2 Salātīn 8

yūrām bādshāh shūnīmī aurat kī zamīn vāpas kar detā hai

¹ek din ilīshā ne us aurat ko jis kā beṭā us ne zindā kiyā thā mashvrā diyā, “apne ḵẖāndān ko le kar ārizī taur par bairūn-e-mulk chalī jāeṅ, kyūṅki rabb ne hukm diyā hai ki mulk meṅ sāt sāl tak kāl hogā.” ²shūnīm kī aurat ne mard-e-ḵẖudā kī bāt mān lī. apne ḵẖāndān ko le kar vah chalī gaī aur sāt sāl filistī mulk meṅ rahī. ³sāt sāl guzar gae to vah us mulk se vāpas āī. lekin kisī aur ne us ke ghar aur zamīn par qabzā kar rakhā thā, is liye vah madad ke liye bādshāh ke pās gaī.

⁴ain us vaqt jab vah darbār meṅ pahuṅchī to bādshāh mard-e-ḵẖudā ilīshā ke naukar jaihāzī se guftagu kar rahā thā. bādshāh ne us se daraḵẖwāst kī thī, “mujhe vah tamām baṛe kām sunā do jo ilīshā ne kie haiṅ.” ⁵aur ab jab jaihāzī sunā rahā thā ki ilīshā ne murdā laṛke ko kis tarah zindā kar diyā to us kī māṅ andar ā kar bādshāh se iltimās karne lagī, “ghar aur zamīn vāpas milne meṅ merī madad kījie.” use dekh kar jaihāzī ne bādshāh se kahā, “mere āqā aur bādshāh, yah vahī aurat hai aur yah us kā vahī beṭā hai jise ilīshā ne zindā kar diyā thā.” ⁶bādshāh ne aurat se savāl kiyā, “kyā yah sahīh hai?” aurat ne tasdīq meṅ use dubārā sab kuchh sunāyā. tab us ne aurat kā muāmalā kisī darbārī afsar ke sapurd karke hukm diyā, “dhyān deṅ ki ise pūrī milkiyat vāpas mil jāe! aur jitne paise qabzā karne vālā aurat kī ġairmaujūdgī meṅ zamīn kī fasloṅ se kamā sakā vah bhī aurat ko de die jāeṅ.”

bin-hadad kī maut kī peshgoī

⁷ek din ilīshā damishq āyā. us vaqt shām kā bādshāh bin-hadad bīmār thā. jab use ittilā milī ki mard-e-ḵẖudā āyā hai ⁸to us ne apne afsar hazāel ko hukm diyā, “mard-e-ḵẖudā ke liye tuhfā le kar use milne jāeṅ. vah rabb se darayāft kare ki kyā maiṅ bīmārī se shifā pāūṅgā yā nahīṅ?”

⁹hazāel 40 ūṅṭoṅ par damishq kī behtarīn paidāvār lād kar ilīshā se milne gayā. us ke pās pahuṅch kar vah us ke sāmne khaṛā huā aur kahā, “āp ke beṭe shām ke bādshāh bin-hadad ne mujhe āp ke pās bhejā hai. vah yah jānnā chāhatā hai ki kyā maiṅ apnī bīmārī se shifā pāūṅgā yā nahīṅ?”

¹⁰ilīshā ne javāb diyā, “jāeṅ aur use ittilā deṅ, ‘āp zarūr shifā pāeṅge.’ lekin rabb ne mujh par zāhir kiyā hai ki vah haqīqat meṅ mar jāegā.” ¹¹ilīshā ḵẖāmosh ho gayā aur ṭikṭikī bāṅdh kar baṛī der tak use ghūrtā rahā, phir rone lagā. ¹²hazāel ne pūchhā, “mere āqā, āp kyūṅ ro rahe haiṅ?” ilīshā ne javāb diyā, “mujhe mālūm hai ki āp isrāīliyoṅ ko kitnā nuqsān pahuṅchāeṅge. āp un kī qil’āband ābādiyoṅ ko āg lagā kar un ke javānoṅ ko talvār se qatl kar deṅge, un ke chhoṭe bacchoṅ ko zamīn par paṭaḵẖ deṅge aur un kī hāmilā aurtoṅ ke peṭ chīr ḍāleṅge.” ¹³hazāel bolā, “mujh jaise kutte kī kyā haisiyat hai ki itnā baṛā kām karūṅ?” ilīshā ne kahā, “rabb ne mujhe dikhā diyā hai ki āp shām ke bādshāh ban jāeṅge.”

¹⁴is ke bād hazāel chalā gayā aur apne mālik ke pās vāpas āyā. bādshāh ne pūchhā, “ilīshā ne āp ko kyā batāyā?” hazāel ne javāb diyā, “us ne mujhe yaqīn dilāyā ki āp shifā pāeṅge.” ¹⁵lekin agle din hazāel ne kambal le kar pānī meṅ bhigo diyā aur use bādshāh ke muṅh par rakh diyā. bādshāh kā sāṅs ruk gayā aur vah mar gayā. phir hazāel taḵẖtnashīn huā.

yahūdāh kā bādshāh yahūrām

¹⁶yahūrām bin yahūsafat isrāīl ke bādshāh yūrām kī hukūmat ke pāṅchveṅ sāl meṅ yahūdāh kā bādshāh banā. shurū meṅ vah apne bāp ke sāth hukūmat kartā thā. ¹⁷yahūrām 32 sāl kī umr meṅ bādshāh banā, aur vah yarūshalam meṅ rah kar 8 sāl tak hukūmat kartā rahā. ¹⁸us kī shādī isrāīl ke bādshāh aḵẖiyab kī beṭī se huī thī, aur vah isrāīl ke bādshāhoṅ aur ḵẖāskar aḵẖiyab ke ḵẖāndān ke bure namūne par chaltā rahā. us kā chāl-chalan rabb ko nāpsand thā. ¹⁹to bhī vah apne ḵẖādim dāūd kī ḵẖātir yahūdāh ko tabāh nahīṅ karnā chāhatā thā, kyūṅki us ne dāūd se vādā kiyā thā ki terā aur terī aulād kā charāġ hameshā tak jaltā rahegā.

²⁰yahūrām kī hukūmat ke daurān adomiyoṅ ne baġāvat kī aur yahūdāh kī hukūmat ko radd karke apnā bādshāh muqarrar kiyā. ²¹tab yahūrām apne tamām rathoṅ ko le kar sīr ke qarīb āyā. jab jaṅg chhiṛ gaī to adomiyoṅ ne use aur us ke rathoṅ par muqarrar afsaroṅ ko gher liyā. rāt ko bādshāh gherne vāloṅ kī safoṅ ko toṛne meṅ kāmyāb ho gayā, lekin us ke faujī use chhoṛ kar apne apne ghar bhāg gae. ²²is vajah se mulk-e-adom āj tak dubārā yahūdāh kī hukūmat ke tahat nahīṅ āyā. usī vaqt libnā shahar bhī sarkash ho kar ḵẖudmuḵẖtār ho gayā.

²³bāqī jo kuchh yahūrām kī hukūmat ke daurān huā aur jo kuchh us ne kiyā vah ‘shāhān-e-yahūdā kī tārīḵẖ’ kī kitāb meṅ bayān kiyā gayā hai. ²⁴jab yahūrām mar kar apne bāpdādā se jā milā to use yarūshalam ke us hisse meṅ jo ‘dāūd kā shahar’ kahalātā hai ḵẖāndānī qabr meṅ dafnāyā gayā. phir us kā beṭā aḵẖaziyāh taḵẖtnashīn huā.

yahūdāh kā bādshāh aḵẖaziyāh

²⁵aḵẖaziyāh bin yahūrām isrāīl ke bādshāh yūrām bin aḵẖiyab kī hukūmat ke 12veṅ sāl meṅ yahūdāh kā bādshāh banā. ²⁶vah 22 sāl kī umr meṅ taḵẖtnashīn huā aur yarūshalam meṅ rah kar ek sāl bādshāh rahā. us kī māṅ ataliyāh isrāīl ke bādshāh umrī kī potī thī. ²⁷aḵẖaziyāh bhī aḵẖiyab ke ḵẖāndān ke bure namūne par chal paṛā. aḵẖiyab ke gharāne kī tarah us kā chāl-chalan rabb ko nāpsand thā. vajah yah thī ki us kā rishtā aḵẖiyab ke ḵẖāndān ke sāth baṅdh gayā thā. ²⁸ek din aḵẖaziyāh bādshāh yūrām bin aḵẖiyab ke sāth mil kar rāmāt-jiliād gayā tāki shām ke bādshāh hazāel se laṛe. jab jaṅg chhiṛ gaī to yūrām shām ke faujiyoṅ ke hāthoṅ zaḵẖmī huā ²⁹aur maidān-e-jaṅg ko chhoṛ kar yazrael vāpas āyā tāki zaḵẖm bhar jāeṅ. jab vah vahāṅ ṭhaharā huā thā to yahūdāh kā bādshāh aḵẖaziyāh bin yahūrām us kā hāl pūchhne ke liye yazrael āyā.