2 Salātīn 12
1vah isrāīl ke bādshāh yāhū kī hukūmat ke sātveṅ sāl meṅ yahūdāh kā bādshāh banā, aur yarūshalam meṅ us kī hukūmat kā daurāniyā 40 sāl thā. us kī māṅ zibiyāh bair-sabā kī rahane vālī thī. 2jab tak yahoyadā us kī rāhanumāī kartā thā yūās vah kuchh kartā rahā jo rabb ko pasand thā. 3to bhī ūṅchī jagahoṅ ke mandir dūr na kie gae. avām māmūl ke mutābiq vahāṅ apnī qurbāniyāṅ pesh karte aur baḵẖūr jalāte rahe.
yūās rabb ke ghar kī marammat karvātā hai
4ek din yūās ne imāmoṅ ko hukm diyā, “rabb ke liye maḵẖsūs jitne bhī paise rabb ke ghar meṅ lāe jāte haiṅ un sab ko jamā kareṅ, chāhe vah mardumashumārī ke ṭaiks [a] dekhie ḵẖurūj 30:11-16 yā kisī mannat ke zimn meṅ die gae hoṅ, chāhe razākārānā taur par adā kie gae hoṅ. 5yah tamām paise imāmoṅ ke sapurd kie jāeṅ. in se āp ko jahāṅ bhī zarūrat hai rabb ke ghar kī darāṛoṅ kī marammat karvānī hai.” 6lekin yūās kī hukūmat ke 23veṅ sāl meṅ us ne dekhā ki ab tak rabb ke ghar kī darāṛoṅ kī marammat nahīṅ huī. 7tab us ne yahoyadā aur bāqī imāmoṅ ko bulā kar pūchhā, “āp rabb ke ghar kī marammat kyūṅ nahīṅ karā rahe? ab se āp ko in paisoṅ se āp kī apnī zarūriyāt pūrī karne kī ijāzat nahīṅ balki tamām paise rabb ke ghar kī marammat ke liye istemāl karne haiṅ.”
8imām mān gae ki ab se ham logoṅ se hadiyā nahīṅ leṅge aur ki is ke badle hameṅ rabb ke ghar kī marammat nahīṅ karvānī paṛegī. 9phir yahoyadā imām ne ek sandūq le kar us ke ḍhakne meṅ sūrāḵẖ banā diyā. is sandūq ko us ne qurbāngāh ke pās rakh diyā, us darvāze ke dahanī taraf jis meṅ se parastār rabb ke ghar ke sahan meṅ dāḵẖil hote the. jab log apne hadiyājāt rabb ke ghar meṅ pesh karte to darvāze kī paharādārī karne vāle imām tamām paisoṅ ko sandūq meṅ ḍāl dete. 10jab kabhī patā chaltā ki sandūq bhar gayā hai to bādshāh kā mīramunshī aur imām-e-āzam āte aur tamām paise gin kar thailiyoṅ meṅ ḍāl dete the. 11phir yah gine hue paise un ṭhekedāroṅ ko die jāte jin ke sapurd rabb ke ghar kī marammat kā kām kiyā gayā thā. in paisoṅ se vah marammat karne vāle kārīgaroṅ kī ujrat adā karte the. in meṅ baṛhaī, imārat par kām karne vāle, 12rāj aur patthar tarāshne vāle shāmil the. is ke ilāvā unhoṅ ne yah paise darāṛoṅ kī marammat ke liye darkār lakṛī aur tarāshe hue pattharoṅ ke liye bhī istemāl kie. bāqī jitne aḵẖrājāt rabb ke ghar ko bahāl karne ke liye zarūrī the vah sab in paisoṅ se pūre kie gae. 13lekin in hadiyājāt se sone yā chāṅdī kī chīzeṅ na banvāī gaīṅ, na chāṅdī ke bāsan, battī katarne ke auzār, chhiṛkāo ke kaṭore yā turam. 14yah sirf aur sirf ṭhekedāroṅ ko die gae tāki vah rabb ke ghar kī marammat kar sakeṅ. 15ṭhekedāroṅ se hisāb na liyā gayā jab unheṅ kārīgaroṅ ko paise dene the, kyūṅki vah qābil-e-etimād the.
16mahaz vah paise jo qusūr aur gunāh kī qurbāniyoṅ ke liye milte the rabb ke ghar kī marammat ke liye istemāl na hue. vah imāmoṅ kā hissā rahe.
ḵẖarāj milne par hazāel yarūshalam ko chhoṛtā hai
17un dinoṅ meṅ shām ke bādshāh hazāel ne jāt par hamlā karke us par qabzā kar liyā. is ke bād vah muṛ kar yarūshalam kī taraf baṛhne lagā tāki us par bhī hamlā kare. 18yah dekh kar yahūdāh ke bādshāh yūās ne un tamām hadiyājāt ko ikaṭṭhā kiyā jo us ke bāpdādā yahūsafat, yahūrām aur aḵẖaziyāh ne rabb ke ghar ke liye maḵẖsūs kie the. us ne vah bhī jamā kie jo us ne ḵẖud rabb ke ghar ke liye maḵẖsūs kie the. yah chīzeṅ us sāre sone ke sāth milā kar jo rabb ke ghar aur shāhī mahal ke ḵẖazānoṅ meṅ thā us ne sab kuchh hazāel ko bhej diyā. tab hazāel yarūshalam ko chhoṛ kar chalā gayā.
yūās kī maut
19bāqī jo kuchh yūās kī hukūmat ke daurān huā aur jo kuchh us ne kiyā us kā zikr ‘shāhān-e-yahūdāh’ kī kitāb meṅ kiyā gayā hai. 20ek din us ke afsaroṅ ne us ke ḵẖilāf sāzish karke use qatl kar diyā jab vah bait-millo ke pās us rāste par thā jo sillā kī taraf utar jātā thā. 21qātiloṅ ke nām yūzbad bin sim’āt aur yahūzabad bin shūmīr the. yūās ko yarūshalam ke us hisse meṅ jo ‘dāūd kā shahar’ kahalātā hai ḵẖāndānī qabr meṅ dafnāyā gayā. phir us kā beṭā amasiyāh taḵẖtnashīn huā.