2 Salātīn 13

isrāīl kā bādshāh yahūāḵẖaz

¹yahūāḵẖaz bin yāhū yahūdāh ke bādshāh yūās bin aḵẖaziyāh kī hukūmat ke 23veṅ sāl meṅ isrāīl kā bādshāh banā. us kī hukūmat kā daurāniyā 17 sāl thā, aur us kā dār-ul-hakūmat sāmriyā rahā. ²us kā chāl-chalan rabb ko nāpsand thā, kyūṅki vah bhī yarubiām bin nabāt ke bure namūne par chaltā rahā. us ne vah gunāh jārī rakhe jo karne par yarubiām ne isrāīl ko uksāyā thā. us butparastī se vah kabhī bāz na āyā. ³is vajah se rabb isrāīl se bahut nārāz huā, aur vah shām ke bādshāh hazāel aur us ke beṭe bin-hadad ke vasīle se unheṅ bār bār dabātā rahā.

⁴lekin phir yahūāḵẖaz ne rabb kā ġazab ṭhaṅḍā kiyā, aur rabb ne us kī minnateṅ sunīṅ, kyūṅki use mālūm thā ki shām kā bādshāh isrāīl par kitnā zulm kar rahā hai. ⁵rabb ne kisī ko bhej diyā jis ne unheṅ shām ke zulm se āzād karvāyā. is ke bād vah pahale kī tarah sukūn ke sāth apne gharoṅ meṅ rah sakte the. ⁶to bhī vah un gunāhoṅ se bāz na āe jo karne par yarubiām ne unheṅ uksāyā thā balki un kī yah butparastī jārī rahī. yasīrat devī kā but bhī sāmriyā se haṭāyā na gayā.

⁷āḵẖir meṅ yahūāḵẖaz ke sirf 50 ghuṛsavār, 10 rath aur 10,000 piyādā sipāhī rah gae. fauj kā bāqī hissā shām ke bādshāh ne tabāh kar diyā thā. us ne isrāīlī faujiyoṅ ko kuchal kar yūṅ uṛā diyā thā jis tarah dhūl anāj ko gāhate vaqt uṛ jātī hai.

⁸bāqī jo kuchh yahūāḵẖaz kī hukūmat ke daurān huā, jo kuchh us ne kiyā aur jo kāmyābiyāṅ use hāsil huīṅ vah ‘shāhān-e-isrāīl kī tārīḵẖ’ kī kitāb meṅ bayān kī gaī haiṅ. ⁹jab vah mar kar apne bāpdādā se jā milā to use sāmriyā meṅ dafnāyā gayā. phir us kā beṭā yahūās taḵẖtnashīn huā.

isrāīl kā bādshāh yahūās

¹⁰yahūās bin yahūāḵẖaz yahūdāh ke bādshāh yūās kī hukūmat ke 37veṅ sāl meṅ isrāīl kā bādshāh banā. ¹¹yahūās kā chāl-chalan rabb ko nāpsand thā. vah un gunāhoṅ se bāz na āyā jo karne par yarubiām bin nabāt ne isrāīl ko uksāyā thā balki yah butparastī jārī rahī. ¹²bāqī jo kuchh yahūās kī hukūmat ke daurān huā, jo kuchh us ne kiyā aur jo kāmyābiyāṅ use hāsil huīṅ vah ‘shāhān-e-isrāīl kī tārīḵẖ’ kī kitāb meṅ darj haiṅ. us meṅ us kī yahūdāh ke bādshāh amasiyāh ke sāth jaṅg kā zikr bhī hai.

¹³jab yahūās mar kar apne bāpdādā se jā milā to use sāmriyā meṅ shāhī qabr meṅ dafnāyā gayā. phir yarubiām duvum taḵẖt par baiṭh gayā.

bistar-e-marg par yahūās kī ilīshā se mulāqāt

¹⁴yahūās ke daur-e-hukūmat meṅ ilīshā shadīd bīmār ho gayā. jab vah marne ko thā to isrāīl kā bādshāh yahūās us se milne āyā. us ke ūpar jhuk kar vah ḵẖūb ro paṛā aur chillāyā, “hāy, mere bāp, mere bāp. isrāīl ke rath aur us ke ghoṛe!” ¹⁵ilīshā ne use hukm diyā, “ek kamān aur kuchh tīr le āeṅ.” bādshāh kamān aur tīr ilīshā ke pās le āyā. ¹⁶phir ilīshā bolā, “kamān ko pakṛeṅ.” jab bādshāh ne kamān ko pakaṛ liyā to ilīshā ne apne hāth us ke hāthoṅ par rakh die. ¹⁷phir us ne hukm diyā, “mashriqī khiṛkī ko khol deṅ.” bādshāh ne use khol diyā. ilīshā ne kahā, “tīr chalāeṅ!” bādshāh ne tīr chalāyā. ilīshā pukārā, “yah rabb kā fatah dilāne vālā tīr hai, shām par fatah kā tīr! āp afīq ke pās shām kī fauj ko mukammal taur par tabāh kar deṅge.”

¹⁸phir us ne bādshāh ko hukm diyā, “ab bāqī tīroṅ ko pakṛeṅ.” bādshāh ne unheṅ pakaṛ liyā. phir ilīshā bolā, “in ko zamīn par paṭaḵẖ deṅ.” bādshāh ne tīn martabā tīroṅ ko zamīn par paṭaḵẖ diyā aur phir ruk gayā. ¹⁹yah dekh kar mard-e-ḵẖudā ġusse ho gayā aur bolā, “āp ko tīroṅ ko pāṅch yā chhah martabā zamīn par paṭaḵẖnā chāhie thā. agar aisā karte to shām kī fauj ko shikast de kar mukammal taur par tabāh kar dete. lekin ab āp use sirf tīn martabā shikast deṅge.”

²⁰thoṛī der ke bād ilīshā faut huā aur use dafan kiyā gayā. un dinoṅ meṅ moābī luṭere har sāl mausam-e-bahār ke daurān mulk meṅ ghus āte the. ²¹ek din kisī kā janāzā ho rahā thā to achānak yah luṭere nazar āe. mātam karne vāle lāsh ko qarīb kī ilīshā kī qabr meṅ phaiṅk kar bhāg gae. lekin jūṅ hī lāsh ilīshā kī haḍḍiyoṅ se ṭakrāī us meṅ jān ā gaī aur vah ādmī khaṛā ho gayā.

ilīshā ke āḵẖirī alfāz pūre ho jāte haiṅ

²²yahūāḵẖaz ke jīte jī shām kā bādshāh hazāel isrāīl ko dabātā rahā. ²³to bhī rabb ko apnī qaum par taras āyā. us ne un par raham kiyā, kyūṅki use vah ahd yād rahā jo us ne ibrāhīm, ishāq aur yāqūb se bāṅdhā thā. āj tak vah unheṅ tabāh karne yā apne huzūr se ḵẖārij karne ke liye tayyār nahīṅ huā.

²⁴jab shām kā bādshāh hazāel faut huā to us kā beṭā bin-hadad taḵẖtnashīn huā. ²⁵tab yahūās bin yahūāḵẖaz ne bin-hadad se vah isrāīlī shahar dubārā chhīn liye jin par bin-hadad ke bāp hazāel ne qabzā kar liyā thā. tīn bār yahūās ne bin-hadad ko shikast de kar isrāīlī shahar vāpas le liye.