2 Salātīn 16

yahūdāh kā bādshāh āḵẖaz

¹āḵẖaz bin yūtām isrāīl ke bādshāh fiqah bin ramaliyāh kī hukūmat ke 17veṅ sāl meṅ yahūdāh kā bādshāh banā. ²us vaqt āḵẖaz 20 sāl kā thā, aur vah yarūshalam meṅ rah kar 16 sāl hukūmat kartā rahā. vah apne bāp dāūd ke namūne par na chalā balki vah kuchh kartā rahā jo rabb ko nāpsand thā. ³kyūṅki us ne isrāīl ke bādshāhoṅ kā chāl-chalan apnāyā, yahāṅ tak ki us ne apne beṭe ko qurbānī ke taur par jalā diyā. yūṅ vah un qaumoṅ ke ghinaune rasm-o-rivāj adā karne lagā jinheṅ rabb ne isrāīliyoṅ ke āge mulk se nikāl diyā thā. ⁴āḵẖaz baḵẖūr jalā kar apnī qurbāniyāṅ ūṅche maqāmoṅ, pahāṛiyoṅ kī choṭiyoṅ aur har ghane daraḵẖt ke sāy meṅ chaṛhātā thā.

āḵẖaz asūr ke bādshāh se madad letā hai

⁵ek din shām kā bādshāh razīn aur isrāīl kā bādshāh fiqah bin ramaliyāh yarūshalam par hamlā karne ke liye yahūdāh meṅ ghus āe. unhoṅ ne shahar kā muhāsarā to kiyā lekin us par qabzā karne meṅ nākām rahe. ⁶un hī dinoṅ meṅ razīn ne ailāt par dubārā qabzā karke shām kā hissā banā liyā. yahūdāh ke logoṅ ko vahāṅ se nikāl kar us ne vahāṅ adomiyoṅ ko basā diyā. yah adomī āj tak vahāṅ ābād haiṅ.

⁷āḵẖaz ne apne qāsidoṅ ko asūr ke bādshāh tiglat-pilesar ke pās bhej kar use ittilā dī, “maiṅ āp kā ḵẖādim aur beṭā hūṅ. meharbānī karke āeṅ aur mujhe shām aur isrāīl ke bādshāhoṅ se bachāeṅ jo mujh par hamlā kar rahe haiṅ.” ⁸sāth sāth āḵẖaz ne vah chāṅdī aur sonā jamā kiyā jo rabb ke ghar aur shāhī mahal ke ḵẖazānoṅ meṅ thā aur use tuhfe ke taur par asūr ke bādshāh ko bhej diyā. ⁹tiglat-pilesar rāzī ho gayā. us ne damishq par hamlā karke shahar par qabzā kar liyā aur us ke bāshindoṅ ko giriftār karke qīr ko le gayā. razīn ko us ne qatl kar diyā.

āḵẖaz rabb ke ghar kī behuramtī kartā hai

¹⁰āḵẖaz bādshāh asūr ke bādshāh tiglat-pilesar se milne ke liye damishq gayā. vahāṅ ek qurbāngāh thī jis kā namūnā āḵẖaz ne banā kar ūriyāh imām ko bhej diyā. sāth sāth us ne ḍizāin kī tamām tafsīlāt bhī yarūshalam bhej dīṅ. ¹¹jab ūriyāh ko hidāyāt milīṅ to us ne un hī ke mutābiq yarūshalam meṅ ek qurbāngāh banāī. āḵẖaz ke damishq se vāpas āne se pahale pahale use tayyār kar liyā gayā.

¹²jab bādshāh vāpas āyā to us ne naī qurbāngāh kā muāinā kiyā. phir us kī sīṛhī par chaṛh kar ¹³us ne ḵẖud qurbāniyāṅ us par pesh kīṅ. bhasm hone vālī qurbānī aur ġallā kī nazar jalā kar us ne mai kī nazar qurbāngāh par uṅḍel dī aur salāmatī kī qurbāniyoṅ kā ḵẖūn us par chhiṛak diyā.

¹⁴rabb ke ghar aur naī qurbāngāh ke darmiyān ab tak pītal kī purānī qurbāngāh thī. ab āḵẖaz ne use uṭhā kar rabb ke ghar ke sāmne se muntaqil karke naī qurbāngāh ke pīchhe yānī shimāl kī taraf rakhvā diyā. ¹⁵ūriyāh imām ko us ne hukm diyā, “ab se āp ko tamām qurbāniyoṅ ko naī qurbāngāh par pesh karnā hai. in meṅ subah-o-shām kī rozānā qurbāniyāṅ bhī shāmil haiṅ aur bādshāh aur ummat kī muḵẖtalif qurbāniyāṅ bhī, maslan bhasm hone vālī qurbāniyāṅ aur ġallā aur mai kī nazreṅ. qurbāniyoṅ ke tamām ḵẖūn ko bhī sirf naī qurbāngāh par chhiṛaknā hai. āindā pītal kī purānī qurbāngāh sirf mere zātī istemāl ke liye hogī jab mujhe allāh se kuchh darayāft karnā hogā.” ¹⁶ūriyāh imām ne vaisā hī kiyā jaisā bādshāh ne use hukm diyā.

¹⁷lekin āḵẖaz bādshāh rabb ke ghar meṅ mazīd tabdīliyāṅ bhī lāyā. hathgāṛiyoṅ ke jin fremoṅ par bāsan rakhe jāte the unheṅ toṛ kar us ne bāsnoṅ ko dūr kar diyā. is ke ilāvā us ne ‘samundar’ nāmī baṛe hauz ko pītal ke un bailoṅ se utār diyā jin par vah shurū se paṛā thā aur use patthar ke ek chabūtre par rakhvā diyā. ¹⁸us ne asūr ke bādshāh ko ḵẖush rakhne ke liye ek aur kām bhī kiyā. us ne rabb ke ghar se vah chabūtrā dūr kar diyā jis par bādshāh kā taḵẖt rakhā jātā thā aur vah darvāzā band kar diyā jo bādshāh rabb ke ghar meṅ dāḵẖil hone ke liye istemāl kartā thā.

¹⁹bāqī jo kuchh āḵẖaz kī hukūmat ke daurān huā aur jo kuchh us ne kiyā vah ‘shāhān-e-yahūdāh kī tārīḵẖ’ kī kitāb meṅ darj hai. ²⁰jab vah mar kar apne bāpdādā se jā milā to use yarūshalam ke us hisse meṅ jo ‘dāūd kā shahar’ kahalātā hai ḵẖāndānī qabr meṅ dafnāyā gayā. phir us kā beṭā hizaqiyāh taḵẖtnashīn huā.