2 Salātīn 9

ilīshā yāhū ko masah kartā hai

¹ek din ilīshā nabī ne nabiyoṅ ke guroh meṅ se ek ko bulā kar kahā, “safar ke liye kamarbastā ho kar rāmāt-jiliād ke liye ravānā ho jāeṅ. zaitūn ke tel kī yah kuppī apne sāth le jāeṅ. ²vahāṅ pahuṅch kar yāhū bin yahūsafat bin nimsī ko talāsh kareṅ. jab us se mulāqāt ho to use us ke sāthiyoṅ se alag karke kisī andrūnī kamre meṅ le jāeṅ. ³vahāṅ kuppī le kar yāhū ke sar par tel uṅḍel deṅ aur kaheṅ, ‘rabb farmātā hai ki maiṅ tujhe tel se masah karke isrāīl kā bādshāh banā detā hūṅ.’ is ke bād der na kareṅ balki fauran darvāze ko khol kar bhāg jāeṅ!”

⁴chunāṅche javān nabī rāmāt-jiliād ke liye ravānā huā. ⁵jab vahāṅ pahuṅchā to faujī afsar mil kar baiṭhe hue the. vah un ke qarīb gayā aur bolā, “mere pās kamāṅḍar ke liye paiġām hai.” yāhū ne savāl kiyā, “ham meṅ se kis ke liye?” nabī ne javāb diyā, “āp hī ke liye.”

⁶yāhū khaṛā huā aur us ke sāth ghar meṅ gayā. vahāṅ nabī ne yāhū ke sar par tel uṅḍel kar kahā, “rabb isrāīl kā ḵẖudā farmātā hai, ‘maiṅ ne tujhe masah karke apnī qaum kā bādshāh banā diyā hai. ⁷tujhe apne mālik aḵẖiyab ke pūre ḵẖāndān ko halāk karnā hai. yūṅ maiṅ un nabiyoṅ kā intiqām lūṅgā jo merī ḵẖidmat karte hue shahīd ho gae haiṅ. hāṅ, maiṅ rabb ke un tamām ḵẖādimoṅ kā badlā lūṅgā jinheṅ īzbil ne qatl kiyā hai. ⁸aḵẖiyab kā pūrā gharānā tabāh ho jāegā. maiṅ us ke ḵẖāndān ke har mard ko halāk kar dūṅgā, ḵẖwāh vah bāliġ ho yā bacchā. ⁹merā aḵẖiyab ke ḵẖāndān ke sāth vahī sulūk hogā jo maiṅ ne yarubiām bin nabāt aur bāshā bin aḵẖiyāh ke ḵẖāndānoṅ ke sāth kiyā. ¹⁰jahāṅ tak īzbil kā tālluq hai use dafnāyā nahīṅ jāegā balki kutte use yazrael kī zamīn par khā jāeṅge’.” yah kah kar nabī darvāzā khol kar bhāg gayā.

¹¹jab yāhū nikal kar apne sāthī afsaroṅ ke pās vāpas āyā to unhoṅ ne pūchhā, “kyā sab ḵẖairiyat hai? yah dīvānā āp se kyā chāhatā thā?” yāhū bolā, “ḵẖair, āp to is qism ke logoṅ ko jānte haiṅ ki kis tarah kī gappeṅ hāṅkte haiṅ.” ¹²lekin us ke sāthī is javāb se mutmain na hue, “jhūṭ! sahīh bāt batāeṅ.” phir yāhū ne unheṅ khul kar bāt batāī, “ādmī ne kahā, ‘rabb farmātā hai ki maiṅ ne tujhe masah karke isrāīl kā bādshāh banā diyā hai’.”

¹³yah sun kar afsaroṅ ne jaldī jaldī apnī chādroṅ ko utār kar us ke sāmne sīṛhiyoṅ par bichhā diyā. phir vah narsiṅgā bajā bajā kar nārā lagāne lage, “yāhū bādshāh zindābād!”

yūrām aur aḵẖaziyāh kā anjām

¹⁴yāhū bin yahūsafat bin nimsī fauran yūrām bādshāh ko taḵẖt se utārne ke mansūbe bāṅdhne lagā. yūrām us vaqt pūrī isrāīlī fauj samet rāmāt-jiliād ke qarīb damishq ke bādshāh hazāel se laṛ rahā thā. lekin shahar kā difā karte karte ¹⁵bādshāh shām ke faujiyoṅ ke hāthoṅ zaḵẖmī ho gayā thā aur maidān-e-jaṅg ko chhoṛ kar yazrael vāpas āyā thā tāki zaḵẖm bhar jāeṅ. ab yāhū ne apne sāthī afsaroṅ se kahā, “agar āp vāqaī mere sāth haiṅ to kisī ko bhī shahar se nikalne na deṅ, varnā ḵẖatrā hai ki koī yazrael jā kar bādshāh ko ittilā de de.” ¹⁶phir vah rath par savār ho kar yazrael chalā gayā jahāṅ yūrām ārām kar rahā thā. us vaqt yahūdāh kā bādshāh aḵẖaziyāh bhī yūrām se milne ke liye yazrael āyā huā thā.

¹⁷jab yazrael ke burj par khaṛe paharedār ne yāhū ke ġol ko shahar kī taraf āte hue dekhā to us ne bādshāh ko ittilā dī. yūrām ne hukm diyā, “ek ghuṛsavār ko un kī taraf bhej kar un se mālūm kareṅ ki sab ḵẖairiyat hai yā nahīṅ.” ¹⁸ghuṛsavār shahar se niklā aur yāhū ke pās ā kar kahā, “bādshāh pūchhte haiṅ ki kyā sab ḵẖairiyat hai?” yāhū ne javāb diyā, “is se āp kā kyā vāstā? āeṅ, mere pīchhe ho leṅ.” burj par ke paharedār ne bādshāh ko ittilā dī, “qāsid un tak pahuṅch gayā hai, lekin vah vāpas nahīṅ ā rahā.”

¹⁹tab bādshāh ne ek aur ghuṛsavār ko bhej diyā. yāhū ke pās pahuṅch kar us ne bhī kahā, “bādshāh pūchhte haiṅ ki kyā sab ḵẖairiyat hai?” yāhū ne javāb diyā, “is se āp kā kyā vāstā? mere pīchhe ho leṅ.” ²⁰burj par ke paharedār ne yah dekh kar bādshāh ko ittilā dī, “hamārā qāsid un tak pahuṅch gayā hai, lekin yah bhī vāpas nahīṅ ā rahā. aisā lagtā hai ki un kā rāhanumā yāhū bin nimsī hai, kyūṅki vah apne rath ko dīvāne kī tarah chalā rahā hai.”

²¹yūrām ne hukm diyā, “mere rath ko tayyār karo!” phir vah aur yahūdāh kā bādshāh apne apne rath meṅ savār ho kar yāhū se milne ke liye shahar se nikle. un kī mulāqāt us bāġ ke pās huī jo nabot yazraelī se chhīn liyā gayā thā. ²²yāhū ko pahachān kar yūrām ne pūchhā, “yāhū, kyā sab ḵẖairiyat hai?” yāhū bolā, “ḵẖairiyat kaise ho saktī hai jab terī māṅ īzbil kī butparastī aur jādūgrī har taraf phailī huī hai?” ²³yūrām bādshāh chillā uṭhā, “ai aḵẖaziyāh, ġaddārī!” aur muṛ kar bhāgne lagā.

²⁴yāhū ne fauran apnī kamān khaiṅch kar tīr chalāyā jo sīdhā yūrām ke kaṅdhoṅ ke darmiyān yūṅ lagā ki dil meṅ se guzar gayā. bādshāh ek dam apne rath meṅ gir paṛā. ²⁵yāhū ne apne sāth vāle afsar bidqar se kahā, “is kī lāsh uṭhā kar us bāġ meṅ phaiṅk deṅ jo nabot yazraelī se chhīn liyā gayā thā. kyūṅki vah din yād kareṅ jab ham donoṅ apne rathoṅ ko is ke bāp aḵẖiyab ke pīchhe chalā rahe the aur rabb ne aḵẖiyab ke bāre meṅ elān kiyā, ²⁶‘yaqīn jān ki kal nabot aur us ke beṭoṅ kā qatl mujh se chhupā na rahā. is kā muāvazā maiṅ tujhe nabot kī isī zamīn par dūṅgā.’ chunāṅche ab yūrām ko uṭhā kar us zamīn par phaiṅk deṅ tāki rabb kī bāt pūrī ho jāe.”

²⁷jab yahūdāh ke bādshāh aḵẖaziyāh ne yah dekhā to vah bait-gān kā rāstā le kar farār ho gayā. yāhū us kā tāqqub karte hue chillāyā, “use bhī mār do!” iblīām ke qarīb jahāṅ rāstā jūr kī taraf chaṛhtā hai aḵẖaziyāh apne rath meṅ chalte chalte zaḵẖmī huā. vah bach to niklā lekin majiddo pahuṅch kar mar gayā. ²⁸us ke mulāzim lāsh ko rath par rakh kar yarūshalam lāe. vahāṅ use yarūshalam ke us hisse meṅ jo ‘dāūd kā shahar’ kahalātā hai ḵẖāndānī qabr meṅ dafnāyā gayā. ²⁹aḵẖaziyāh yūrām bin aḵẖiyab kī hukūmat ke 11veṅ sāl meṅ yahūdāh kā bādshāh ban gayā thā.

īzbil kā anjām

³⁰is ke bād yāhū yazrael chalā gayā. jab īzbil ko ittilā milī to us ne apnī āṅkhoṅ meṅ surmā lagā kar apne bāloṅ ko ḵẖūbsūrtī se saṅvārā aur phir khiṛkī se bāhar jhāṅkne lagī. ³¹jab yāhū mahal ke geṭ meṅ dāḵẖil huā to īzbil chillāī, “ai zimrī jis ne apne mālik ko qatl kar diyā hai, kyā sab ḵẖairiyat hai?” ³²yāhū ne ūpar dekh kar āvāz dī, “kaun mere sāth hai, kaun?” do yā tīn ḵẖwājāsarāoṅ ne khiṛkī se bāhar dekh kar us par nazar ḍālī ³³to yāhū ne unheṅ hukm diyā, “use nīche phaiṅk do!”

tab unhoṅ ne malikā ko nīche phaiṅk diyā. vah itne zor se zamīn par girī ki ḵẖūn ke chhīṅṭe dīvār aur ghoṛoṅ par paṛ gae. yāhū aur us ke logoṅ ne apne rathoṅ ko us ke ūpar se guzarne diyā. ³⁴phir yāhū mahal meṅ dāḵẖil huā aur khāyā aur piyā. is ke bād us ne hukm diyā, “koī jāe aur us lāntī aurat ko dafan kare, kyūṅki vah bādshāh kī beṭī thī.”

³⁵lekin jab mulāzim use dafan karne ke liye bāhar nikle to dekhā ki sirf us kī khopṛī, hāth aur pāoṅ bāqī rah gae haiṅ. ³⁶yāhū ke pās vāpas jā kar unhoṅ ne use āgāh kiyā. tab us ne kahā, “ab sab kuchh pūrā huā hai jo rabb ne apne ḵẖādim ilyās tishbī kī mārifat farmāyā thā, ‘yazrael kī zamīn par kutte īzbil kī lāsh khā jāeṅge. ³⁷us kī lāsh yazrael kī zamīn par gobar kī tarah paṛī rahegī tāki koī yaqīn se na kah sake ki vah kahāṅ hai’.”