2 Salātīn 14
yahūdāh kā bādshāh amasiyāh
1amasiyāh bin yūās isrāīl ke bādshāh yahūās bin yahūāḵẖaz ke dūsre sāl meṅ yahūdāh kā bādshāh banā. 2us vaqt vah 25 sāl kā thā. vah yarūshalam meṅ rah kar 29 sāl hukūmat kartā rahā. us kī māṅ yahūaddān yarūshalam kī rahane vālī thī. 3jo kuchh amasiyāh ne kiyā vah rabb ko pasand thā, agarchi vah utnī vafādārī se rabb kī pairvī nahīṅ kartā thā jitnī us ke bāp dāūd ne kī thī. har kām meṅ vah apne bāp yūās ke namūne par chalā, 4lekin us ne bhī ūṅchī jagahoṅ ke mandiroṅ ko dūr na kiyā. ām log ab tak vahāṅ qurbāniyāṅ chaṛhāte aur baḵẖūr jalāte rahe.
5jūṅ hī amasiyāh ke pāoṅ mazbūtī se jam gae us ne un afsaroṅ ko sazā-e-maut dī jinhoṅ ne bāp ko qatl kar diyā thā. 6lekin un ke beṭoṅ ko us ne zindā rahane diyā aur yūṅ mūsvī sharīat ke tābe rahā jis meṅ rabb farmātā hai, “vālidain ko un ke bacchoṅ ke jarāim ke sabab se sazā-e-maut na dī jāe, na bacchoṅ ko un ke vālidain ke jarāim ke sabab se. agar kisī ko sazā-e-maut denī ho to us gunāh ke sabab se jo us ne ḵẖud kiyā hai.”
7amasiyāh ne adomiyoṅ ko namak kī vādī meṅ shikast dī. us vaqt un ke 10,000 faujī us se laṛne āe the. jaṅg ke daurān us ne silā shahar par qabzā kar liyā aur us kā nām yuqtiel rakhā. yah nām āj tak rāij hai.
amasiyāh isrāīl ke bādshāh yahūās se laṛtā hai
8is fatah ke bād amasiyāh ne isrāīl ke bādshāh yahūās bin yahūāḵẖaz ko paiġām bhejā, “āeṅ, ham ek dūsre kā muqāblā kareṅ!” 9lekin isrāīl ke bādshāh yahūās ne javāb diyā, “lubnān meṅ ek kāṅṭedār jhāṛī ne deodār ke ek daraḵẖt se bāt kī, ‘mere beṭe ke sāth apnī beṭī kā rishtā bāndho.’ lekin usī vaqt lubnān ke jaṅglī jānvaroṅ ne us ke ūpar se guzar kar use pāoṅ tale kuchal ḍālā. 10mulk-e-adom par fatah pāne ke sabab se āp kā dil maġrūr ho gayā hai. lekin merā mashvrā hai ki āp apne ghar meṅ rah kar fatah meṅ hāsil huī shuharat kā mazā lene par iktifā kareṅ. āp aisī musībat ko kyūṅ dāvat dete haiṅ jo āp aur yahūdāh kī tabāhī kā bāis ban jāe?”
11lekin amasiyāh mānne ke liye tayyār nahīṅ thā, is liye yahūās apnī fauj le kar yahūdāh par chaṛh āyā. bait-shams ke pās us kā yahūdāh ke bādshāh ke sāth muqāblā huā. 12isrāīl kī fauj ne yahūdāh kī fauj ko shikast dī, aur har ek apne apne ghar bhāg gayā. 13isrāīl ke bādshāh yahūās ne yahūdāh ke bādshāh amasiyāh bin yūās bin aḵẖaziyāh ko vahīṅ bait-shams meṅ giriftār kar liyā. phir vah yarūshalam gayā aur shahar kī fasīl ifrāīm nāmī darvāze se kone ke darvāze tak girā dī. is hisse kī lambāī taqrīban 600 fuṭ thī. 14jitnā bhī sonā, chāṅdī aur qīmtī sāmān rabb ke ghar aur shāhī mahal ke ḵẖazānoṅ meṅ thā use us ne pūre kā pūrā chhīn liyā. lūṭā huā māl aur bāz yaraġamāloṅ ko le kar vah sāmriyā vāpas chalā gayā.
isrāīl ke bādshāh yahūās kī maut
15bāqī jo kuchh yahūās kī hukūmat ke daurān huā, jo kuchh us ne kiyā aur jo kāmyābiyāṅ use hāsil huīṅ vah shāhān-e-isrāīl kī tārīḵẖ kī kitāb meṅ darj haiṅ. us meṅ us kī yahūdāh ke bādshāh amasiyāh ke sāth jaṅg kā zikr bhī hai. 16jab yahūās mar kar apne bāpdādā se jā milā to use sāmriyā meṅ isrāīl ke bādshāhoṅ kī qabr meṅ dafnāyā gayā. phir us kā beṭā yarubiām duvum taḵẖtnashīn huā.
yahūdāh ke bādshāh amasiyāh kī maut
17isrāīl ke bādshāh yahūās bin yahūāḵẖaz kī maut ke bād yahūdāh kā bādshāh amasiyāh bin yūās mazīd 15 sāl jītā rahā. 18bāqī jo kuchh amasiyāh kī hukūmat ke daurān huā vah ‘shāhān-e-yahūdāh kī tārīḵẖ’ kī kitāb meṅ darj hai. 19ek din log yarūshalam meṅ us ke ḵẖilāf sāzish karne lage. āḵẖirkār us ne farār ho kar lakīs meṅ panāh lī, lekin sāzish karne vāloṅ ne apne logoṅ ko us ke pīchhe bhejā, aur vah vahāṅ use qatl karne meṅ kāmyāb ho gae. 20us kī lāsh ghoṛe par uṭhā kar yarūshalam lāī gaī jahāṅ use shahar ke us hisse meṅ jo ‘dāūd kā shahar’ kahalātā hai ḵẖāndānī qabr meṅ dafnāyā gayā.
21yahūdāh ke tamām logoṅ ne amasiyāh ke beṭe uzziyāh [a] yahāṅ kaī jagahoṅ par ibrānī meṅ uzziyāh kā dūsrā nām azariyāh mustāmal hai. ko bāp ke taḵẖt par biṭhā diyā. us kī umr 16 sāl thī 22jab us kā bāp mar kar apne bāpdādā se jā milā. bādshāh banne ke bād uzziyāh ne ailāt shahar par qabzā karke use dubārā yahūdāh kā hissā banā liyā. us ne shahar meṅ bahut tāmīrī kām karvāyā.
isrāīl kā bādshāh yarubiām duvum
23yahūdāh ke bādshāh amasiyāh bin yūās ke 15veṅ sāl meṅ yarubiām bin yahūās isrāīl kā bādshāh banā. us kī hukūmat kā daurāniyā 41 sāl thā, aur us kā dār-ul-hakūmat sāmriyā rahā. 24us kā chāl-chalan rabb ko nāpsand thā. vah un gunāhoṅ se bāz na āyā jo karne par nabāt ke beṭe yarubiām avval ne isrāīl ko uksāyā thā. 25yarubiām duvum labo-hamāt se le kar bahīrā-e-murdār tak un tamām ilāqoṅ par dubārā qabzā kar sakā jo pahale isrāīl ke the. yūṅ vah vādā pūrā huā jo rabb isrāīl ke ḵẖudā ne apne ḵẖādim jāt-hifar ke rahane vāle nabī yūnus bin amittī kī mārifat kiyā thā. 26kyūṅki rabb ne isrāīl kī nihāyat burī hālat par dhyān diyā thā. use mālūm thā ki chhoṭe baṛe sab halāk hone vāle haiṅ aur ki unheṅ chhuṛāne vālā koī nahīṅ hai. 27rabb ne kabhī nahīṅ kahā thā ki maiṅ isrāīl qaum kā nām-o-nishān miṭā dūṅgā, is liye us ne unheṅ yarubiām bin yahūās ke vasīle se najāt dilāī.
28bāqī jo kuchh yarubiām duvum kī hukūmat ke daurān huā, jo kuchh us ne kiyā aur jo jaṅgī kāmyābiyāṅ use hāsil huīṅ un kā zikr ‘shāhān-e-isrāīl kī tārīḵẖ’ kī kitāb meṅ huā hai. us meṅ yah bhī bayān kiyā gayā hai ki us ne kis tarah damishq aur hamāt par dubārā qabzā kar liyā. 29jab yarubiām mar kar apne bāpdādā se jā milā to use sāmriyā meṅ bādshāhoṅ kī qabr meṅ dafnāyā gayā. phir us kā beṭā zakariyāh taḵẖtnashīn huā.