2 Salātīn 10

yāhū aḵẖiyab kī aulād ko halāk kartā hai

¹sāmriyā meṅ aḵẖiyab ke 70 beṭe the. ab yāhū ne ḵẖat likh kar sāmriyā bhej die. yazrael ke afsaroṅ, shahar ke buzurgoṅ aur aḵẖiyab ke beṭoṅ ke sarparastoṅ ko yah ḵẖat mil gae, aur un meṅ zail kī ḵẖabar likhī thī,

²“āp ke mālik ke beṭe āp ke pās haiṅ. āp qil’āband shahar meṅ rahate haiṅ, aur āp ke pās hathiyār, rath aur ghoṛe bhī haiṅ. is liye maiṅ āp ko chaileṅj detā hūṅ ki yah ḵẖat paṛhte hī ³apne mālik ke sab se acchhe aur lāiq beṭe ko chun kar use us ke bāp ke taḵẖt par biṭhā deṅ. phir apne mālik ke ḵẖāndān ke liye laṛeṅ!”

⁴lekin sāmriyā ke buzurg behad saham gae aur āpas meṅ kahane lage, “agar do bādshāh us kā muqāblā na kar sake to ham kyā kar sakte haiṅ?” ⁵is liye mahal ke iṅchārj, sāmriyā par muqarrar afsar, shahar ke buzurgoṅ aur aḵẖiyab ke beṭoṅ ke sarparastoṅ ne yāhū ko paiġām bhejā, “ham āp ke ḵẖādim haiṅ aur jo kuchh āp kaheṅge ham karne ke liye tayyār haiṅ. ham kisī ko bādshāh muqarrar nahīṅ kareṅge. jo kuchh āp munāsib samajhte haiṅ vah kareṅ.”

⁶yah paṛh kar yāhū ne ek aur ḵẖat likh kar sāmriyā bhejā. us meṅ likhā thā, “agar āp vāqaī mere sāth haiṅ aur mere tābe rahanā chāhate haiṅ to apne mālik ke beṭoṅ ke saroṅ ko kāṭ kar kal is vaqt tak yazrael meṅ mere pās le āeṅ.” kyūṅki aḵẖiyab ke 70 beṭe sāmriyā ke baṛoṅ ke pās rah kar parvarish pā rahe the. ⁷jab ḵẖat un ke pās pahuṅch gayā to in ādmiyoṅ ne 70 ke 70 shahazādoṅ ko zabah kar diyā aur un ke saroṅ ko ṭokroṅ meṅ rakh kar yazrael meṅ yāhū ke pās bhej diyā.

⁸ek qāsid ne yāhū ke pās ā kar ittilā dī, “vah bādshāh ke beṭoṅ ke sar le kar āe haiṅ.” tab yāhū ne hukm diyā, “shahar ke darvāze par un ke do ḍher lagā do aur unheṅ subah tak vahīṅ rahane do.” ⁹agle din yāhū subah ke vaqt niklā aur darvāze ke pās khaṛe ho kar logoṅ se muḵẖātib huā, “yūrām kī maut ke nāte se āp beilzām haiṅ. maiṅ hī ne apne mālik ke ḵẖilāf mansūbe bāṅdh kar use mār ḍālā. lekin kis ne in tamām beṭoṅ kā sar qalam kar diyā? ¹⁰chunāṅche āj jān leṅ ki jo kuchh bhī rabb ne aḵẖiyab aur us ke ḵẖāndān ke bāre meṅ farmāyā hai vah pūrā ho jāegā. jis kā elān rabb ne apne ḵẖādim ilyās kī mārifat kiyā hai vah us ne kar liyā hai.” ¹¹is ke bād yāhū ne yazrael meṅ rahane vāle aḵẖiyab ke bāqī tamām rishtedāroṅ, baṛe afsaroṅ, qarībī dostoṅ aur pujāriyoṅ ko halāk kar diyā. ek bhī na bachā.

¹²phir vah sāmriyā ke liye ravānā huā. rāste meṅ jab bait-iqad-roīm ke qarīb pahuṅch gayā ¹³to us kī mulāqāt yahūdāh ke bādshāh aḵẖaziyāh ke chand ek rishtedāroṅ se huī. yāhū ne pūchhā, “āp kaun haiṅ?” unhoṅ ne javāb diyā, “ham aḵẖaziyāh ke rishtedār haiṅ aur sāmriyā kā safar kar rahe haiṅ. vahāṅ ham bādshāh aur malikā ke beṭoṅ se milnā chāhate haiṅ.” ¹⁴tab yāhū ne hukm diyā, “unheṅ zindā pakṛo!” unhoṅ ne unheṅ zindā pakaṛ kar bait-iqad ke hauz ke pās mār ḍālā. 42 ādmiyoṅ meṅ se ek bhī na bachā.

¹⁵us jagah ko chhoṛ kar yāhū āge niklā. chalte chalte us kī mulāqāt yūndab bin raikāb se huī jo us se milne ā rahā thā. yāhū ne salām karke kahā, “kyā āp kā dil mere bāre meṅ muḵẖlis hai jaisā ki merā dil āp ke bāre meṅ hai?” yūndab ne javāb diyā, “jī hāṅ.” yāhū bolā, “agar aisā hai, to mere sāth hāth milāeṅ.” yūndab ne us ke sāth hāth milāyā to yāhū ne use apne rath par savār hone diyā. ¹⁶phir yāhū ne kahā, “āeṅ mere sāth aur merī rabb ke liye jidd-o-jahd dekheṅ.” chunāṅche yūndab yāhū ke sāth sāmriyā chalā gayā.

¹⁷sāmriyā pahuṅch kar yāhū ne aḵẖiyab ke ḵẖāndān ke jitne afrād ab tak bach gae the halāk kar die. jis tarah rabb ne ilyās ko farmāyā thā usī tarah aḵẖiyab kā pūrā gharānā miṭ gayā.

yāhū bāl ke tamām pujāriyoṅ ko qatl kartā hai

¹⁸is ke bād yāhū ne tamām logoṅ ko jamā karke elān kiyā, “aḵẖiyab ne bāl devtā kī parastish thoṛī kī hai. maiṅ kahīṅ ziyādā us kī pūjā karūṅgā! ¹⁹ab jā kar bāl ke tamām nabiyoṅ, ḵẖidamataguzāroṅ aur pujāriyoṅ ko bulā lāeṅ. ḵẖayāl kareṅ ki ek bhī dūr na rahe, kyūṅki maiṅ bāl ko baṛī qurbānī pesh karūṅgā. jo bhī āne se inkār kare use sazā-e-maut dī jāegī.”

is tarah yāhū ne bāl ke ḵẖidamataguzāroṅ ke liye jāl bichhā diyā tāki vah us meṅ phaṅs kar halāk ho jāeṅ. ^20-21 us ne pūre isrāīl meṅ qāsid bhej kar elān kiyā, “bāl devtā ke liye muqaddas īd manāeṅ!” chunāṅche bāl ke tamām pujārī āe, aur ek bhī ijtimā se dūr na rahā. itne jamā hue ki bāl kā mandir ek sire se dūsre sire tak bhar gayā.

²²yāhū ne īd ke kapṛoṅ ke iṅchārj ko hukm diyā, “bāl ke tamām pujāriyoṅ ko īd ke libās de denā.” chunāṅche sab ko libās die gae. ²³phir yāhū aur yūndab bin raikāb bāl ke mandir meṅ dāḵẖil hue, aur yāhū ne bāl ke ḵẖidamataguzāroṅ se kahā, “dhyān deṅ ki yahāṅ āp ke sāth rabb kā koī ḵẖādim maujūd na ho. sirf bāl ke pujārī hone chāhieṅ.”

²⁴donoṅ ādmī sāmne gae tāki zabah kī aur bhasm hone vālī qurbāniyāṅ pesh kareṅ. itne meṅ yāhū ke 80 ādmī bāhar mandir ke ird-gird khaṛe ho gae. yāhū ne unheṅ hukm de kar kahā thā, “ḵẖabardār! jo pūjā karne vāloṅ meṅ se kisī ko bachne de use sazā-e-maut dī jāegī.”

²⁵jūṅ hī yāhū bhasm hone vālī qurbānī ko chaṛhāne se fāriġ huā to us ne apne muhāfizoṅ aur afsaroṅ ko hukm diyā, “andar jā kar sab ko mār denā. ek bhī bachne na pāe.” vah dāḵẖil hue aur apnī talvāroṅ ko khaiṅch kar sab ko mār ḍālā. lāshoṅ ko unhoṅ ne bāhar phaiṅk diyā. phir vah mandir ke sab se andar vāle kamre meṅ gae ²⁶jahāṅ but thā. use unhoṅ ne nikāl kar jalā diyā ²⁷aur bāl kā satūn bhī ṭukṛe ṭukṛe kar diyā. bāl kā pūrā mandir ḍhā diyā gayā, aur vah jagah bait-ul-ḵẖalā ban gaī. āj tak vah is ke liye istemāl hotā hai.

yāhū kī hukūmat

²⁸is tarah yāhū ne isrāīl meṅ bāl devtā kī pūjā ḵẖatm kar dī. ²⁹to bhī vah yarubiām bin nabāt ke un gunāhoṅ se bāz na āyā jo karne par yarubiām ne isrāīl ko uksāyā thā. bait-el aur dān meṅ qāim sone ke bachhṛoṅ kī pūjā ḵẖatm na huī.

³⁰ek din rabb ne yāhū se kahā, “jo kuchh mujhe pasand hai use tū ne acchhī tarah sar’anjām diyā hai, kyūṅki tū ne aḵẖiyab ke gharāne ke sāth sab kuchh kiyā hai jo merī marzī thī. is vajah se terī aulād chauthī pusht tak isrāīl par hukūmat kartī rahegī.” ³¹lekin yāhū ne pūre dil se rabb isrāīl ke ḵẖudā kī sharīat ke mutābiq zindagī na guzārī. vah un gunāhoṅ se bāz āne ke liye tayyār nahīṅ thā jo karne par yarubiām ne isrāīl ko uksāyā thā.

³²yāhū kī hukūmat ke daurān rabb isrāīl kā ilāqā chhoṭā karne lagā. shām ke bādshāh hazāel ne isrāīl ke us pūre ilāqe par qabzā kar liyā ³³jo daryā-e-yardan ke mashriq meṅ thā. jad, rūbin aur manassī kā ilāqā jiliād basan se le kar daryā-e-arnon par vāqe aroīr tak shām ke bādshāh ke hāth meṅ ā gayā.

³⁴bāqī jo kuchh yāhū kī hukūmat ke daurān huā, jo us ne kiyā aur jo kāmyābiyāṅ use hāsil huīṅ vah ‘shāhān-e-isrāīl kī tārīḵẖ’ kī kitāb meṅ bayān kiyā gayā hai. ^35-36 vah 28 sāl sāmriyā meṅ bādshāh rahā. vahāṅ vah dafan bhī huā. jab vah mar kar apne bāpdādā se jā milā to us kā beṭā yahūāḵẖaz taḵẖtnashīn huā.