2 Tavārīḵẖ 36
yahūdāh kā bādshāh yahūāḵẖaz
1ummat ne yūsiyāh ke beṭe yahūāḵẖaz ko bāp ke taḵẖt par biṭhā diyā. 2yahūāḵẖaz 23 sāl kī umr meṅ bādshāh banā, aur yarūshalam meṅ us kī hukūmat kā daurāniyā tīn māh thā. 3phir misr ke bādshāh ne use taḵẖt se utār diyā, aur mulk-e-yahūdāh ko taqrīban 3,400 kilogrām chāṅdī aur 34 kilogrām sonā ḵẖarāj ke taur par adā karnā paṛā. 4misr ke bādshāh ne yahūāḵẖaz ke sage bhāī iliyāqīm ko yahūdāh aur yarūshalam kā nayā bādshāh banā kar us kā nām yahūyaqīm meṅ badal diyā. yahūāḵẖaz ko vah qaid karke apne sāth misr le gayā.
yahūdāh kā bādshāh yahūyaqīm
5yahūyaqīm 25 sāl kī umr meṅ bādshāh banā, aur yarūshalam meṅ rah kar vah 11 sāl tak hukūmat kartā rahā. us kā chāl-chalan rabb us ke ḵẖudā ko nāpsand thā. 6ek din bābal ke nabūkadnazzar ne yahūdāh par hamlā kiyā aur yahūyaqīm ko pītal kī zanjīroṅ meṅ jakaṛ kar bābal le gayā. 7nabūkadnazzar rabb ke ghar kī kaī qīmtī chīzeṅ bhī chhīn kar apne sāth bābal le gayā aur vahāṅ apne mandir meṅ rakh dīṅ.
8bāqī jo kuchh yahūyaqīm kī hukūmat ke daurān huā vah ‘shāhān-e-yahūdāh-o-isrāīl’ kī kitāb meṅ darj hai. vahāṅ yah bayān kiyā gayā hai ki us ne kaisī ghinaunī harkateṅ kīṅ aur ki kyā kuchh us ke sāth huā. us ke bād us kā beṭā yahūyākīn taḵẖtnashīn huā.
yahūyākīn kī hukūmat
9yahūyākīn 18 sāl kī umr meṅ bādshāh banā, aur yarūshalam meṅ us kī hukūmat kā daurāniyā tīn māh aur das din thā. us kā chāl-chalan rabb ko nāpsand thā. 10bahār ke mausam meṅ nabūkadnazzar bādshāh ne hukm diyā ki use giriftār karke bābal le jāyā jāe. sāth sāth faujiyoṅ ne rabb ke ghar kī qīmtī chīzeṅ bhī chhīn kar bābal pahuṅchāīṅ. yahūyākīn kī jagah nabūkadnazzar ne yahūyākīn ke chachā sidaqiyāh ko yahūdāh aur yarūshalam kā bādshāh banā diyā.
sidaqiyāh bādshāh aur yarūshalam kī tabāhī
11sidaqiyāh 21 sāl kī umr meṅ taḵẖtnashīn huā, aur yarūshalam meṅ us kī hukūmat kā daurāniyā 11 sāl thā. 12us kā chāl-chalan rabb us ke ḵẖudā ko nāpsand thā. jab yaramiyāh nabī ne use rabb kī taraf se āgāh kiyā to us ne apne āp ko nabī ke sāmne past na kiyā. 13sidaqiyāh ko allāh kī qasam khā kar nabūkadnazzar bādshāh kā vafādār rahane kā vādā karnā paṛā. to bhī vah kuchh der ke bād sarkash ho gayā. vah aṛ gayā, aur us kā dil itnā saḵẖt ho gayā ki vah rabb isrāīl ke ḵẖudā kī taraf dubārā rujū karne ke liye tayyār nahīṅ thā.
14lekin yahūdāh ke rāhanumāoṅ, imāmoṅ aur qaum kī bevafāī bhī baṛhtī gaī. paṛosī qaumoṅ ke ghinaune rasm-o-rivāj apnā kar unhoṅ ne rabb ke ghar ko nāpāk kar diyā, go us ne yarūshalam meṅ yah imārat apne liye maḵẖsūs kī thī.
15bār bār rabb un ke bāpdādā kā ḵẖudā apne paiġambaroṅ ko un ke pās bhej kar unheṅ samjhātā rahā, kyūṅki use apnī qaum aur sukūnatgāh par taras ātā thā. 16lekin logoṅ ne allāh ke paiġambaroṅ kā mazāq uṛāyā, un ke paiġām haqīr jāne aur nabiyoṅ ko lān-tān kī. āḵẖirkār rabb kā ġazab un par nāzil huā, aur bachne kā koī rāstā na rahā. 17us ne bābal ke bādshāh nabūkadnazzar ko un ke ḵẖilāf bhejā to dushman yahūdāh ke javānoṅ ko talvār se qatl karne ke liye maqdis meṅ ghusne se bhī na jhijke. kisī par bhī raham na kiyā gayā, ḵẖwāh javān mard yā javān ḵẖātūn, ḵẖwāh buzurg yā umrrasīdā ho. rabb ne sab ko nabūkadnazzar ke havāle kar diyā. 18nabūkadnazzar ne allāh ke ghar kī tamām chīzeṅ chhīn līṅ, ḵẖwāh vah baṛī thīṅ yā chhoṭī. vah rabb ke ghar, bādshāh aur us ke ālā afsaroṅ ke tamām ḵẖazāne bhī bābal le gayā. 19faujiyoṅ ne rabb ke ghar aur tamām mahaloṅ ko jalā kar yarūshalam kī fasīl ko girā diyā. jitnī bhī qīmtī chīzeṅ rah gaī thīṅ vah tabāh huīṅ. 20aur jo talvār se bach gae the unheṅ bābal kā bādshāh qaid karke apne sāth bābal le gayā. vahāṅ unheṅ us kī aur us kī aulād kī ḵẖidmat karnī paṛī. un kī yah hālat us vaqt tak jārī rahī jab tak fārsī qaum kī saltanat shurū na huī.
21yūṅ vah kuchh pūrā huā jis kī peshgoī rabb ne yaramiyāh nabī kī mārifat kī thī, kyūṅki zamīn ko āḵẖirkār sabat kā vah ārām mil gayā jo bādshāhoṅ ne use nahīṅ diyā thā. jis tarah nabī ne kahā thā, ab zamīn 70 sāl tak tabāh aur vīrān rahī.
jilāvatanī se vāpsī
22fārs ke bādshāh ḵẖoras kī hukūmat ke pahale sāl meṅ rabb ne vah kuchh pūrā hone diyā jis kī peshgoī us ne yaramiyāh kī mārifat kī thī. us ne ḵẖoras ko zail kā elān karne kī taharīk dī. yah elān zabānī aur taharīrī taur par pūrī bādshāhī meṅ kiyā gayā.
23“fārs kā bādshāh ḵẖoras farmātā hai, rabb āsmān ke ḵẖudā ne duniyā ke tamām mamālik mere havāle kar die haiṅ. us ne mujhe yahūdāh ke shahar yarūshalam meṅ us ke liye ghar banāne kī zimmādārī dī hai. āp meṅ se jitne us kī qaum ke haiṅ yarūshalam ke liye ravānā ho jāeṅ. rabb āp kā ḵẖudā āp ke sāth ho.”