2 Salātīn 7
1tab ilīshā bolā, “rabb kā farmān suneṅ! rabb farmātā hai ki kal isī vaqt shahar ke darvāze par sāḍhe 5 kilogrām behtarīn maidā aur 11 kilogrām jau chāṅdī ke ek sikke ke liye bikegā.” 2jis afsar ke bāzū kā sahārā bādshāh letā thā vah mard-e-ḵẖudā kī bāt sun kar bol uṭhā, “yah nāmumkin hai, ḵẖwāh rabb āsmān ke darīche kyūṅ na khol de.” ilīshā ne javāb diyā, “āp apnī āṅkhoṅ se is kā mushāhadā kareṅge, lekin ḵẖud us meṅ se kuchh na khāeṅge.”
shām ke faujī farār ho jāte haiṅ
3shahar se bāhar darvāze ke qarīb koṛh ke chār marīz baiṭhe the. ab yah ādmī ek dūsre se kahane lage, “ham yahāṅ baiṭh kar maut kā intizār kyūṅ kareṅ? 4shahar meṅ kāl hai. agar us meṅ jāeṅ to bhūke mar jāeṅge, lekin yahāṅ rahane se bhī koī farq nahīṅ paṛtā. to kyūṅ na ham shām kī lashkargāh meṅ jā kar apne āp ko un ke havāle kareṅ. agar vah hameṅ zindā rahane deṅ to acchhā rahegā, aur agar vah hameṅ qatl bhī kar deṅ to koī farq nahīṅ paṛegā. yahāṅ rah kar bhī hameṅ marnā hī hai.”
5shām ke dhundalke meṅ vah ravānā hue. lekin jab lashkargāh ke kināre tak pahuṅche to ek bhī ādmī nazar na āyā. 6kyūṅki rabb ne shām ke faujiyoṅ ko rathoṅ, ghoṛoṅ aur ek baṛī fauj kā shor sunā diyā thā. vah ek dūsre se kahane lage, “isrāīl ke bādshāh ne hittī aur misrī bādshāhoṅ ko ujrat par bulāyā tāki vah ham par hamlā kareṅ!” 7ḍar ke māre vah shām ke dhundalke meṅ farār ho gae the. un ke ḵẖaime, ghoṛe, gadhe balki pūrī lashkargāh pīchhe rah gaī thī jabki vah apnī jān bachāne ke liye bhāg gae the.
8jab kauṛī lashkargāh meṅ dāḵẖil hue to unhoṅ ne ek ḵẖaime meṅ jā kar jī bhar kar khānā khāyā aur mai pī. phir unhoṅ ne sonā, chāṅdī aur kapṛe uṭhā kar kahīṅ chhupā die. vah vāpas ā kar kisī aur ḵẖaime meṅ gae aur us kā sāmān jamā karke use bhī chhupā diyā. 9lekin phir vah āpas meṅ kahane lage, “jo kuchh ham kar rahe haiṅ ṭhīk nahīṅ. āj ḵẖushī kā din hai, aur ham yah ḵẖushḵẖabarī dūsroṅ tak nahīṅ pahuṅchā rahe. agar ham subah tak intizār kareṅ to qusūrvār ṭhahareṅge. āeṅ, ham fauran vāpas jā kar bādshāh ke gharāne ko ittilā deṅ.”
10chunāṅche vah shahar ke darvāze ke pās gae aur paharedāroṅ ko āvāz de kar unheṅ sab kuchh sunāyā, “ham shām kī lashkargāh meṅ gae to vahāṅ na koī dikhāī diyā, na kisī kī āvāz sunāī dī. ghoṛe aur gadhe baṅdhe hue the aur ḵẖaime tartīb se khaṛe the, lekin ādmī ek bhī maujūd nahīṅ thā!”
11darvāze ke paharedāroṅ ne āvāz de kar dūsroṅ ko ḵẖabar pahuṅchāī to shahar ke andar bādshāh ke gharāne ko ittilā dī gaī. 12go rāt kā vaqt thā to bhī bādshāh ne uṭh kar apne afsaroṅ ko bulāyā aur kahā, “maiṅ āp ko batātā hūṅ ki shām ke faujī kyā kar rahe haiṅ. vah to ḵẖūb jānte haiṅ ki ham bhūkoṅ mar rahe haiṅ. ab vah apnī lashkargāh ko chhoṛ kar khule maidān meṅ chhup gae haiṅ, kyūṅki vah samajhte haiṅ ki isrāīlī ḵẖālī lashkargāh ko dekh kar shahar se zarūr nikaleṅge aur phir ham unheṅ zindā pakaṛ kar shahar meṅ dāḵẖil ho jāeṅge.”
13lekin ek afsar ne mashvrā diyā, “behatar hai ki ham chand ek ādmiyoṅ ko pāṅch bache hue ghoṛoṅ ke sāth lashkargāh meṅ bhejeṅ. agar vah pakṛe jāeṅ to koī bāt nahīṅ. kyūṅki agar vah yahāṅ raheṅ to phir bhī unheṅ hamāre sāth marnā hī hai.”
14chunāṅche do rathoṅ ko ghoṛoṅ samet tayyār kiyā gayā, aur bādshāh ne unheṅ shām kī lashkargāh meṅ bhej diyā. rathbānoṅ ko us ne hukm diyā, “jāeṅ aur patā kareṅ ki kyā huā hai.” 15vah ravānā hue aur shām ke faujiyoṅ ke pīchhe pīchhe chalne lage. rāste meṅ har taraf kapṛe aur sāmān bikhrā paṛā thā, kyūṅki faujiyoṅ ne bhāgte bhāgte sab kuchh phaiṅk kar rāste meṅ chhoṛ diyā thā. isrāīlī rathasvār daryā-e-yardan tak pahuṅche aur phir bādshāh ke pās vāpas ā kar sab kuchh kah sunāyā.
16tab sāmriyā ke bāshinde shahar se nikal āe aur shām kī lashkargāh meṅ jā kar sab kuchh lūṭ liyā. yūṅ vah kuchh pūrā huā jo rabb ne farmāyā thā ki sāḍhe 5 kilogrām behtarīn maidā aur 11 kilogrām jau chāṅdī ke ek sikke ke liye bikegā.
17jis afsar ke bāzū kā sahārā bādshāh letā thā use us ne darvāze kī nigrānī karne ke liye bhej diyā thā. lekin jab log bāhar nikle to afsar un kī zad meṅ ā kar un ke pairoṅ tale kuchlā gayā. yūṅ vaisā hī huā jaisā mard-e-ḵẖudā ne us vaqt kahā thā jab bādshāh us ke ghar āyā thā. 18kyūṅki ilīshā ne bādshāh ko batāyā thā, “kal isī vaqt shahar ke darvāze par sāḍhe 5 kilogrām behtarīn maidā aur 11 kilogrām jau chāṅdī ke ek sikke ke liye bikegā.” 19afsar ne etirāz kiyā thā, “yah nāmumkin hai, ḵẖwāh rabb āsmān ke darīche kyūṅ na khol de.” aur mard-e-ḵẖudā ne javāb diyā thā, “āp apnī āṅkhoṅ se is kā mushāhadā kareṅge, lekin ḵẖud us meṅ se kuchh nahīṅ khāeṅge.”
20ab yah peshgoī pūrī huī, kyūṅki bekābū logoṅ ne use shahar ke darvāze par pāoṅ tale kuchal diyā, aur vah mar gayā.