2 Tavārīḵẖ 30

fasah kī īd ke liye dāvat

¹hizaqiyāh ne isrāīl aur yahūdāh kī har jagah apne qāsidoṅ ko bhej kar logoṅ ko rabb ke ghar meṅ āne kī dāvat dī, kyūṅki vah un ke sāth rabb isrāīl ke ḵẖudā kī tāzīm meṅ fasah kī īd manānā chāhatā thā. us ne ifrāīm aur manassī ke qabīloṅ ko bhī dāvatnāme bheje. ²bādshāh ne apne afsaroṅ aur yarūshalam kī pūrī jamāat ke sāth mil kar faislā kiyā ki ham yah īd dūsre mahīne meṅ manāeṅge. ³ām taur par yah pahale mahīne meṅ manāī jātī thī, lekin us vaqt tak ḵẖidmat ke liye tayyār imām kāfī nahīṅ the. kyūṅki ab tak sab apne āp ko pāk-sāf na kar sake. dūsrī bāt yah thī ki log itnī jaldī se yarūshalam meṅ jamā na ho sake. ⁴in bātoṅ ke pesh-e-nazar bādshāh aur tamām hāzirīn is par muttafiq hue ki fasah kī īd multavī kī jāe. ⁵unhoṅ ne faislā kiyā ki ham tamām isrāīliyoṅ ko junūb meṅ bair-sabā se le kar shimāl meṅ dān tak dāvat deṅge. sab yarūshalam āeṅ tāki ham mil kar rabb isrāīl ke ḵẖudā kī tāzīm meṅ fasah kī īd manāeṅ. asal meṅ yah īd baṛī der se hidāyāt ke mutābiq nahīṅ manāī gaī thī.

⁶bādshāh ke hukm par qāsid isrāīl aur yahūdāh meṅ se guzre. har jagah unhoṅ ne logoṅ ko bādshāh aur us ke afsaroṅ ke ḵẖat pahuṅchā die. ḵẖat meṅ likhā thā,

“ai isrāīliyo, rabb ibrāhīm, ishāq aur isrāīl ke ḵẖudā ke pās vāpas āeṅ! phir vah bhī āp ke pās jo asūrī bādshāhoṅ ke hāth se bach nikle haiṅ vāpas āegā. ⁷apne bāpdādā aur bhāiyoṅ kī tarah na baneṅ jo rabb apne bāpdādā ke ḵẖudā se bevafā ho gae the. yahī vajah hai ki us ne unheṅ aisī hālat meṅ chhoṛ diyā ki jis ne bhī unheṅ dekhā us ke roṅgṭe khaṛe ho gae. āp ḵẖud is ke gavāh haiṅ. ⁸un kī tarah aṛe na raheṅ balki rabb ke tābe ho jāeṅ. us ke maqdis meṅ āeṅ, jo us ne hameshā ke liye maḵẖsūs-o-muqaddas kar diyā hai. rabb apne ḵẖudā kī ḵẖidmat kareṅ tāki āp us ke saḵẖt ġazab kā nishānā na raheṅ. ⁹agar āp rabb ke pās lauṭ āeṅ to jinhoṅ ne āp ke bhāiyoṅ aur un ke bāl-bacchoṅ ko qaid kar liyā hai vah un par raham karke unheṅ is mulk meṅ vāpas āne deṅge. kyūṅki rabb āp kā ḵẖudā meharbān aur rahīm hai. agar āp us ke pās vāpas āeṅ to vah apnā muṅh āp se nahīṅ pheregā.”

¹⁰qāsid ifrāīm aur manassī ke pūre qabāilī ilāqe meṅ se guzre aur har shahar ko yah paiġām pahuṅchāyā. phir chalte chalte vah zabūlūn tak pahuṅch gae. lekin aksar log un kī bāt sun kar haṅs paṛe aur un kā mazāq uṛāne lage. ¹¹sirf āshar, manassī aur zabūlūn ke chand ek ādmī farotnī kā izhār karke mān gae aur yarūshalam āe. ¹²yahūdāh meṅ allāh ne logoṅ ko taharīk dī ki unhoṅ ne yakdilī se us hukm par amal kiyā jo bādshāh aur buzurgoṅ ne rabb ke farmān ke mutābiq diyā thā.

hizaqiyāh aur qaum fasah kī īd manāte haiṅ

¹³dūsre mahīne meṅ bahut ziyādā log beḵẖamīrī roṭī kī īd manāne ke liye yarūshalam pahuṅche. ¹⁴pahale unhoṅ ne shahar se butoṅ kī tamām qurbānagāhoṅ ko dūr kar diyā. baḵẖūr jalāne kī chhoṭī qurbānagāhoṅ ko bhī unhoṅ ne uṭhā kar vādī-e-qidron meṅ phaiṅk diyā. ¹⁵dūsre mahīne ke 14veṅ din fasah ke leloṅ ko zabah kiyā gayā. imāmoṅ aur lāviyoṅ ne sharmindā ho kar apne āp ko ḵẖidmat ke liye pāk-sāf kar rakhā thā, aur ab unhoṅ ne bhasm hone vālī qurbāniyoṅ ko rabb ke ghar meṅ pesh kiyā. ¹⁶vah ḵẖidmat ke liye yūṅ khaṛe ho gae jis tarah mard-e-ḵẖudā mūsā kī sharīat meṅ farmāyā gayā hai. lāvī qurbāniyoṅ kā ḵẖūn imāmoṅ ke pās lāe jinhoṅ ne use qurbāngāh par chhiṛkā.

¹⁷lekin hāzirīn meṅ se bahut se logoṅ ne apne āp ko sahīh taur par pāk-sāf nahīṅ kiyā thā. un ke liye lāviyoṅ ne fasah ke leloṅ ko zabah kiyā tāki un kī qurbāniyoṅ ko bhī rabb ke liye maḵẖsūs kiyā jā sake. ¹⁸ḵẖāskar ifrāīm, manassī, zabūlūn aur ishkār ke aksar logoṅ ne apne āp ko sahīh taur par pāk-sāf nahīṅ kiyā thā. chunāṅche vah fasah ke khāne meṅ us hālat meṅ sharīk na hue jis kā taqāzā sharīat kartī hai. lekin hizaqiyāh ne un kī shafāat karke duā kī, “rabb jo meharbān hai har ek ko muāf kare ¹⁹jo pūre dil se rabb apne bāpdādā ke ḵẖudā kā tālib rahane kā irādā rakhtā hai, ḵẖwāh use maqdis ke liye darkār pākīzgī hāsil na bhī ho.” ²⁰rabb ne hizaqiyāh kī duā sun kar logoṅ ko bahāl kar diyā.

²¹yarūshalam meṅ jamāshudā isrāīliyoṅ ne baṛī ḵẖushī se sāt din tak beḵẖamīrī roṭī kī īd manāī. har din lāvī aur imām apne sāz bajā kar buland āvāz se rabb kī sitāish karte rahe. ²²lāviyoṅ ne rabb kī ḵẖidmat karte vaqt baṛī samajhdārī dikhāī, aur hizaqiyāh ne is meṅ un kī hausalāafzāī kī.

pūre hafte ke daurān isrāīlī rabb ko salāmatī kī qurbāniyāṅ pesh karke qurbānī kā apnā hissā khāte aur rabb apne bāpdādā ke ḵẖudā kī tamjīd karte rahe.

²³is hafte ke bād pūrī jamāat ne faislā kiyā ki īd ko mazīd sāt din manāyā jāe. chunāṅche unhoṅ ne ḵẖushī se ek aur hafte ke daurān īd manāī. ²⁴tab yahūdāh ke bādshāh hizaqiyāh ne jamāat ke liye 1,000 bail aur 7,000 bheṛ-bakriyāṅ pesh kīṅ jabki buzurgoṅ ne jamāat ke liye 1,000 bail aur 10,000 bheṛ-bakriyāṅ chaṛhāīṅ. itne meṅ mazīd bahut se imāmoṅ ne apne āp ko rabb kī ḵẖidmat ke liye maḵẖsūs-o-muqaddas kar liyā thā.

²⁵jitne bhī āe the ḵẖushī manā rahe the, ḵẖwāh vah yahūdāh ke bāshinde the, ḵẖwāh imām, lāvī, isrāīlī yā isrāīl aur yahūdāh meṅ rahane vāle pardesī mehamān. ²⁶yarūshalam meṅ baṛī shādmānī thī, kyūṅki aisī īd dāūd bādshāh ke beṭe sulemān ke zamāne se le kar us vaqt tak yarūshalam meṅ manāī nahīṅ gaī thī.

²⁷īd ke iḵẖtitām par imāmoṅ aur lāviyoṅ ne khaṛe ho kar qaum ko barkat dī. aur allāh ne un kī sunī, un kī duā āsmān par us kī muqaddas sukūnatgāh tak pahuṅchī.