rabb ke pūre ghar ko pāk-sāf kar diyā hai. is meṅ jānvaroṅ ko jalāne kī qurbāngāh us ke sāmān samet aur vah mez jis par rabb ke liye maḵẖsūs roṭiyāṅ rakhī jātī haiṅ us ke sāmān samet shāmil hai. ¹⁹aur jitnī chīzeṅ āḵẖaz ne bevafā ban kar apnī hukūmat ke daurān radd kar dī thīṅ un sab ko ham ne ṭhīk karke dubārā maḵẖsūs-o-muqaddas kar diyā hai. ab vah rabb kī qurbāngāh ke sāmne paṛī haiṅ.”

rabb ke ghar kī dubārā maḵẖsūsiyat

²⁰agle din hizaqiyāh bādshāh subah-savere shahar ke tamām buzurgoṅ ko bulā kar un ke sāth rabb ke ghar ke pās gayā. ²¹sāt javān bail, sāt meṅḍhe aur bheṛ ke sāt bacche bhasm hone vālī qurbānī ke liye sahan meṅ lāe gae, nīz sāt bakre jinheṅ gunāh kī qurbānī ke taur par shāhī ḵẖāndān, maqdis aur yahūdāh ke liye pesh karnā thā. hizaqiyāh ne hārūn kī aulād yānī imāmoṅ ko hukm diyā ki in jānvaroṅ ko rabb kī qurbāngāh par chaṛhāeṅ. ²²pahale bailoṅ ko zabah kiyā gayā. imāmoṅ ne un kā ḵẖūn jamā karke use qurbāngāh par chhiṛkā. is ke bād meṅḍhoṅ ko zabah kiyā gayā. is bār bhī imāmoṅ ne un kā ḵẖūn qurbāngāh par chhiṛkā. bheṛ ke bacchoṅ ke ḵẖūn ke sāth bhī yahī kuchh kiyā gayā. ²³āḵẖir meṅ gunāh kī qurbānī ke liye maḵẖsūs bakroṅ ko bādshāh aur jamāat ke sāmne lāyā gayā, aur unhoṅ ne apne hāthoṅ ko bakroṅ ke saroṅ par rakh diyā. ²⁴phir imāmoṅ ne unheṅ zabah karke un kā ḵẖūn gunāh kī qurbānī ke taur par qurbāngāh par chhiṛkā tāki isrāīl kā kaffārā diyā jāe. kyūṅki bādshāh ne hukm diyā thā ki bhasm hone vālī aur gunāh kī qurbānī tamām isrāīl ke liye pesh kī jāe.

²⁵hizaqiyāh ne lāviyoṅ ko jhāṅjh, sitār aur sarod thamā kar unheṅ rabb ke ghar meṅ khaṛā kiyā. sab kuchh un hidāyāt ke mutābiq huā jo rabb ne dāūd bādshāh, us ke ġaibbīn jād aur nātan nabī kī mārifat dī thīṅ. ²⁶lāvī un sāzoṅ ke sāth khaṛe ho gae jo dāūd ne banvāe the, aur imām apne turmoṅ ko thāme un ke sāth khaṛe hue. ²⁷phir hizaqiyāh ne hukm diyā ki bhasm hone vālī qurbānī qurbāngāh par pesh kī jāe. jab imām yah kām karne lage to lāvī rabb kī tārīf meṅ gīt gāne lage. sāth sāth turam aur dāūd bādshāh ke banvāe hue sāz bajne lage. ²⁸tamām jamāat auṅdhe muṅh jhuk gaī jabki lāvī gīt gāte aur imām turam bajāte rahe. yah silsilā is qurbānī kī takmīl tak jārī rahā. ²⁹is ke bād hizaqiyāh aur tamām hāzirīn dubārā muṅh ke bal jhuk gae. ³⁰bādshāh aur buzurgoṅ ne lāviyoṅ ko kahā, “dāūd aur āsaf ġaibbīn ke zabūr gā kar rabb kī sitāish kareṅ.” chunāṅche lāviyoṅ ne baṛī ḵẖushī se hamd-o-sanā ke gīt gāe . vah bhī auṅdhe muṅh jhuk gae.

³¹phir hizaqiyāh logoṅ se muḵẖātib huā, “āj āp ne apne āp ko rabb ke liye vaqf kar diyā hai. ab vah kuchh rabb ke ghar ke pās le āeṅ jo āp zabah aur salāmatī kī qurbānī ke taur par pesh karnā chāhate haiṅ.” tab log zabah aur salāmatī kī apnī qurbāniyāṅ le āe. nīz, jis kā bhī dil chāhatā thā vah bhasm hone vālī qurbāniyāṅ lāyā. ³²is tarah bhasm hone vālī qurbānī ke liye 70 bail, 100 meṅḍhe aur bheṛ ke 200 bacche jamā karke rabb ko pesh kie gae. ³³un ke ilāvā 600 bail aur 3,000 bheṛ-bakriyāṅ rabb ke ghar ke liye maḵẖsūs kī gaīṅ. ³⁴lekin itne jānvaroṅ kī khāloṅ ko utārne ke liye imām kam the, is liye lāviyoṅ ko un kī madad karnī paṛī. is kām ke iḵẖtitām tak balki jab tak mazīd imām ḵẖidmat ke liye tayyār aur pāk nahīṅ ho gae the lāvī madad karte rahe. imāmoṅ kī nisbat ziyādā lāvī pāk-sāf ho gae the, kyūṅki unhoṅ ne ziyādā lagan se apne āp ko rabb ke liye maḵẖsūs-o-muqaddas kiyā thā. ³⁵bhasm hone vālī beshumār qurbāniyoṅ ke ilāvā imāmoṅ ne salāmatī kī qurbāniyoṅ kī charbī bhī jalāī. sāth sāth unhoṅ ne mai kī nazreṅ pesh kīṅ.

yūṅ rabb ke ghar meṅ ḵẖidmat kā nae sire se āġāz huā. ³⁶hizaqiyāh aur pūrī qaum ne ḵẖushī manāī ki allāh ne yah sab kuchh itnī jaldī se hameṅ muhayyā kiyā hai.