2 Tavārīḵẖ 8
sulemān kī muḵẖtalif muhimmāt
1rabb ke ghar aur shāhī mahal ko tāmīr karne meṅ 20 sāl sarf hue the. 2is ke bād sulemān ne vah ābādiyāṅ nae sire se tāmīr kīṅ jo hīrām ne use de dī thīṅ. in meṅ us ne isrāīliyoṅ ko basā diyā.
3ek faujī muhimm ke daurān us ne hamāt-zobāh par hamlā karke us par qabzā kar liyā. 4is ke ilāvā us ne hamāt ke ilāqe meṅ godām ke shahar banāe. registān ke shahar tadmūr meṅ us ne bahut sā tāmīrī kām karāyā 5-6 aur isī tarah bālāī aur nishebī bait-haurūn aur bālāt meṅ bhī. in shaharoṅ ke liye us ne fasīl aur kuṅḍe vāle darvāze banvāe. sulemān ne apne godāmoṅ ke liye aur apne rathoṅ aur ghoṛoṅ ko rakhne ke liye bhī shahar banvāe.
jo kuchh bhī vah yarūshalam, lubnān yā apnī saltanat kī kisī aur jagah banvānā chāhatā thā vah us ne banvāyā. 7-8 jin ādmiyoṅ kī sulemān ne begār par bhartī kī vah isrāīlī nahīṅ the balki hittī, amorī, farizzī, hivvī aur yabūsī yānī kan’ān ke pahale bāshindoṅ kī vah aulād the jo bāqī rah gae the. mulk par qabzā karte vaqt isrāīlī in qaumoṅ ko pūre taur par miṭā na sake, aur āj tak in kī aulād ko isrāīl ke liye begār meṅ kām karnā paṛtā hai. 9lekin sulemān ne isrāīliyoṅ ko aise kām karne par majbūr na kiyā balki vah us ke faujī aur rathoṅ ke faujiyoṅ ke afsar ban gae, aur unheṅ rathoṅ aur ghoṛoṅ par muqarrar kiyā gayā. 10sulemān ke tāmīrī kām par bhī 250 isrāīlī muqarrar the jo zilaoṅ par muqarrar afsaroṅ ke tābe the. yah log tāmīrī kām karne vāloṅ kī nigrānī karte the.
11firaaun kī beṭī yarūshalam ke purāne hisse banām ‘dāūd kā shahar’ se us mahal meṅ muntaqil huī jo sulemān ne us ke liye tāmīr kiyā thā, kyūṅki sulemān ne kahā, “lāzim hai ki merī ahaliyā isrāīl ke bādshāh dāūd ke mahal meṅ na rahe. chūṅki rabb kā sandūq yahāṅ se guzrā hai, is liye yah jagah muqaddas hai.”
rabb ke ghar meṅ ḵẖidmat kī tartīb
12us vaqt se sulemān rabb ko rabb ke ghar ke baṛe hāl ke sāmne kī qurbāngāh par bhasm hone vālī qurbāniyāṅ pesh kartā thā. 13jo kuchh bhī mūsā ne rozānā kī qurbāniyoṅ ke mutālliq farmāyā thā us ke mutābiq bādshāh qurbāniyāṅ chaṛhātā thā. in meṅ vah qurbāniyāṅ bhī shāmil thīṅ jo sabat ke din, nae chāṅd kī īd par aur sāl kī tīn baṛī īdoṅ par yānī fasah kī īd, haftoṅ kī īd aur jhoṁpaṛiyoṅ kī īd par pesh kī jātī thīṅ. 14sulemān ne imāmoṅ ke muḵẖtalif gurohoṅ ko vah zimmādāriyāṅ sauṁpīṅ jo us ke bāp dāūd ne muqarrar kī thīṅ. lāviyoṅ kī zimmādāriyāṅ bhī muqarrar kī gaīṅ. un kī ek zimmādārī rabb kī hamd-o-sanā karne meṅ parastāroṅ kī rāhanumāī karnī thī. nīz, unheṅ rozānā kī zarūriyāt ke mutābiq imāmoṅ kī madad karnī thī. rabb ke ghar ke darvāzoṅ kī paharādārī bhī lāviyoṅ kī ek ḵẖidmat thī. har darvāze par ek alag guroh kī ḍyūṭī lagāī gaī. yah bhī mard-e-ḵẖudā dāūd kī hidāyāt ke mutābiq huā. 15jo bhī hukm dāūd ne imāmoṅ, lāviyoṅ aur ḵẖazānoṅ ke mutālliq diyā thā vah unhoṅ ne pūrā kiyā.
16yūṅ sulemān ke tamām mansūbe rabb ke ghar kī bunyād rakhne se le kar us kī takmīl tak pūre hue.
17bād meṅ sulemān asyūn-jābar aur ailāt gayā. yah shahar adom ke sāhil par vāqe the. 18vahāṅ hīrām bādshāh ne apne jahāz aur tajaribākār mallāh bheje tāki vah sulemān ke ādmiyoṅ ke sāth mil kar jahāzoṅ ko chalāeṅ. unhoṅ ne ofīr tak safar kiyā aur vahāṅ se sulemān ke liye taqrīban 15,000 kilogrām sonā le kar āe.