2 Salātīn 4
ilīshā aur bevā kā tel
1ek din ek bevā ilīshā ke pās āī jis kā shauhar jab zindā thā nabiyoṅ ke guroh meṅ shāmil thā. bevā chīḵẖtī chillātī ilīshā se muḵẖātib huī, “āp jānte haiṅ ki merā shauhar jo āp kī ḵẖidmat kartā thā allāh kā ḵẖauf māntā thā. ab jab vah faut ho gayā hai to us kā ek sāhūkār ā kar dhamkī de rahā hai ki agar qarz adā na kiyā gayā to maiṅ tere do beṭoṅ ko ġulām banā kar le jāūṅgā.”
2ilīshā ne pūchhā, “maiṅ kis tarah āp kī madad karūṅ? batāeṅ, ghar meṅ āp ke pās kyā hai?” bevā ne javāb diyā, “kuchh nahīṅ, sirf zaitūn ke tel kā chhoṭā sā bartan.” 3ilīshā bolā, “jāeṅ, apnī tamām paṛosanoṅ se ḵẖālī bartan māṅgeṅ. lekin dhyān rakheṅ ki thoṛe bartan na hoṅ! 4phir apne beṭoṅ ke sāth ghar meṅ jā kar darvāze par kuṅḍī lagāeṅ. tel kā apnā bartan le kar tamām ḵẖālī bartanoṅ meṅ tel uṅḍelatī jāeṅ. jab ek bhar jāe to use ek taraf rakh kar dūsre ko bharnā shurū kareṅ.”
5bevā ne jā kar aisā hī kiyā. vah apne beṭoṅ ke sāth ghar meṅ gaī aur darvāze par kuṅḍī lagāī. beṭe use ḵẖālī bartan dete gae aur māṅ un meṅ tel uṅḍelatī gaī. 6bartanoṅ meṅ tel ḍalte ḍalte sab labālab bhar gae. māṅ bolī, “mujhe ek aur bartan de do” to ek laṛke ne javāb diyā, “aur koī nahīṅ hai.” tab tel kā silsilā ruk gayā.
7jab bevā ne mard-e-ḵẖudā ke pās jā kar use ittilā dī to ilīshā ne kahā, “ab jā kar tel ko bech deṅ aur karze ke paise jamā karāeṅ. jo bach jāe use āp aur āp ke beṭe apnī zarūriyāt pūrī karne ke liye istemāl kar sakte haiṅ.”
ilīshā shūnīm meṅ laṛke ko zindā kar detā hai
8ek din ilīshā shūnīm gayā. vahāṅ ek amīr aurat rahatī thī jis ne zabardastī use apne ghar biṭhā kar khānā khilāyā. bād meṅ jab kabhī ilīshā vahāṅ se guzartā to vah khāne ke liye us aurat ke ghar ṭhahar jātā. 9ek din aurat ne apne shauhar se bāt kī, “maiṅ ne jān liyā hai ki jo ādmī hamāre hāṅ ātā rahatā hai vah allāh kā muqaddas paiġambar hai. 10kyūṅ na ham us ke liye chhat par chhoṭā sā kamrā banā kar us meṅ chārpāī, mez, kursī aur shamādān rakheṅ. phir jab bhī vah hamāre pās āe to vah us meṅ ṭhahar saktā hai.”
11ek din jab ilīshā āyā to vah apne kamre meṅ jā kar bistar par leṭ gayā. 12us ne apne naukar jaihāzī se kahā, “shūnīmī mezbān ko bulā lāo.” jab vah ā kar us ke sāmne khaṛī huī 13to ilīshā ne jaihāzī se kahā, “use batā denā ki āp ne hamāre liye bahut taklīf uṭhāī hai. ab ham āp ke liye kyā kuchh kareṅ? kyā ham bādshāh yā fauj ke kamāṅḍar se bāt karke āp kī sifārish kareṅ?” aurat ne javāb diyā, “nahīṅ, is kī zarūrat nahīṅ. maiṅ apne hī logoṅ ke darmiyān rahatī hūṅ.”
14bād meṅ ilīshā ne jaihāzī se bāt kī, “ham us ke liye kyā kareṅ?” jaihāzī ne javāb diyā, “ek bāt to hai. us kā koī beṭā nahīṅ, aur us kā shauhar kāfī būṛhā hai.” 15ilīshā bolā, “use vāpas bulāo.” aurat vāpas ā kar darvāze meṅ khaṛī ho gaī. ilīshā ne us se kahā, 16“agle sāl isī vaqt āp kā apnā beṭā āp kī god meṅ hogā.” shūnīmī aurat ne etirāz kiyā, “nahīṅ nahīṅ, mere āqā. mard-e-ḵẖudā aisī bāteṅ karke apnī ḵẖādimā ko jhūṭī tasallī mat deṅ.”
17lekin aisā hī huā. kuchh der ke bād aurat kā pāoṅ bhārī ho gayā, aur ain ek sāl ke bād us ke hāṅ beṭā paidā huā. sab kuchh vaisā hī huā jaisā ilīshā ne kahā thā. 18bacchā parvān chaṛhā, aur ek din vah ghar se nikal kar khet meṅ apne bāp ke pās gayā jo fasal kī kaṭāī karne vāloṅ ke sāth kām kar rahā thā. 19achānak laṛkā chīḵẖne lagā, “hāy merā sar, hāy merā sar!” bāp ne kisī mulāzim ko batāyā, “laṛke ko uṭhā kar māṅ ke pās le jāo.” 20naukar use uṭhā kar le gayā, aur vah apnī māṅ kī god meṅ baiṭhā rahā. lekin dopahar ko vah mar gayā.
21māṅ laṛke kī lāsh ko le kar chhat par chaṛh gaī. mard-e-ḵẖudā ke kamre meṅ jā kar us ne use us ke bistar par liṭā diyā. phir darvāze ko band karke vah bāhar niklī 22aur apne shauhar ko bulvā kar kahā, “zarā ek naukar aur ek gadhī mere pās bhej deṅ. mujhe fauran mard-e-ḵẖudā ke pās jānā hai. maiṅ jald hī vāpas ā jāūṅgī.” 23shauhar ne hairān ho kar pūchhā, “āj us ke pās kyūṅ jānā hai? na to nae chāṅd kī īd hai, na sabat kā din.” bīvī ne kahā, “sab ḵẖairiyat hai.” 24gadhī par zīn kas kar us ne naukar ko hukm diyā, “gadhī ko tez chalā tāki ham jaldī pahuṅch jāeṅ. jab maiṅ kahūṅgī tab hī ruknā hai, varnā nahīṅ.”
25chalte chalte vah karmil pahāṛ ke pās pahuṅch gae jahāṅ mard-e-ḵẖudā ilīshā thā. use dūr se dekh kar ilīshā jaihāzī se kahane lagā, “dekho, shūnīm kī aurat ā rahī hai! 26bhāg kar us ke pās jāo aur pūchho ki kyā āp, āp kā shauhar aur bacchā ṭhīk haiṅ?” jaihāzī ne jā kar us kā hāl pūchhā to aurat ne javāb diyā, “jī, sab ṭhīk hai.” 27lekin jūṅ hī vah pahāṛ ke pās pahuṅch gaī to ilīshā ke sāmne gir kar us ke pāoṅ se chimaṭ gaī. yah dekh kar jaihāzī use haṭāne ke liye qarīb āyā, lekin mard-e-ḵẖudā bolā, “chhoṛ do! koī bāt ise bahut taklīf de rahī hai, lekin rabb ne vajah mujh se chhupāe rakhī hai. us ne mujhe is ke bāre meṅ kuchh nahīṅ batāyā.”
28phir shūnīmī aurat bol uṭhī, “mere āqā, kyā maiṅ ne āp se beṭe kī daraḵẖwāst kī thī? kyā maiṅ ne nahīṅ kahā thā ki mujhe ġalat ummīd na dilāeṅ?” 29tab ilīshā ne naukar ko hukm diyā, “jaihāzī, safar ke liye kamarbastā ho kar merī lāṭhī ko le lo aur bhāg kar shūnīm pahuṅcho. agar rāste meṅ kisī se milo to use salām tak na karnā, aur agar koī salām kahe to use javāb mat denā. jab vahāṅ pahuṅchoge to merī lāṭhī laṛke ke chihare par rakh denā.” 30lekin māṅ ne etirāz kiyā, “rabb kī aur āp kī hayāt kī qasam, āp ke baġair maiṅ ghar vāpas nahīṅ jāūṅgī.”
chunāṅche ilīshā bhī uṭhā aur aurat ke pīchhe pīchhe chal paṛā. 31jaihāzī bhāg bhāg kar un se pahale pahuṅch gayā aur lāṭhī ko laṛke ke chihare par rakh diyā. lekin kuchh na huā. na koī āvāz sunāī dī, na koī harkat huī. vah ilīshā ke pās vāpas āyā aur bolā, “laṛkā abhī tak murdā hī hai.”
32jab ilīshā pahuṅch gayā to laṛkā ab tak murdā hālat meṅ us ke bistar par paṛā thā. 33vah akelā hī andar gayā aur darvāze par kuṅḍī lagā kar rabb se duā karne lagā. 34phir vah laṛke par leṭ gayā, yūṅ ki us kā muṅh bacche ke muṅh se, us kī āṅkheṅ bacche kī āṅkhoṅ se aur us ke hāth bacche ke hāthoṅ se lag gae. aur jūṅ hī vah laṛke par jhuk gayā to us kā jism garm hone lagā. 35ilīshā khaṛā huā aur ghar meṅ idhar udhar phirne lagā. phir vah ek aur martabā laṛke par leṭ gayā. is dafā laṛke ne sāt bār chhīṅkeṅ mār kar apnī āṅkheṅ khol dīṅ.
36ilīshā ne jaihāzī ko āvāz de kar kahā, “shūnīmī aurat ko bulā lāo.” vah kamre meṅ dāḵẖil huī to ilīshā bolā, “āeṅ, apne beṭe ko uṭhā kar le jāeṅ.” 37vah āī aur ilīshā ke sāmne auṅdhe muṅh jhuk gaī, phir apne beṭe ko uṭhā kar kamre se bāhar chalī gaī.
ilīshā zaharīle sālan ko khāne ke qābil banā detā hai
38ilīshā jiljāl ko lauṭ āyā. un dinoṅ meṅ mulk kāl kī girift meṅ thā. ek din jab nabiyoṅ kā guroh us ke sāmne baiṭhā thā to us ne apne naukar ko hukm diyā, “baṛī deg le kar nabiyoṅ ke liye kuchh pakā lo.”
39ek ādmī bāhar nikal kar khule maidān meṅ kaddū ḍhūṅḍne gayā. kahīṅ ek bel nazar āī jis par kaddū jaisī koī sabzī lagī thī. in kaddūoṅ se apnī chādar bhar kar vah vāpas āyā aur unheṅ kāṭ kāṭ kar deg meṅ ḍāl diyā, hālāṅki kisī ko bhī mālūm nahīṅ thā ki kyā chīz hai.
40sālan pak kar nabiyoṅ meṅ taqsīm huā. lekin use chakhte hī vah chīḵẖne lage, “mard-e-ḵẖudā, sālan meṅ zahar hai! ise khā kar bandā mar jāegā.” vah use bilkul na khā sake. 41ilīshā ne hukm diyā, “mujhe kuchh maidā lā kar deṅ.” phir use deg meṅ ḍāl kar bolā, “ab ise logoṅ ko khilā deṅ.” ab khānā khāne ke qābil thā aur unheṅ nuqsān na pahuṅchā sakā.
100 ādmiyoṅ ke liye khānā
42ek aur mauqe par kisī ādmī ne bāl-salīsā se ā kar mard-e-ḵẖudā ko naī fasal ke jau kī 20 roṭiyāṅ aur kuchh anāj de diyā. ilīshā ne jaihāzī ko hukm diyā, “ise logoṅ ko khilā do.”
43jaihāzī hairān ho kar bolā, “yah kaise mumkin hai? yah to 100 ādmiyoṅ ke liye kāfī nahīṅ hai.” lekin ilīshā ne isrār kiyā, “ise logoṅ meṅ taqsīm kar do, kyūṅki rabb farmātā hai ki vah jī bhar kar khāeṅge balki kuchh bach bhī jāegā.”
44aur aisā hī huā. jab naukar ne ādmiyoṅ meṅ khānā taqsīm kiyā to unhoṅ ne jī bhar kar khāyā, balki kuchh khānā bach bhī gayā. vaisā hī huā jaisā rabb ne farmāyā thā.