2 Salātīn 6

kulhāṛī kā lohā pānī kī satah par tairtā hai

¹ek din kuchh nabī ilīshā ke pās ā kar shikāyat karne lage, “jis taṅg jagah par ham āp ke pās ā kar ṭhahare haiṅ us meṅ hamāre liye rahanā mushkil hai. ²kyūṅ na ham daryā-e-yardan par jāeṅ aur har ādmī vahāṅ se shahatīr le āe tāki ham rahane kī naī jagah banā sakeṅ.” ilīshā bolā, “ṭhīk hai, jāeṅ.” ³kisī ne guzārish kī, “barāh-e-karam hamāre sāth chaleṅ.” nabī rāzī ho kar ⁴un ke sāth ravānā huā.

daryā-e-yardan ke pās pahuṅchte hī vah daraḵẖt kāṭne lage. ⁵kāṭte kāṭte achānak kisī kī kulhāṛī kā lohā pānī meṅ gir gayā. vah chillā uṭhā, “hāy mere āqā! yah merā nahīṅ thā, maiṅ ne to use kisī se udhār liyā thā.” ⁶ilīshā ne savāl kiyā, “lohā kahāṅ pānī meṅ girā?” ādmī ne use jagah dikhāī to nabī ne kisī daraḵẖt se shāḵẖ kāṭ kar pānī meṅ phaiṅk dī. achānak lohā pānī kī satah par ā kar tairne lagā. ⁷ilīshā bolā, “ise pānī se nikāl lo!” ādmī ne apnā hāth baṛhā kar lohe ko pakaṛ liyā.

shām ke jaṅgī mansūbe ilīshā ke bāis nākām rahate haiṅ

⁸shām aur isrāīl ke darmiyān jaṅg thī. jab kabhī bādshāh apne afsaroṅ se mashvrā karke kahatā, “ham fulāṅ fulāṅ jagah apnī lashkargāh lagā leṅge” ⁹to fauran mard-e-ḵẖudā isrāīl ke bādshāh ko āgāh kartā, “fulāṅ jagah se mat guzarnā, kyūṅki shām ke faujī vahāṅ ghāt meṅ baiṭhe haiṅ.” ¹⁰tab isrāīl kā bādshāh apne logoṅ ko mazkūrā jagah par bhejtā aur vahāṅ se guzarne se muhtāt rahatā thā. aisā na sirf ek yā do dafā balki kaī martabā huā.

¹¹āḵẖirkār shām ke bādshāh ne bahut raṅjīdā ho kar apne afsaroṅ ko bulāyā aur pūchhā, “kyā koī mujhe batā saktā hai ki ham meṅ se kaun isrāīl ke bādshāh kā sāth detā hai?” ¹²kisī afsar ne javāb diyā, “mere āqā aur bādshāh, ham meṅ se koī nahīṅ hai. maslā yah hai ki isrāīl kā nabī ilīshā isrāīl ke bādshāh ko vah bāteṅ bhī batā detā hai jo āp apne sone ke kamre meṅ bayān karte haiṅ.” ¹³bādshāh ne hukm diyā, “jāeṅ, us kā patā kareṅ tāki ham apne faujiyoṅ ko bhej kar use pakaṛ leṅ.”

bādshāh ko ittilā dī gaī ki ilīshā dūtain nāmī shahar meṅ hai. ¹⁴us ne fauran ek baṛī fauj rathoṅ aur ghoṛoṅ samet vahāṅ bhej dī. unhoṅ ne rāt ke vaqt pahuṅch kar shahar ko gher liyā. ¹⁵jab ilīshā kā naukar subah-savere jāg uṭhā aur ghar se niklā to kyā dekhtā hai ki pūrā shahar ek baṛī fauj se ghirā huā hai jis meṅ rath aur ghoṛe bhī shāmil haiṅ. us ne ilīshā se kahā, “hāy mere āqā, ham kyā kareṅ?” ¹⁶lekin ilīshā ne use tasallī dī, “ḍaro mat! jo hamāre sāth haiṅ vah un kī nisbat kahīṅ ziyādā haiṅ jo dushman ke sāth haiṅ.” ¹⁷phir us ne duā kī, “ai rabb, naukar kī āṅkheṅ khol tāki vah dekh sake.” rabb ne ilīshā ke naukar kī āṅkheṅ khol dīṅ to us ne dekhā ki pahāṛ par ilīshā ke ird-gird ātishīṅ ghoṛe aur rath phaile hue haiṅ.

¹⁸jab dushman ilīshā kī taraf baṛhne lagā to us ne duā kī, “ai rabb, in ko aṅdhā kar de!” rabb ne ilīshā kī sunī aur unheṅ aṅdhā kar diyā. ¹⁹phir ilīshā un ke pās gayā aur kahā, “yah rāstā sahīh nahīṅ. āp ġalat shahar ke pās pahuṅch gae haiṅ. mere pīchhe ho leṅ to maiṅ āp ko us ādmī ke pās pahuṅchā dūṅgā jise āp ḍhūṅḍ rahe haiṅ.” yah kah kar vah unheṅ sāmriyā le gayā.

²⁰jab vah shahar meṅ dāḵẖil hue to ilīshā ne duā kī, “ai rabb, faujiyoṅ kī āṅkheṅ khol de tāki vah dekh sakeṅ.” tab rabb ne un kī āṅkheṅ khol dīṅ, aur unheṅ mālūm huā ki ham sāmriyā meṅ phaṅs gae haiṅ.

²¹jab isrāīl ke bādshāh ne apne dushmanoṅ ko dekhā to us ne ilīshā se pūchhā, “mere bāp, kyā maiṅ unheṅ mār dūṅ? kyā maiṅ unheṅ mār dūṅ?” ²²lekin ilīshā ne manā kiyā, “aisā mat kareṅ. kyā āp apne jaṅgī qaidiyoṅ ko mār dete haiṅ? nahīṅ, unheṅ khānā khilāeṅ, pānī pilāeṅ aur phir un ke mālik ke pās vāpas bhej deṅ.”

²³chunāṅche bādshāh ne un ke liye baṛī ziyāfat kā ehatimām kiyā aur khāne-pīne se fāriġ hone par unheṅ un ke mālik ke pās vāpas bhej diyā. is ke bād isrāīl par shām kī taraf se lūṭ-mār ke chhāpe band ho gae.

sāmriyā kā muhāsarā

²⁴kuchh der ke bād shām kā bādshāh bin-hadad apnī pūrī fauj jamā karke isrāīl par chaṛh āyā aur sāmriyā kā muhāsarā kiyā. ²⁵natīje meṅ shahar meṅ shadīd kāl paṛā. āḵẖir meṅ gadhe kā sar chāṅdī ke 80 sikkoṅ meṅ aur kabūtar kī muṭṭhī bhar bīṭ chāṅdī ke 5 sikkoṅ meṅ miltī thī.

²⁶ek din isrāīl kā bādshāh yūrām shahar kī fasīl par sair kar rahā thā to ek aurat ne us se iltimās kī, “ai mere āqā aur bādshāh, merī madad kījie.” ²⁷bādshāh ne javāb diyā, “agar rabb āp kī madad nahīṅ kartā to maiṅ kis tarah āp kī madad karūṅ? na maiṅ gāhane kī jagah jā kar āp ko anāj de saktā hūṅ, na aṅgūr kā ras nikālne kī jagah jā kar āp ko ras pahuṅchā saktā hūṅ. ²⁸phir bhī mujhe batāeṅ, maslā kyā hai?” aurat bolī, “is aurat ne mujh se kahā thā, ‘āeṅ, āj āp apne beṭe ko qurbān kareṅ tāki ham use khā leṅ, to phir kal ham mere beṭe ko khā leṅge.’ ²⁹chunāṅche ham ne mere beṭe ko pakā kar khā liyā. agle din maiṅ ne us se kahā, ‘ab apne beṭe ko de deṅ tāki use bhī khā leṅ.’ lekin us ne use chhupāe rakhā.”

³⁰yah sun kar bādshāh ne raṅjish ke māre apne kapṛe phāṛ ḍāle. chūṅki vah abhī tak fasīl par khaṛā thā is liye sab logoṅ ko nazar āyā ki kapṛoṅ ke nīche vah ṭāṭ pahane hue thā. ³¹us ne pukārā, “allāh mujhe saḵẖt sazā de agar maiṅ ilīshā bin sāfat kā āj hī sar qalam na karūṅ!”

³²us ne ek ādmī ko ilīshā ke pās bhejā aur ḵẖud bhī us ke pīchhe chal paṛā. ilīshā us vaqt ghar meṅ thā, aur shahar ke buzurg us ke pās baiṭhe the. bādshāh kā qāsid abhī rāste meṅ thā ki ilīshā buzurgoṅ se kahane lagā, “ab dhyān kareṅ, is qātil bādshāh ne kisī ko merā sar qalam karne ke liye bhej diyā hai. use andar āne na deṅ balki darvāze par kuṅḍī lagāeṅ. us ke pīchhe pīchhe us ke mālik ke qadmoṅ kī āhaṭ bhī sunāī de rahī hai.”

³³ilīshā abhī bāt kar hī rahā thā ki qāsid pahuṅch gayā aur us ke pīchhe bādshāh bhī. bādshāh bolā, “rabb hī ne hameṅ is musībat meṅ phaṅsā diyā hai. maiṅ mazīd us kī madad ke intizār meṅ kyūṅ rahūṅ?”