2 Tavārīḵẖ 31

pūre yahūdāh meṅ butparastī kā ḵẖātmā

¹īd ke bād jamāat ke tamām isrāīliyoṅ ne yahūdāh ke shaharoṅ meṅ jā kar patthar ke butoṅ ko ṭukṛe ṭukṛe kar diyā, yasīrat devī ke khamboṅ ko kāṭ ḍālā, ūṅchī jagahoṅ ke mandiroṅ ko ḍhā diyā aur ġalat qurbānagāhoṅ ko ḵẖatm kar diyā. jab tak unhoṅ ne yah kām yahūdāh, binyamīn, ifrāīm aur manassī ke pūre ilāqoṅ meṅ takmīl tak nahīṅ pahuṅchāyā thā unhoṅ ne ārām na kiyā. is ke bād vah sab apne apne shaharoṅ aur gharoṅ ko chale gae.

rabb ke ghar meṅ intizām kī islāh

²hizaqiyāh ne imāmoṅ aur lāviyoṅ ko dubārā ḵẖidmat ke vaise hī gurohoṅ meṅ taqsīm kiyā jaise pahale the. un kī zimmādāriyāṅ bhasm hone vālī aur salāmatī kī qurbāniyāṅ chaṛhānā, rabb ke ghar meṅ muḵẖtalif qism kī ḵẖidmāt anjām denā aur hamd-o-sanā ke gīt gānā thīṅ.

³jo jānvar bādshāh apnī milkiyat se rabb ke ghar ko detā rahā vah bhasm hone vālī un qurbāniyoṅ ke liye muqarrar the jin ko rabb kī sharīat ke mutābiq har subah-shām, sabat ke din, nae chāṅd kī īd aur dīgar īdoṅ par rabb ke ghar meṅ pesh kī jātī thīṅ.

⁴hizaqiyāh ne yarūshalam ke bāshindoṅ ko hukm diyā ki apnī milkiyat meṅ se imāmoṅ aur lāviyoṅ ko kuchh deṅ tāki vah apnā vaqt rabb kī sharīat kī takmīl ke liye vaqf kar sakeṅ. ⁵bādshāh kā yah elān sunte hī isrāīlī farāḵẖdilī se ġallā, aṅgūr ke ras, zaitūn ke tel, shahad aur khetoṅ kī bāqī paidāvār kā pahalā phal rabb ke ghar meṅ lāe. bahut kuchh ikaṭṭhā huā, kyūṅki logoṅ ne apnī paidāvār kā pūrā dasvāṅ hissā vahāṅ pahuṅchāyā. ⁶yahūdāh ke bāqī shaharoṅ ke bāshinde bhī sāth rahane vāle isrāīliyoṅ samet apnī paidāvār kā dasvāṅ hissā rabb ke ghar meṅ lāe. jo bhī bail, bheṛ-bakriyāṅ aur bāqī chīzeṅ unhoṅ ne rabb apne ḵẖudā ke liye vaqf kī thīṅ vah rabb ke ghar meṅ pahuṅchīṅ jahāṅ logoṅ ne unheṅ baṛe ḍher lagā kar ikaṭṭhā kiyā. ⁷chīzeṅ jamā karne kā yah silsilā tīsre mahīne meṅ shurū huā aur sātveṅ mahīne meṅ iḵẖtitām ko pahuṅchā. ⁸jab hizaqiyāh aur us ke afsaroṅ ne ā kar dekhā ki kitnī chīzeṅ ikaṭṭhī ho gaī haiṅ to unhoṅ ne rabb aur us kī qaum isrāīl ko mubārak kahā.

⁹jab hizaqiyāh ne imāmoṅ aur lāviyoṅ se in ḍheroṅ ke bāre meṅ pūchhā ¹⁰to sadoq ke ḵẖāndān kā imām-e-āzam azariyāh ne javāb diyā, “jab se log apne hadie yahāṅ le āte haiṅ us vaqt se ham jī bhar kar khā sakte haiṅ balki kāfī kuchh bach bhī jātā hai. kyūṅki rabb ne apnī qaum ko itnī barkat dī hai ki yah sab kuchh bāqī rah gayā hai.”

¹¹tab hizaqiyāh ne hukm diyā ki rabb ke ghar meṅ godām banāe jāeṅ. jab aisā kiyā gayā ¹²to razākārānā hadie, paidāvār kā dasvāṅ hissā aur rabb ke liye maḵẖsūs kie gae atiyāt un meṅ rakhe gae. kūnaniyāh lāvī in chīzoṅ kā iṅchārj banā jabki us kā bhāī simaī us kā madadgār muqarrar huā. ¹³imām-e-āzam azariyāh rabb ke ghar ke pūre intizām kā iṅchārj thā, is liye hizaqiyāh bādshāh ne us ke sāth mil kar das nigrān muqarrar kie jo kūnaniyāh aur simaī ke tahat ḵẖidmat anjām deṅ. un ke nām yahīel, azaziyāh, nahat, asāhel, yarīmot, yūzbad, ilīel, ismākiyāh, mahat aur bināyāh the.

¹⁴jo lāvī mashriqī darvāze kā darbān thā us kā nām qore bin yimnā thā. ab use rabb ko razākārānā taur par die gae hadie aur us ke liye maḵẖsūs kie gae atīe taqsīm karne kā nigrān banāyā gayā. ¹⁵adan, minyamīn, yashūa, samāyāh, amariyāh aur sakaniyāh us ke madadgār the. un kī zimmādārī lāviyoṅ ke shaharoṅ meṅ rahane vāle imāmoṅ ko un kā hissā denā thī. baṛī vafādārī se vah ḵẖayāl rakhte the ki ḵẖidmat ke muḵẖtalif gurohoṅ ke tamām imāmoṅ ko vah hissā mil jāe jo un kā haq bantā thā, ḵẖwāh vah baṛe the yā chhoṭe. ¹⁶jo apne guroh ke sāth rabb ke ghar meṅ ḵẖidmat kartā thā use us kā hissā barāh-e-rāst miltā thā. is silsile meṅ lāvī ke qabīle ke jitne mardoṅ aur laṛkoṅ kī umr tīn sāl yā is se zāid thī un kī faharist banāī gaī. ¹⁷in faharistoṅ meṅ imāmoṅ ko un ke kuṁboṅ ke mutābiq darj kiyā gayā. isī tarah 20 sāl yā is se zāid ke lāviyoṅ ko un zimmādāriyoṅ aur ḵẖidmat ke mutābiq jo vah apne gurohoṅ meṅ saṁbhālte the faharistoṅ meṅ darj kiyā gayā. ¹⁸ḵẖāndānoṅ kī aurteṅ aur beṭe-beṭiyāṅ chhoṭe bacchoṅ samet bhī in faharistoṅ meṅ darj thīṅ. chūṅki un ke mard vafādārī se rabb ke ghar meṅ ḵẖidmat karte the, is liye yah dīgar afrād bhī maḵẖsūs-o-muqaddas samjhe jāte the. ¹⁹jo imām shaharoṅ se bāhar un charāgāhoṅ meṅ rahate the jo unheṅ hārūn kī aulād kī haisiyat se milī thīṅ unheṅ bhī hissā miltā thā. har shahar ke liye ādmī chune gae jo imāmoṅ ke ḵẖāndānoṅ ke mardoṅ aur faharist meṅ darj tamām lāviyoṅ ko vah hissā diyā kareṅ jo un kā haq thā.

²⁰hizaqiyāh bādshāh ne hukm diyā ki pūre yahūdāh meṅ aisā hī kiyā jāe. us kā kām rabb ke nazdīk acchhā, munsifānā aur vafādārānā thā. ²¹jo kuchh us ne allāh ke ghar meṅ intizām dubārā chalāne aur sharīat ko qāim karne ke silsile meṅ kiyā us ke liye vah pūre dil se apne ḵẖudā kā tālib rahā. natīje meṅ use kāmyābī hāsil huī.