2 Tavārīḵẖ 32

asūrī yahūdāh meṅ ghus āte haiṅ

¹hizaqiyāh ne vafādārī se yah tamām mansūbe takmīl tak pahuṅchāe. phir ek din asūr kā bādshāh sanherib apnī fauj ke sāth yahūdāh meṅ ghus āyā aur qil’āband shaharoṅ kā muhāsarā karne lagā tāki un par qabzā kare. ²jab hizaqiyāh ko ittilā milī ki sanherib ā kar yarūshalam par hamlā karne kī tayyāriyāṅ kar rahā hai ³to us ne apne sarkārī aur faujī afsaroṅ se mashvrā kiyā. ḵẖayāl yah pesh kiyā gayā ki yarūshalam shahar ke bāhar tamām chashmoṅ ko malbe se band kiyā jāe. sab muttafiq ho gae, ⁴kyūṅki unhoṅ ne kahā, “asūr ke bādshāh ko yahāṅ ā kar kasrat kā pānī kyūṅ mile?” bahut se ādmī jamā hue aur mil kar chashmoṅ ko malbe se band kar diyā. unhoṅ ne us zamīnadoz nāle kā muṅh bhī band kar diyā jis ke zarīe pānī shahar meṅ pahuṅchtā thā.

⁵is ke ilāvā hizaqiyāh ne baṛī mehanat se fasīl ke ṭūṭe-phūṭe hissoṅ kī marammat karvā kar us par burj banvāe. fasīl ke bāhar us ne ek aur chārdīvārī tāmīr kī jabki yarūshalam ke us hisse ke chabūtre mazīd mazbūt karvāe jo ‘dāūd kā shahar’ kahalātā hai. sāth sāth us ne baṛī miqdār meṅ hathiyār aur ḍhāleṅ banvāīṅ. ⁶hizaqiyāh ne logoṅ par faujī afsar muqarrar kie.

phir us ne sab ko darvāze ke sāth vāle chauk par ikaṭṭhā karke un kī hausalāafzāī kī, ⁷“mazbūt aur diler hoṅ! asūr ke bādshāh aur us kī baṛī fauj ko dekh kar mat ḍareṅ, kyūṅki jo tāqat hamāre sāth hai vah use hāsil nahīṅ hai. ⁸asūr ke bādshāh ke liye sirf ḵẖākī ādmī laṛ rahe haiṅ jabki rabb hamārā ḵẖudā hamāre sāth hai. vahī hamārī madad karke hamāre liye laṛegā!” hizaqiyāh bādshāh ke in alfāz se logoṅ kī baṛī hausalāafzāī huī.

asūrī yarūshalam kā muhāsarā karte haiṅ

⁹jab asūr kā bādshāh sanherib apnī pūrī fauj ke sāth lakīs kā muhāsarā kar rahā thā to us ne vahāṅ se yarūshalam ko vafad bhejā tāki yahūdāh ke bādshāh hizaqiyāh aur yahūdāh ke tamām bāshindoṅ ko paiġām pahuṅchāe,

¹⁰“shāh-e-asūr sanherib farmāte haiṅ, tumhārā bharosā kis chīz par hai ki tum muhāsare ke vaqt yarūshalam ko chhoṛnā nahīṅ chāhate? ¹¹jab hizaqiyāh kahatā hai, ‘rabb hamārā ḵẖudā hameṅ asūr ke bādshāh se bachāegā’ to vah tumheṅ ġalat rāh par lā rahā hai. is kā sirf yah natījā niklegā ki tum bhūke aur piyāse mar jāoge. ¹²hizaqiyāh ne to is ḵẖudā kī behuramtī kī hai. kyūṅki us ne us kī ūṅchī jagahoṅ ke mandiroṅ aur qurbānagāhoṅ ko ḍhā kar yahūdāh aur yarūshalam se kahā hai ki ek hī qurbāngāh ke sāmne parastish kareṅ, ek hī qurbāngāh par qurbāniyāṅ chaṛhāeṅ. ¹³kyā tumheṅ ilm nahīṅ ki maiṅ aur mere bāpdādā ne dīgar mamālik kī tamām qaumoṅ ke sāth kyā kuchh kiyā? kyā in qaumoṅ ke devtā apne mulkoṅ ko mujh se bachāne ke qābil rahe haiṅ? hargiz nahīṅ! ¹⁴mere bāpdādā ne in sab ko tabāh kar diyā, aur koī bhī devtā apnī qaum ko mujh se bachā na sakā. to phir tumhārā devtā tumheṅ kis tarah mujh se bachāegā? ¹⁵hizaqiyāh se fareb na khāo! vah is tarah tumheṅ ġalat rāh par na lāe. us kī bāt par etimād mat karnā, kyūṅki ab tak kisī bhī qaum yā saltanat kā devtā apnī qaum ko mere yā mere bāpdādā ke qabze se chhuṭkārā na dilā sakā. to phir tumhārā devtā tumheṅ mere qabze se kis tarah bachāegā?”

¹⁶aisī bāteṅ karte karte sanherib ke afsar rabb isrāīl ke ḵẖudā aur us ke ḵẖādim hizaqiyāh par kufr bakte gae.

¹⁷asūr ke bādshāh ne vafad ke hāth ḵẖat bhī bhejā jis meṅ us ne rabb isrāīl ke ḵẖudā kī ihānat kī. ḵẖat meṅ likhā thā, “jis tarah dīgar mamālik ke devtā apnī qaumoṅ ko mujh se mahfūz na rakh sake usī tarah hizaqiyāh kā devtā bhī apnī qaum ko mere qabze se nahīṅ bachāegā.”

¹⁸asūrī afsaroṅ ne buland āvāz se ibrānī zabān meṅ bādshāh kā paiġām fasīl par khaṛe yarūshalam ke bāshindoṅ tak pahuṅchāyā tāki un meṅ ḵẖauf-o-hirās phail jāe aur yūṅ shahar par qabzā karne meṅ āsānī ho jāe. ¹⁹in afsaroṅ ne yarūshalam ke ḵẖudā kā yūṅ tamasḵẖur uṛāyā jaisā vah duniyā kī dīgar qaumoṅ ke devtāoṅ kā uṛāyā karte the, hālāṅki dīgar mābūd sirf insānī hāthoṅ kī paidāvār the.

rabb sanherib ko sazā detā hai

²⁰phir hizaqiyāh bādshāh aur āmūs ke beṭe yasāyāh nabī ne chillāte hue āsmān par taḵẖtnashīn ḵẖudā se iltimās kī. ²¹javāb meṅ rabb ne asūriyoṅ kī lashkargāh meṅ ek farishtā bhejā jis ne tamām behtarīn faujiyoṅ ko afsaroṅ aur kamāṅḍaroṅ samet maut ke ghāṭ utār diyā. chunāṅche sanherib sharmindā ho kar apne mulk lauṭ gayā. vahāṅ ek din jab vah apne devtā ke mandir meṅ dāḵẖil huā to us ke kuchh beṭoṅ ne use talvār se qatl kar diyā.

²²is tarah rabb ne hizaqiyāh aur yarūshalam ke bāshindoṅ ko shāh-e-asūr sanherib se chhuṭkārā dilāyā. us ne unheṅ dūsrī qaumoṅ ke hamloṅ se bhī mahfūz rakhā, aur chāroṅ taraf amn-o-amān phail gayā. ²³beshumār log yarūshalam āe tāki rabb ko qurbāniyāṅ pesh kareṅ aur hizaqiyāh bādshāh ko qīmtī tuhfe deṅ. us vaqt se tamām qaumeṅ us kā baṛā ehatirām karne lagīṅ.

hizaqiyāh ke āḵẖirī sāl

²⁴un dinoṅ meṅ hizaqiyāh itnā bīmār huā ki marne kī naubat ā pahuṅchī. tab us ne rabb se duā kī, aur rabb ne us kī sun kar ek ilāhī nishān se is kī tasdīq kī. ²⁵lekin hizaqiyāh maġrūr huā, aur us ne is meharbānī kā munāsib javāb na diyā. natīje meṅ rabb us se aur yahūdāh aur yarūshalam se nārāz huā. ²⁶phir hizaqiyāh aur yarūshalam ke bāshindoṅ ne pachhtā kar apnā ġarūr chhoṛ diyā, is liye rabb kā ġazab hizaqiyāh ke jīte jī un par nāzil na huā.

²⁷hizaqiyāh ko bahut daulat aur izzat hāsil huī, aur us ne apnī sone-chāṅdī, javāhir, balsān ke qīmtī tel, ḍhāloṅ aur bāqī qīmtī chīzoṅ ke liye ḵẖās ḵẖazāne banvāe. ²⁸us ne ġallā, aṅgūr kā ras aur zaitūn kā tel mahfūz rakhne ke liye godām tāmīr kie aur apne gāy-bailoṅ aur bheṛ-bakriyoṅ ko rakhne kī bahut sī jagaheṅ bhī banvā līṅ. ²⁹us ke gāy-bailoṅ aur bheṛ-bakriyoṅ meṅ izāfā hotā gayā, aur us ne kaī nae shaharoṅ kī bunyād rakhī, kyūṅki allāh ne use nihāyat hī amīr banā diyā thā. ³⁰hizaqiyāh hī ne jaihūn chashme kā muṅh band karke us kā pānī suraṅg ke zarīe maġrib kī taraf yarūshalam ke us hisse meṅ pahuṅchāyā jo ‘dāūd kā shahar’ kahalātā hai. jo bhī kām us ne shurū kiyā us meṅ vah kāmyāb rahā. ³¹ek din bābal ke hukmarānoṅ ne us ke pās vafad bhejā tāki us ilāhī nishān ke bāre meṅ mālūmāt hāsil kareṅ jo yahūdāh meṅ huā thā. us vaqt allāh ne use akelā chhoṛ diyā tāki us ke dil kī haqīqī hālat jāṅch le.

³²bāqī jo kuchh hizaqiyāh kī hukūmat ke daurān huā aur jo nek kām us ne kiyā vah ‘āmūs ke beṭe yasāyāh nabī kī royā’ meṅ qalamband hai jo ‘shāhān-e-yahūdāh-o-isrāīl’ kī kitāb meṅ darj hai. ³³jab vah mar kar apne bāpdādā se jā milā to use shāhī qabristān kī ek ūṅchī jagah par dafnāyā gayā. jab janāzā niklā to yahūdāh aur yarūshalam ke tamām bāshindoṅ ne us kā ehatirām kiyā. phir us kā beṭā manassī taḵẖtnashīn huā.