2 Salātīn 11

yahūdāh meṅ ataliyāh kī zālimānā hukūmat

¹jab aḵẖaziyāh kī māṅ ataliyāh ko mālūm huā ki merā beṭā mar gayā hai to vah aḵẖaziyāh kī tamām aulād ko qatl karne lagī. ²lekin aḵẖaziyāh kī sagī bahan yahūsabā ne aḵẖaziyāh ke chhoṭe beṭe yūās ko chupke se un shahazādoṅ meṅ se nikāl liyā jinheṅ qatl karnā thā aur use us kī dāyā ke sāth ek sṭor meṅ chhupā diyā jis meṅ bistar vaġairā mahfūz rakhe jāte the. is tarah vah bach gayā. ³bād meṅ yūās ko rabb ke ghar meṅ muntaqil kiyā gayā jahāṅ vah us ke sāth un chhah sāloṅ ke daurān chhupā rahā jab ataliyāh malikā thī.

ataliyāh kā anjām aur yūās bādshāh ban jātā hai

⁴ataliyāh kī hukūmat ke sātveṅ sāl meṅ yahoyadā imām ne sau sau sipāhiyoṅ par muqarrar afsaroṅ, kārī nāmī dastoṅ aur shāhī muhāfizoṅ ko rabb ke ghar meṅ bulā liyā. vahāṅ us ne qasam khilā kar un se ahd bāṅdhā. phir us ne bādshāh ke beṭe yūās ko pesh karke ⁵unheṅ hidāyat kī, “agle sabat ke din āp meṅ se jitne ḍyūṭī par āeṅge vah tīn hissoṅ meṅ taqsīm ho jāeṅ. ek hissā shāhī mahal par paharā de, ⁶dūsrā sūr nāmī darvāze par aur tīsrā shāhī muhāfizoṅ ke pīchhe ke darvāze par. yūṅ āp rabb ke ghar kī hifāzat kareṅge. ⁷dūsre do guroh jo sabat ke din ḍyūṭī nahīṅ karte unheṅ rabb ke ghar meṅ ā kar yūās bādshāh kī paharādārī karnī hai. ⁸vah us ke ird-gird dāirā banā kar apne hathiyāroṅ ko pakṛe rakheṅ aur jahāṅ bhī vah jāe use ghere rakheṅ. jo bhī is dāire meṅ ghusne kī koshish kare use mār ḍālnā.”

⁹so sau sipāhiyoṅ par muqarrar afsaroṅ ne aisā hī kiyā. agle sabat ke din vah sab apne faujiyoṅ samet yahoyadā imām ke pās āe. vah bhī āe jo ḍyūṭī par the aur vah bhī jin kī ab chhuṭṭī thī. ¹⁰imām ne afsaroṅ ko dāūd bādshāh ke vah neze aur ḍhāleṅ dīṅ jo ab tak rabb ke ghar meṅ mahfūz rakhī huī thīṅ. ¹¹phir muhāfiz hathiyāroṅ ko hāth meṅ pakṛe bādshāh ke gird khaṛe ho gae. qurbāngāh aur rabb ke ghar ke darmiyān un kā dāirā rabb ke ghar kī junūbī dīvār se le kar us kī shimālī dīvār tak phailā huā thā. ¹²phir yahoyadā bādshāh ke beṭe yūās ko bāhar lāyā aur us ke sar par tāj rakh kar use qavānīn kī kitāb de dī. yūṅ yūās ko bādshāh banā diyā gayā. unhoṅ ne use masah karke tāliyāṅ bajāīṅ aur buland āvāz se nārā lagāne lage, “bādshāh zindābād!”

¹³jab muhāfizoṅ aur bāqī logoṅ kā shor ataliyāh tak pahuṅchā to vah rabb ke ghar ke sahan meṅ un ke pās āī. ¹⁴vahāṅ pahuṅch kar vah kyā dekhtī hai ki nayā bādshāh us satūn ke pās khaṛā hai jahāṅ bādshāh rivāj ke mutābiq khaṛā hotā hai, aur vah afsaroṅ aur turam bajāne vāloṅ se ghirā huā hai. tamām ummat bhī sāth khaṛī turam bajā bajā kar ḵẖushī manā rahī hai. ataliyāh raṅjish ke māre apne kapṛe phāṛ kar chīḵẖ uṭhī, “ġaddārī, ġaddārī!”

¹⁵yahoyadā imām ne sau sau faujiyoṅ par muqarrar un afsaroṅ ko bulāyā jin ke sapurd fauj kī gaī thī aur unheṅ hukm diyā, “use bāhar le jāeṅ, kyūṅki munāsib nahīṅ ki use rabb ke ghar ke pās mārā jāe. aur jo bhī us ke pīchhe āe use talvār se mār denā.”

¹⁶vah ataliyāh ko pakaṛ kar us rāste par le gae jis par chalte hue ghoṛe mahal ke pās pahuṅchte haiṅ. vahāṅ use mār diyā gayā. ¹⁷phir yahoyadā ne bādshāh aur qaum ke sāth mil kar rabb se ahd bāṅdh kar vādā kiyā ki ham rabb kī qaum raheṅge. is ke ilāvā bādshāh ne yahoyadā kī mārifat qaum se bhī ahd bāṅdhā. ¹⁸is ke bād ummat ke tamām log bāl ke mandir par ṭūṭ paṛe aur use ḍhā diyā. us kī qurbānagāhoṅ aur butoṅ ko ṭukṛe ṭukṛe karke unhoṅ ne bāl ke pujārī mattān ko qurbānagāhoṅ ke sāmne hī mār ḍālā. rabb ke ghar par paharedār khaṛe karne ke bād ¹⁹yahoyadā sau sau faujiyoṅ par muqarrar afsaroṅ, kārī nāmī dastoṅ, mahal ke muhāfizoṅ aur bāqī pūrī ummat ke hamrāh julūs nikāl kar bādshāh ko rabb ke ghar se mahal meṅ le gayā. vah muhāfizoṅ ke darvāze se ho kar dāḵẖil hue. bādshāh shāhī taḵẖt par baiṭh gayā, ²⁰aur tamām ummat ḵẖushī manātī rahī. yūṅ yarūshalam shahar ko sukūn milā, kyūṅki ataliyāh ko mahal ke pās talvār se mār diyā gayā thā.

yahūdāh kā bādshāh yūās

²¹yūās sāt sāl kā thā jab taḵẖtnashīn huā.