2 Tavārīḵẖ 9

sabā kī malikā sulemān se miltī hai

¹sulemān kī shuharat sabā kī malikā tak pahuṅch gaī. jab us ne us ke bāre meṅ sunā to vah sulemān se milne ke liye ravānā huī tāki use mushkil paheliyāṅ pesh karke us kī dānishmandī jāṅch le. vah nihāyat baṛe qāfile ke sāth yarūshalam pahuṅchī jis ke ūṅṭ balsān, kasrat ke sone aur qīmtī javāhir se lade hue the.

malikā kī sulemān se mulāqāt huī to us ne us se vah tamām mushkil savālāt pūchhe jo us ke zahan meṅ the. ²sulemān us ke har savāl kā javāb de sakā. koī bhī bāt itnī pechīdā nahīṅ thī ki vah us kā matlab malikā ko batā na saktā. ³sabā kī malikā sulemān kī hikmat aur us ke nae mahal se bahut mut’assir huī. ⁴us ne bādshāh kī mezoṅ par ke muḵẖtalif khāne dekhe aur yah ki us ke afsar kis tartīb se us par biṭhāe jāte the. us ne bairoṅ kī ḵẖidmat, un kī shāndār vardiyoṅ aur sāqiyoṅ kī shāndār vardiyoṅ par bhī ġaur kiyā. jab us ne in bātoṅ ke ilāvā bhasm hone vālī vah qurbāniyāṅ bhī dekhīṅ jo sulemān rabb ke ghar meṅ chaṛhātā thā to malikā hakkā-bakkā rah gaī.

⁵vah bol uṭhī, “vāqaī, jo kuchh maiṅ ne apne mulk meṅ āp ke shāhakāroṅ aur hikmat ke bāre meṅ sunā thā vah durust hai. ⁶jab tak maiṅ ne ḵẖud ā kar yah sab kuchh apnī āṅkhoṅ se na dekhā mujhe yaqīn nahīṅ ātā thā. lekin haqīqat meṅ mujhe āp kī zabardast hikmat ke bāre meṅ ādhā bhī nahīṅ batāyā gayā thā. vah un riporṭoṅ se kahīṅ ziyādā hai jo mujh tak pahuṅchī thīṅ. ⁷āp ke log kitne mubārak haiṅ! āp ke afsar kitne mubārak haiṅ jo musalsal āp ke sāmne khaṛe rahate aur āp kī dānish bharī bāteṅ sunte haiṅ! ⁸rabb āp ke ḵẖudā kī tamjīd ho jis ne āp ko pasand karke apne taḵẖt par biṭhāyā tāki rabb apne ḵẖudā kī ḵẖātir hukūmat kareṅ. āp kā ḵẖudā isrāīl se muhabbat rakhtā hai, aur vah use abad tak qāim rakhnā chāhatā hai, isī liye us ne āp ko un kā bādshāh banā diyā hai tāki insāf aur rāstbāzī qāim rakheṅ.”

⁹phir malikā ne sulemān ko taqrīban 4,000 kilogrām sonā, bahut ziyādā balsān aur javāhir de die. pahale kabhī bhī utnā balsān isrāīl meṅ nahīṅ lāyā gayā thā jitnā us vaqt sabā kī malikā lāī.

¹⁰hīrām aur sulemān ke ādmī ofīr se na sirf sonā lāe balki unhoṅ ne qīmtī lakṛī aur javāhir bhī isrāīl tak pahuṅchāe. ¹¹jitnī qīmtī lakṛī un dinoṅ meṅ yahūdāh meṅ dar’āmad huī utnī pahale kabhī vahāṅ lāī nahīṅ gaī thī. is lakṛī se bādshāh ne rabb ke ghar aur apne mahal ke liye sīṛhiyāṅ banvāīṅ. yah mūsīqāroṅ ke sarod aur sitār banāne ke liye bhī istemāl huī.

¹²sulemān bādshāh ne apnī taraf se sabā kī malikā ko bahut se tuhfe die. yah un chīzoṅ se ziyādā the jo malikā apne mulk se us ke pās lāī thī. jo bhī malikā chāhatī thī yā us ne māṅgā vah use diyā gayā. phir vah apne naukar-chākroṅ aur afsaroṅ ke hamrāh apne vatan vāpas chalī gaī.

sulemān kī daulat aur shuharat

¹³jo sonā sulemān ko sālānā miltā thā us kā vazan taqrīban 23,000 kilogrām thā. ¹⁴is meṅ vah ṭaiks shāmil nahīṅ the jo use saudāgaroṅ, tājiroṅ, arab bādshāhoṅ aur zilaoṅ ke afsaroṅ se milte the. yah use sonā aur chāṅdī dete the.

^15-16 sulemān bādshāh ne 200 baṛī aur 300 chhoṭī ḍhāleṅ banvāīṅ. un par sonā maṅḍhā gayā. har baṛī ḍhāl ke liye taqrīban 7 kilogrām sonā istemāl huā aur har chhoṭī ḍhāl ke liye sāḍhe 3 kilogrām. sulemān ne unheṅ ‘lubnān kā jaṅgal’ nāmī mahal meṅ mahfūz rakhā.

¹⁷in ke ilāvā bādshāh ne hāthīdāṅt se ārāstā ek baṛā taḵẖt banvāyā jis par ḵẖālis sonā chaṛhāyā gayā. ^18-19 us ke har bāzū ke sāth sherbabar kā mujassmā thā. taḵẖt kuchh ūṅchā thā, aur bādshāh chhah pāe vālī sīṛhī par chaṛh kar us par baiṭhtā thā. dāīṅ aur bāīṅ taraf har pāe par sherbabar kā mujassmā thā. pāoṅ ke liye sone kī chaukī banāī gaī thī. is qism kā taḵẖt kisī aur saltanat meṅ nahīṅ pāyā jātā thā.

²⁰sulemān ke tamām piyāle sone ke the, balki ‘lubnān kā jaṅgal’ nāmī mahal meṅ tamām bartan ḵẖālis sone ke the. koī bhī chīz chāṅdī kī nahīṅ thī, kyūṅki sulemān ke zamāne meṅ chāṅdī kī koī qadar nahīṅ thī. ²¹bādshāh ke apne baharī jahāz the jo hīrām ke bandoṅ ke sāth mil kar muḵẖtalif jagahoṅ par jāte the. har tīn sāl ke bād vah sone-chāṅdī, hāthīdāṅt, bandaroṅ aur moroṅ se lade hue vāpas āte the.

²²sulemān kī daulat aur hikmat duniyā ke tamām bādshāhoṅ se kahīṅ ziyādā thī. ²³duniyā ke tamām bādshāh us se milne kī koshish karte rahe tāki vah hikmat sun leṅ jo allāh ne us ke dil meṅ ḍāl dī thī. ²⁴sāl-ba-sāl jo bhī sulemān ke darbār meṅ ātā vah koī na koī tuhfā lātā. yūṅ use sone-chāṅdī ke bartan, qīmtī libās, hathiyār, balsān, ghoṛe aur ḵẖacchar milte rahe.

²⁵ghoṛoṅ aur rathoṅ ko rakhne ke liye sulemān ke 4,000 thān the. us ke 12,000 ghoṛe the. kuchh us ne rathoṅ ke liye maḵẖsūs kie gae shaharoṅ meṅ aur kuchh yarūshalam meṅ apne pās rakhe. ²⁶sulemān un tamām bādshāhoṅ kā hukmarān thā jo daryā-e-furāt se le kar filistiyoṅ ke mulk kī misrī sarhadd tak hukūmat karte the. ²⁷bādshāh kī sargarmiyoṅ ke bāis chāṅdī patthar jaisī ām ho gaī aur deodār kī qīmtī lakṛī maġrib ke nishebī pahāṛī ilāqe kī anjīr-tūt kī sastī lakṛī jaisī ām ho gaī. ²⁸bādshāh ke ghoṛe misr aur dīgar kaī mulkoṅ se dar’āmad hote the.

sulemān kī maut

²⁹sulemān kī zindagī ke bāre meṅ mazīd bāteṅ shurū se le kar āḵẖir tak ‘nātan nabī kī tārīḵẖ,’ sailā ke rahane vāle nabī aḵẖiyāh kī kitāb ‘aḵẖiyāh kī nubuvvat’ aur yarubiām bin nabāt se mutālliq kitāb ‘iddū ġaibbīn kī royāeṅ’ meṅ darj haiṅ.

³⁰sulemān 40 sāl ke daurān pūre isrāīl par hukūmat kartā rahā. us kā dār-ul-hakūmat yarūshalam thā. ³¹jab vah mar kar apne bāpdādā se jā milā to use yarūshalam ke us hisse meṅ dafan kiyā gayā jo ‘dāūd kā shahar’ kahalātā hai. phir us kā beṭā rahubiām taḵẖtnashīn huā.