2 Tavārīḵẖ 35

yūsiyāh fasah kī īd manātā hai

¹phir yūsiyāh ne rabb kī tāzīm meṅ fasah kī īd manāī. pahale mahīne ke 14veṅ din fasah kā lelā zabah kiyā gayā. ²bādshāh ne imāmoṅ ko kām par lagā kar un kī hausalāafzāī kī ki vah rabb ke ghar meṅ apnī ḵẖidmat acchhī tarah anjām deṅ. ³lāviyoṅ ko tamām isrāīliyoṅ ko sharīat kī tālīm dene kī zimmādārī dī gaī thī, aur sāth sāth unheṅ rabb kī ḵẖidmat ke liye maḵẖsūs kiyā gayā thā. un se yūsiyāh ne kahā,

“muqaddas sandūq ko us imārat meṅ rakheṅ jo isrāīl ke bādshāh dāūd ke beṭe sulemān ne tāmīr kiyā. use apne kaṅdhoṅ par uṭhā kar idhar udhar le jāne kī zarūrat nahīṅ hai balki ab se apnā vaqt rabb apne ḵẖudā aur us kī qaum isrāīl kī ḵẖidmat meṅ sarf kareṅ. ⁴un ḵẖāndānī gurohoṅ ke mutābiq ḵẖidmat ke liye tayyār raheṅ jin kī tartīb dāūd bādshāh aur us ke beṭe sulemān ne likh kar muqarrar kī thī. ⁵phir maqdis meṅ us jagah khaṛe ho jāeṅ jo āp ke ḵẖāndānī guroh ke liye muqarrar hai aur un ḵẖāndānoṅ kī madad kareṅ jo qurbāniyāṅ chaṛhāne ke liye āte haiṅ aur jin kī ḵẖidmat karne kī zimmādārī āp ko dī gaī hai. ⁶apne āp ko ḵẖidmat ke liye maḵẖsūs kareṅ aur fasah ke lele zabah karke apne hamvatanoṅ ke liye is tarah tayyār kareṅ jis tarah rabb ne mūsā kī mārifat hukm diyā thā.”

⁷īd kī ḵẖushī meṅ yūsiyāh ne īd manāne vāloṅ ko apnī milkiyat meṅ se 30,000 bheṛ-bakriyoṅ ke bacche die. yah jānvar fasah kī qurbānī ke taur par chaṛhāe gae jabki bādshāh kī taraf se 3,000 bail dīgar qurbāniyoṅ ke liye istemāl hue. ⁸is ke ilāvā bādshāh ke afsaroṅ ne bhī apnī ḵẖushī se qaum, imāmoṅ aur lāviyoṅ ko jānvar die. allāh ke ghar ke sab se ālā afsaroṅ ḵẖilaqiyāh, zakariyāh aur yahīel ne dīgar imāmoṅ ko fasah kī qurbānī ke liye 2,600 bheṛ-bakriyoṅ ke bacche die, nīz 300 bail. ⁹isī tarah lāviyoṅ ke rāhanumāoṅ ne dīgar lāviyoṅ ko fasah kī qurbānī ke liye 5,000 bheṛ-bakriyoṅ ke bacche die, nīz 500 bail. un meṅ se tīn bhāī banām kūnaniyāh, samāyāh aur natanīel the jabki dūsroṅ ke nām hasabiyāh, yaīel aur yūzbad the. ¹⁰jab har ek ḵẖidmat ke liye tayyār thā to imām apnī apnī jagah par aur lāvī apne apne gurohoṅ ke mutābiq khaṛe ho gae jis tarah bādshāh ne hidāyat dī thī. ¹¹lāviyoṅ ne fasah ke leloṅ ko zabah karke un kī khāleṅ utārīṅ jabki imāmoṅ ne lāviyoṅ se jānvaroṅ kā ḵẖūn le kar qurbāngāh par chhiṛkā. ¹²jo kuchh bhasm hone vālī qurbāniyoṅ ke liye muqarrar thā use qaum ke muḵẖtalif ḵẖāndānoṅ ke liye ek taraf rakh diyā gayā tāki vah use bād meṅ rabb ko qurbānī ke taur par pesh kar sakeṅ, jis tarah mūsā kī sharīat meṅ likhā hai. bailoṅ ke sāth bhī aisā hī kiyā gayā. ¹³fasah ke leloṅ ko hidāyāt ke mutābiq āg par bhūnā gayā jabki bāqī gosht ko muḵẖtalif qism kī degoṅ meṅ ubālā gayā. jūṅ hī gosht pak gayā to lāviyoṅ ne use jaldī se hāzirīn meṅ taqsīm kiyā. ¹⁴is ke bād unhoṅ ne apne aur imāmoṅ ke liye fasah ke lele tayyār kie, kyūṅki hārūn kī aulād yānī imām bhasm hone vālī qurbāniyoṅ aur charbī ko chaṛhāne meṅ rāt tak masrūf rahe.

¹⁵īd ke pūre daurān āsaf ke ḵẖāndān ke gulūkār apnī apnī jagah par khaṛe rahe, jis tarah dāūd, āsaf, haimān aur bādshāh ke ġaibbīn yadūtūn ne hidāyat dī thī. darbān bhī rabb ke ghar ke darvāzoṅ par musalsal khaṛe rahe. unheṅ apnī jagahoṅ ko chhoṛne kī zarūrat bhī nahīṅ thī, kyūṅki bāqī lāviyoṅ ne un ke liye bhī fasah ke lele tayyār kar rakhe. ¹⁶yūṅ us din yūsiyāh ke hukm par qurbāniyoṅ ke pūre intizām ko tartīb diyā gayā tāki āindā fasah kī īd manāī jāe aur bhasm hone vālī qurbāniyāṅ rabb kī qurbāngāh par pesh kī jāeṅ.

¹⁷yarūshalam meṅ jamā hue isrāīliyoṅ ne fasah kī īd aur beḵẖamīrī roṭī kī īd ek hafte ke daurān manāī. ¹⁸fasah kī īd isrāīl meṅ samūel nabī ke zamāne se le kar us vaqt tak is tarah nahīṅ manāī gaī thī. isrāīl ke kisī bhī bādshāh ne use yūṅ nahīṅ manāyā thā jis tarah yūsiyāh ne use us vaqt imāmoṅ, lāviyoṅ, yarūshalam aur tamām yahūdāh aur isrāīl se āe hue logoṅ ke sāth mil kar manāī. ¹⁹yūsiyāh bādshāh kī hukūmat ke 18veṅ sāl meṅ pahalī dafā rabb kī tāzīm meṅ aisī īd manāī gaī.

yūsiyāh kī maut

²⁰rabb ke ghar kī bahālī kī takmīl ke bād ek din misr kā bādshāh nikoh daryā-e-furāt par ke shahar karkimīs ke liye ravānā huā tāki vahāṅ dushman se laṛe. lekin rāste meṅ yūsiyāh us kā muqāblā karne ke liye niklā. ²¹nikoh ne apne qāsidoṅ ko yūsiyāh ke pās bhej kar use ittilā dī, “ai yahūdāh ke bādshāh, merā āp se kyā vāstā? is vaqt maiṅ āp par hamlā karne ke liye nahīṅ niklā balki us shāhī ḵẖāndān par jis ke sāth merā jhagṛā hai. allāh ne farmāyā hai ki maiṅ jaldī karūṅ. vah to mere sāth hai. chunāṅche us kā muqāblā karne se bāz āeṅ, varnā vah āp ko halāk kar degā.”

²²lekin yūsiyāh bāz na āyā balki laṛne ke liye tayyār huā. us ne nikoh kī bāt na mānī go allāh ne use us kī mārifat āgāh kiyā thā. chunāṅche vah bhes badal kar firaaun se laṛne ke liye majiddo ke maidān meṅ pahuṅchā. ²³jab laṛāī chhiṛ gaī to yūsiyāh tīroṅ se zaḵẖmī huā, aur us ne apne mulāzimoṅ ko hukm diyā, “mujhe yahāṅ se le jāo, kyūṅki maiṅ saḵẖt zaḵẖmī ho gayā hūṅ.” ²⁴logoṅ ne use us ke apne rath par se uṭhā kar us ke ek aur rath meṅ rakhā jo use yarūshalam le gayā. lekin us ne vafāt pāī, aur use apne bāpdādā ke ḵẖāndānī qabristān meṅ dafan kiyā gayā. pūre yahūdāh aur yarūshalam ne us kā mātam kiyā.

²⁵yaramiyāh ne yūsiyāh kī yād meṅ mātmī gīt likhe, aur āj tak gīt gāne vāle mard-o-ḵẖavātīn yūsiyāh kī yād meṅ mātmī gīt gāte haiṅ, yah pakkā dastūr ban gayā hai. yah gīt ‘nohā kī kitāb’ meṅ darj haiṅ.

^26-27 bāqī jo kuchh shurū se le kar āḵẖir tak yūsiyāh kī hukūmat ke daurān huā vah ‘shāhān-e-yahūdāh-o-isrāīl’ kī kitāb meṅ bayān kiyā gayā hai. vahāṅ us ke nek kāmoṅ kā zikr hai aur yah ki us ne kis tarah sharīat ke ahkām par amal kiyā.