2 Tavārīḵẖ 4

qurbāngāh aur samundar nāmī hauz

¹sulemān ne pītal kī ek qurbāngāh bhī banvāī jis kī lambāī 30 fuṭ, chauṛāī 30 fuṭ aur ūṅchāī 15 fuṭ thī.

²is ke bād us ne pītal kā baṛā gol hauz ḍhalvāyā jis kā nām ‘samundar’ rakhā gayā. us kī ūṅchāī sāḍhe 7 fuṭ, us kā muṅh 15 fuṭ chauṛā aur us kā gherā taqrīban 45 fuṭ thā. ³hauz ke kināre ke nīche bailoṅ kī do qatāreṅ thīṅ. fī fuṭ taqrīban 6 bail the. bail aur hauz mil kar ḍhāle gae the. ⁴hauz ko bailoṅ ke 12 mujassamoṅ par rakhā gayā. tīn bailoṅ kā ruḵẖ shimāl kī taraf, tīn kā ruḵẖ maġrib kī taraf, tīn kā ruḵẖ junūb kī taraf aur tīn kā ruḵẖ mashriq kī taraf thā. un ke pichhle hisse hauz kī taraf the, aur hauz un ke kaṅdhoṅ par paṛā thā. ⁵hauz kā kinārā piyāle balki sosan ke phūl kī tarah bāhar kī taraf muṛā huā thā. us kī dīvār taqrīban tīn iṅch moṭī thī, aur hauz meṅ pānī ke taqrīban 66,000 liṭar samā jāte the.

⁶sulemān ne 10 bāsan ḍhalvāe. pāṅch ko rabb ke ghar ke dāeṅ hāth aur pāṅch ko us ke bāeṅ hāth khaṛā kiyā gayā. in bāsnoṅ meṅ gosht ke vah ṭukṛe dhoe jāte jinheṅ bhasm hone vālī qurbānī ke taur par jalānā thā. lekin ‘samundar’ nāmī hauz imāmoṅ ke istemāl ke liye thā. us meṅ vah nahāte the.

sone ke shamādān aur mezeṅ

⁷sulemān ne sone ke 10 shamādān muqarrarā tafsīlāt ke mutābiq banvā kar rabb ke ghar meṅ rakh die, pāṅch ko dāīṅ taraf aur pāṅch ko bāīṅ taraf. ⁸das mezeṅ bhī banā kar rabb ke ghar meṅ rakhī gaīṅ, pāṅch ko dāīṅ taraf aur pāṅch ko bāīṅ taraf. in chīzoṅ ke ilāvā sulemān ne chhiṛkāo ke sone ke 100 kaṭore banvāe.

sahan

⁹phir sulemān ne vah andrūnī sahan banvāyā jis meṅ sirf imāmoṅ ko dāḵẖil hone kī ijāzat thī. us ne baṛā sahan bhī us ke darvāzoṅ samet banvāyā. darvāzoṅ ke kivāṛoṅ par pītal chaṛhāyā gayā. ¹⁰‘samundar’ nāmī hauz ko sahan ke junūb-mashriq meṅ rakhā gayā.

us sāmān kī faharist jo hīrām ne tayyār kiyā

¹¹hīrām ne bāsan, belache aur chhiṛkāo ke kaṭore bhī banāe. yūṅ us ne allāh ke ghar meṅ vah sārā kām mukammal kiyā jis ke liye sulemān bādshāh ne use bulāyā thā. us ne zail kī chīzeṅ banāīṅ :

¹²do satūn,

satūnoṅ par lage piyālānumā bālāī hisse,

bālāī hissoṅ par lagī zanjīroṅ kā ḍizāin,

¹³zanjīroṅ ke ūpar lage anār (fī bālāī hissā 200 adad),

¹⁴hathgāṛiyāṅ,

in par ke pānī ke bāsan,

¹⁵hauz banām samundar,

ise uṭhāne vāle bail ke 12 mujassme,

¹⁶bālṭiyāṅ, belache, gosht ke kāṅṭe.

tamām sāmān jo hīrām-abī ne sulemān ke hukm par rabb ke ghar ke liye banāyā pītal se ḍhāl kar pālish kiyā gayā thā. ¹⁷bādshāh ne use vādī-e-yardan meṅ sukkāt aur zartān ke darmiyān ḍhalvāyā. vahāṅ ek fauṅḍrī thī jahāṅ hīrām ne gāre se sāṅche banā kar har chīz ḍhāl dī. ¹⁸is sāmān ke liye sulemān bādshāh ne itnā ziyādā pītal istemāl kiyā ki us kā kul vazan mālūm na ho sakā.

rabb ke ghar ke andar sone kā sāmān

¹⁹allāh ke ghar ke andar ke liye sulemān ne darj-e-zail sāmān banvāyā :

sone kī qurbāngāh,

sone kī vah mezeṅ jin par rabb ke liye maḵẖsūs roṭiyāṅ paṛī rahatī thīṅ,

²⁰ḵẖālis sone ke vah shamādān aur charāġ jin ko qavāid ke mutābiq muqaddastarīn kamre ke sāmne jalnā thā,

²¹ḵẖālis sone ke vah phūl jin se shamādān ārāstā the,

ḵẖālis sone ke charāġ aur battī ko bujhāne ke auzār,

²²charāġ ko katarne ke ḵẖālis sone ke auzār, chhiṛkāo ke ḵẖālis sone ke kaṭore aur piyāle,

jalte hue koile ke liye ḵẖālis sone ke bartan,

muqaddastarīn kamre aur baṛe hāl ke darvāze.