2 Tavārīḵẖ 33

yahūdāh kā bādshāh manassī

¹manassī 12 sāl kī umr meṅ bādshāh banā, aur yarūshalam meṅ us kī hukūmat kā daurāniyā 55 sāl thā. ²manassī kā chāl-chalan rabb ko nāpsand thā. us ne un qaumoṅ ke qābil-e-ghin rasm-o-rivāj apnā liye jinheṅ rabb ne isrāīliyoṅ ke āge se nikāl diyā thā. ³ūṅchī jagahoṅ ke jin mandiroṅ ko us ke bāp hizaqiyāh ne ḍhā diyā thā unheṅ us ne nae sire se tāmīr kiyā. us ne bāl devtāoṅ kī qurbāngāheṅ banvāīṅ aur yasīrat devī ke khambe khaṛe kie. in ke ilāvā vah sūraj, chāṅd balki āsmān ke pūre lashkar ko sijdā karke un kī ḵẖidmat kartā thā. ⁴us ne rabb ke ghar meṅ bhī apnī qurbāngāheṅ khaṛī kīṅ, hālāṅki rabb ne is maqām ke bāre meṅ farmāyā thā, “yarūshalam meṅ merā nām abad tak qāim rahegā.” ⁵lekin manassī ne parvā na kī balki rabb ke ghar ke donoṅ sahanoṅ meṅ āsmān ke pūre lashkar ke liye qurbāngāheṅ banvāīṅ. ⁶yahāṅ tak ki us ne vādī-e-bin-hinnūm meṅ apne beṭoṅ ko bhī qurbān karke jalā diyā. jādūgrī, ġaibdānī aur afsūṅgarī karne ke ilāvā vah murdoṅ kī rūhoṅ se rābitā karne vāloṅ aur rammāloṅ se bhī mashvrā kartā thā.

ġaraz us ne bahut kuchh kiyā jo rabb ko nāpsand thā aur use taish dilāyā. ⁷devī kā but banvā kar us ne use allāh ke ghar meṅ khaṛā kiyā, hālāṅki rabb ne dāūd aur us ke beṭe sulemān se kahā thā, “is ghar aur is shahar yarūshalam meṅ jo maiṅ ne tamām isrāīlī qabīloṅ meṅ se chun liyā hai maiṅ apnā nām abad tak qāim rakhūṅgā. ⁸agar isrāīlī ehatiyāt se mere un tamām ahkām aur hidāyāt kī pairvī kareṅ jo mūsā ne sharīat meṅ unheṅ die to maiṅ kabhī nahīṅ hone dūṅgā ki isrāīliyoṅ ko us mulk se jilāvatan kar diyā jāe jo maiṅ ne un ke bāpdādā ko atā kiyā thā.” ⁹lekin manassī ne yahūdāh aur yarūshalam ke bāshindoṅ ko aise ġalat kām karne par uksāyā jo un qaumoṅ se bhī sarzad nahīṅ hue the jinheṅ rabb ne mulk meṅ dāḵẖil hote vaqt un ke āge se tabāh kar diyā thā.

¹⁰go rabb ne manassī aur apnī qaum ko samjhāyā, lekin unhoṅ ne parvā na kī. ¹¹tab rabb ne asūrī bādshāh ke kamāṅḍaroṅ ko yahūdāh par hamlā karne diyā. unhoṅ ne manassī ko pakaṛ kar us kī nāk meṅ nakel ḍālī aur use pītal kī zanjīroṅ meṅ jakaṛ kar bābal le gae. ¹²jab vah yūṅ musībat meṅ phaṅs gayā to manassī rabb apne ḵẖudā kā ġazab ṭhaṅḍā karne kī koshish karne lagā aur apne āp ko apne bāpdādā ke ḵẖudā ke huzūr past kar diyā.

¹³aur rabb ne us kī iltimās par dhyān de kar us kī sunī. use yarūshalam vāpas lā kar us ne us kī hukūmat bahāl kar dī. tab manassī ne jān liyā ki rabb hī ḵẖudā hai.

¹⁴is ke bād us ne ‘dāūd ke shahar’ kī bairūnī fasīl nae sire se banvāī. yah fasīl jaihūn chashme ke maġrib se shurū huī aur vādī-e-qidron meṅ se guzar kar machhlī ke darvāze tak pahuṅch gaī. is dīvār ne rabb ke ghar kī pūrī pahāṛī banām ofal kā ihātā kar liyā aur bahut buland thī. is ke ilāvā bādshāh ne yahūdāh ke tamām qil’āband shaharoṅ par faujī afsar muqarrar kie. ¹⁵us ne ajnabī mābūdoṅ ko but samet rabb ke ghar se nikāl diyā. jo qurbāngāheṅ us ne rabb ke ghar kī pahāṛī aur bāqī yarūshalam meṅ khaṛī kī thīṅ unheṅ bhī us ne ḍhā kar shahar se bāhar phaiṅk diyā. ¹⁶phir us ne rabb kī qurbāngāh ko nae sire se tāmīr karke us par salāmatī aur shukrguzārī kī qurbāniyāṅ chaṛhāīṅ. sāth sāth us ne yahūdāh ke bāshindoṅ se kahā ki rabb isrāīl ke ḵẖudā kī ḵẖidmat kareṅ. ¹⁷go log is ke bād bhī ūṅchī jagahoṅ par apnī qurbāniyāṅ pesh karte the, lekin ab se vah inheṅ sirf rabb apne ḵẖudā ko pesh karte the.

¹⁸bāqī jo kuchh manassī kī hukūmat ke daurān huā vah ‘shāhān-e-isrāīl kī tārīḵẖ’ kī kitāb meṅ darj hai. vahāṅ us kī apne ḵẖudā se duā bhī bayān kī gaī hai aur vah bāteṅ bhī jo ġaibbīnoṅ ne rabb isrāīl ke ḵẖudā ke nām meṅ use batāī thīṅ. ¹⁹ġaibbīnoṅ kī kitāb meṅ bhī manassī kī duā bayān kī gaī hai aur yah ki allāh ne kis tarah us kī sunī. vahāṅ us ke tamām gunāhoṅ aur bevafāī kā zikr hai, nīz un ūṅchī jagahoṅ kī faharist darj hai jahāṅ us ne allāh ke tābe ho jāne se pahale mandir banā kar yasīrat devī ke khambe aur but khaṛe kie the. ²⁰jab manassī mar kar apne bāpdādā se jā milā to use us ke mahal meṅ dafan kiyā gayā. phir us kā beṭā amūn taḵẖtnashīn huā.

yahūdāh kā bādshāh amūn

²¹amūn 22 sāl kī umr meṅ bādshāh banā aur do sāl tak yarūshalam meṅ hukūmat kartā rahā. ²²apne bāp manassī kī tarah vah aisā ġalat kām kartā rahā jo rabb ko nāpsand thā. jo but us ke bāp ne banvāe the un hī kī pūjā vah kartā aur un hī ko qurbāniyāṅ pesh kartā thā. ²³lekin us meṅ aur manassī meṅ yah farq thā ki beṭe ne apne āp ko rabb ke sāmne past na kiyā balki us kā qusūr mazīd saṅgīn hotā gayā. ²⁴ek din amūn ke kuchh afsaroṅ ne us ke ḵẖilāf sāzish karke use mahal meṅ qatl kar diyā. ²⁵lekin ummat ne tamām sāzish karne vāloṅ ko mār ḍālā aur amūn kī jagah us ke beṭe yūsiyāh ko bādshāh banā diyā.