2 Tavārīḵẖ 34

yūsiyāh bādshāh butparastī kī muḵẖālafat kartā hai

¹yūsiyāh 8 sāl kī umr meṅ bādshāh banā, aur yarūshalam meṅ rah kar us kī hukūmat kā daurāniyā 31 sāl thā. ²yūsiyāh vah kuchh kartā rahā jo rabb ko pasand thā. vah apne bāp dāūd ke acchhe namūne par chaltā rahā aur us se na dāīṅ, na bāīṅ taraf haṭā.

³apnī hukūmat ke āṭhveṅ sāl meṅ vah apne bāp dāūd ke ḵẖudā kī marzī talāsh karne lagā, go us vaqt vah javān hī thā. apnī hukūmat ke 12veṅ sāl meṅ vah ūṅchī jagahoṅ ke mandiroṅ, yasīrat devī ke khamboṅ aur tamām tarāshe aur ḍhāle hue butoṅ ko pūre mulk se dūr karne lagā. yūṅ tamām yarūshalam aur yahūdāh in chīzoṅ se pāk-sāf ho gayā. ⁴bādshāh ke zer-e-nigrānī bāl devtāoṅ kī qurbānagāhoṅ ko ḍhā diyā gayā. baḵẖūr kī jo qurbāngāheṅ un ke ūpar thīṅ unheṅ us ne ṭukṛe ṭukṛe kar diyā. yasīrat devī ke khamboṅ aur tarāshe aur ḍhāle hue butoṅ ko zamīn par paṭaḵẖ kar us ne unheṅ pīs kar un kī qabroṅ par bikher diyā jinhoṅ ne jīte jī un ko qurbāniyāṅ pesh kī thīṅ. ⁵butparast pujāriyoṅ kī haḍḍiyoṅ ko un kī apnī qurbānagāhoṅ par jalāyā gayā. is tarah se yūsiyāh ne yarūshalam aur yahūdāh ko pāk-sāf kar diyā. ^6-7 yah us ne na sirf yahūdāh balki manassī, ifrāīm, shamāūn aur naftālī tak ke shaharoṅ meṅ ird-gird ke khaṅḍarāt samet bhī kiyā. us ne qurbānagāhoṅ ko girā kar yasīrat devī ke khamboṅ aur butoṅ ko ṭukṛe ṭukṛe karke chiknā-chūr kar diyā. tamām isrāīl kī baḵẖūr kī qurbānagāhoṅ ko us ne ḍhā diyā. is ke bād vah yarūshalam vāpas chalā gayā.

rabb ke ghar kī marammat

⁸apnī hukūmat ke 18veṅ sāl meṅ yūsiyāh ne sāfan bin asaliyāh, yarūshalam par muqarrar afsar māsiyāh aur bādshāh ke mushīr-e-ḵẖās yūāḵẖ bin yūāḵẖaz ko rabb apne ḵẖudā ke ghar ke pās bhejā tāki us kī marammat karvāeṅ. us vaqt mulk aur rabb ke ghar ko pāk-sāf karne kī muhimm jārī thī. ⁹imām-e-āzam ḵẖilaqiyāh ke pās jā kar unhoṅ ne use vah paise die jo lāvī ke darbānoṅ ne rabb ke ghar meṅ jamā kie the. yah hadie manassī aur ifrāīm ke bāshindoṅ, isrāīl ke tamām bache hue logoṅ aur yahūdāh, binyamīn aur yarūshalam ke rahane vāloṅ kī taraf se pesh kie gae the.

¹⁰ab yah paise un ṭhekedāroṅ ke havāle kar die gae jo rabb ke ghar kī marammat karvā rahe the. in paisoṅ se ṭhekedāroṅ ne un kārīgaroṅ kī ujrat adā kī jo rabb ke ghar kī marammat karke use mazbūt kar rahe the. ¹¹kārīgaroṅ aur tāmīr karne vāloṅ ne in paisoṅ se tarāshe hue patthar aur shahatīroṅ kī lakṛī bhī ḵẖarīdī. imāratoṅ meṅ shahatīroṅ ko badalne kī zarūrat thī, kyūṅki yahūdāh ke bādshāhoṅ ne un par dhyān nahīṅ diyā thā, lihāzā vah gal gae the. ¹²in ādmiyoṅ ne vafādārī se ḵẖidmat sar’anjām dī. chār lāvī in kī nigrānī karte the jin meṅ yahat aur abadiyāh mirārī ke ḵẖāndān ke the jabki zakariyāh aur masullām qihāt ke ḵẖāndān ke the. jitne lāvī sāz bajāne meṅ māhir the ¹³vah mazdūroṅ aur tamām dīgar kārīgaroṅ par muqarrar the. kuchh aur lāvī munshī, nigrān aur darbān the.

rabb ke ghar meṅ sharīat kī kitāb mil jātī hai

¹⁴jab vah paise bāhar lāe gae jo rabb ke ghar meṅ jamā hue the to ḵẖilaqiyāh ko sharīat kī vah kitāb milī jo rabb ne mūsā kī mārifat dī thī. ¹⁵use mīramunshī sāfan ko de kar us ne kahā, “mujhe rabb ke ghar meṅ sharīat kī kitāb milī hai.” ¹⁶tab sāfan kitāb ko le kar bādshāh ke pās gayā aur use ittilā dī, “jo bhī zimmādārī āp ke mulāzimoṅ ko dī gaī unheṅ vah acchhī tarah pūrā kar rahe haiṅ. ¹⁷unhoṅ ne rabb ke ghar meṅ jamāshudā paise marammat par muqarrar ṭhekedāroṅ aur bāqī kām karne vāloṅ ko de die haiṅ.” ¹⁸phir sāfan ne bādshāh ko batāyā, “ḵẖilaqiyāh ne mujhe ek kitāb dī hai.” kitāb ko khol kar vah bādshāh kī maujūdgī meṅ us kī tilāvat karne lagā.

¹⁹kitāb kī bāteṅ sun kar bādshāh ne raṅjīdā ho kar apne kapṛe phāṛ liye. ²⁰us ne ḵẖilaqiyāh, aḵẖīqām bin sāfan, abdon bin mīkāh, mīramunshī sāfan aur apne ḵẖās ḵẖādim asāyāh ko bulā kar unheṅ hukm diyā, ²¹“jā kar merī aur isrāīl aur yahūdāh ke bache hue afrād kī ḵẖātir rabb se is kitāb meṅ darj bātoṅ ke bāre meṅ darayāft kareṅ. rabb kā jo ġazab ham par nāzil hone vālā hai vah nihāyat saḵẖt hai, kyūṅki hamāre bāpdādā na rabb ke farmān ke tābe rahe, na un hidāyāt ke mutābiq zindagī guzārī hai jo kitāb meṅ darj kī gaī haiṅ.”

²²chunāṅche ḵẖilaqiyāh bādshāh ke bheje hue chand ādmiyoṅ ke sāth ḵẖuldā nabiyā ko milne gayā. ḵẖuldā kā shauhar sallūm bin toqahat bin ḵẖasrā rabb ke ghar ke kapṛe saṁbhāltā thā. vah yarūshalam ke nae ilāqe meṅ rahate the. ^23-24 ḵẖuldā ne unheṅ javāb diyā,

“rabb isrāīl kā ḵẖudā farmātā hai ki jis ādmī ne tumheṅ bhejā hai use batā denā, ‘rabb farmātā hai ki maiṅ is shahar aur is ke bāshindoṅ par āfat nāzil karūṅgā. vah tamām lānteṅ pūrī ho jāeṅgī jo bādshāh ke huzūr paṛhī gaī kitāb meṅ bayān kī gaī haiṅ. ²⁵kyūṅki merī qaum ne mujhe tark karke dīgar mābūdoṅ ko qurbāniyāṅ pesh kī haiṅ aur apne hāthoṅ se but banā kar mujhe taish dilāyā hai. merā ġazab is maqām par nāzil ho jāegā aur kabhī ḵẖatm nahīṅ hogā.’ ²⁶lekin yahūdāh ke bādshāh ke pās jāeṅ jis ne āp ko rabb se darayāft karne ke liye bhejā hai aur use batā deṅ ki rabb isrāīl kā ḵẖudā farmātā hai, ‘merī bāteṅ sun kar ²⁷terā dil narm ho gayā hai. jab tujhe patā chalā ki maiṅ ne is maqām aur is ke bāshindoṅ ke ḵẖilāf bāt kī hai to tū ne apne āp ko allāh ke sāmne past kar diyā. tū ne baṛī inkisārī se raṅjīdā ho kar apne kapṛe phāṛ liye aur mere huzūr phūṭ phūṭ kar royā. rabb farmātā hai ki yah dekh kar maiṅ ne terī sunī hai. ²⁸jab tū mere kahane par mar kar apne bāpdādā se jā milegā to salāmatī se dafan hogā. jo āfat maiṅ shahar aur us ke bāshindoṅ par nāzil karūṅgā vah tū ḵẖud nahīṅ dekhegā’.”

afsar bādshāh ke pās vāpas gae aur use ḵẖuldā kā javāb sunā diyā.

yūsiyāh rabb se ahd bāṅdhtā hai

²⁹tab bādshāh yahūdāh aur yarūshalam ke tamām buzurgoṅ ko bulā kar ³⁰rabb ke ghar meṅ gayā. sab log chhoṭe se le kar baṛe tak us ke sāth gae yānī yahūdāh ke ādmī, yarūshalam ke bāshinde, imām aur lāvī. vahāṅ pahuṅch kar jamāat ke sāmne ahd kī us pūrī kitāb kī tilāvat kī gaī jo rabb ke ghar meṅ milī thī.

³¹phir bādshāh ne apne satūn ke pās khaṛe ho kar rabb ke huzūr ahd bāṅdhā aur vādā kiyā, “ham rabb kī pairvī kareṅge, ham pūre dil-o-jān se us ke ahkām aur hidāyāt pūrī karke is kitāb meṅ darj ahd kī bāteṅ qāim rakheṅge.” ³²yūsiyāh ne mutālbā kiyā ki yarūshalam aur yahūdāh ke tamām bāshinde ahd meṅ sharīk ho jāeṅ. us vaqt se yarūshalam ke bāshinde apne bāpdādā ke ḵẖudā ke ahd ke sāth lipṭe rahe.

³³yūsiyāh ne isrāīl ke pūre mulk se tamām ghinaune butoṅ ko dūr kar diyā. isrāīl ke tamām bāshindoṅ ko us ne tākīd kī, “rabb apne ḵẖudā kī ḵẖidmat kareṅ.” chunāṅche yūsiyāh ke jīte jī vah rabb apne bāpdādā kī rāh se dūr na hue.