2 Samūel 1

dāūd ko sāūl aur yūntan kī maut kī ḵẖabar miltī hai

¹jab dāūd amālīqiyoṅ ko shikast dene se vāpas āyā to sāūl bādshāh mar chukā thā. vah abhī do hī din siqlāj meṅ ṭhaharā thā ²ki ek ādmī sāūl kī lashkargāh se pahuṅchā. dukh ke izhār ke liye us ne apne kapṛoṅ ko phāṛ kar apne sar par ḵẖāk ḍāl rakhī thī. dāūd ke pās ā kar vah baṛe ehatirām ke sāth us ke sāmne jhuk gayā. ³dāūd ne pūchhā, “āp kahāṅ se āe haiṅ?” ādmī ne javāb diyā, “maiṅ bāl bāl bach kar isrāīlī lashkargāh se āyā hūṅ.” ⁴dāūd ne pūchhā, “batāeṅ, hālāt kaise haiṅ?” us ne batāyā, “hamāre bahut se ādmī maidān-e-jaṅg meṅ kām āe. bāqī bhāg gae haiṅ. sāūl aur us kā beṭā yūntan bhī halāk ho gae haiṅ.”

⁵dāūd ne savāl kiyā, “āp ko kaise mālūm huā ki sāūl aur yūntan mar gae haiṅ?” ⁶javān ne javāb diyā, “ittifāq se maiṅ jilbūa ke pahāṛī silsile par se guzar rahā thā. vahāṅ mujhe sāūl nazar āyā. vah neze kā sahārā le kar khaṛā thā. dushman ke rath aur ghuṛsavār taqrīban use pakaṛne hī vāle the ⁷ki us ne muṛ kar mujhe dekhā aur apne pās bulāyā. maiṅ ne kahā, ‘jī, maiṅ hāzir hūṅ.’ ⁸us ne pūchhā, ‘tum kaun ho?’ maiṅ ne javāb diyā, ‘maiṅ amālīqī hūṅ.’ ⁹phir us ne mujhe hukm diyā, ‘āo aur mujhe mār ḍālo! kyūṅki go maiṅ zindā hūṅ merī jān nikal rahī hai.’ ¹⁰chunāṅche maiṅ ne use mār diyā, kyūṅki maiṅ jāntā thā ki bachne kā koī imkān nahīṅ rahā thā. phir maiṅ us kā tāj aur bāzūband le kar apne mālik ke pās yahāṅ le āyā hūṅ.”

¹¹yah sab kuchh sun kar dāūd aur us ke tamām logoṅ ne ġam ke māre apne kapṛe phāṛ liye. ¹²shām tak unhoṅ ne ro ro kar aur rozā rakh kar sāūl, us ke beṭe yūntan aur rabb ke un bāqī logoṅ kā mātam kiyā jo māre gae the.

¹³dāūd ne us javān se jo un kī maut kī ḵẖabar lāyā thā pūchhā, “āp kahāṅ ke haiṅ?” us ne javāb diyā, “maiṅ amālīqī hūṅ jo ajnabī ke taur par āp ke mulk meṅ rahatā hūṅ.” ¹⁴dāūd bolā, “āp ne rabb ke masah kie hue bādshāh ko qatl karne kī jur’at kaise kī?” ¹⁵us ne apne kisī javān ko bulā kar hukm diyā, “ise mār ḍālo!” usī vaqt javān ne amālīqī ko mār ḍālā. ¹⁶dāūd ne kahā, “āp ne apne āp ko ḵẖud mujrim ṭhaharāyā hai, kyūṅki āp ne apne muṅh se iqrār kiyā hai ki maiṅ ne rabb ke masah kie hue bādshāh ko mār diyā hai.”

sāūl aur yūntan par mātam kā gīt

¹⁷phir dāūd ne sāūl aur yūntan par mātam kā gīt gāyā. ¹⁸us ne hidāyat dī ki yahūdāh ke tamām bāshinde yah gīt yād kareṅ. gīt kā nām ‘kamān kā gīt’ hai aur ‘yāshar kī kitāb’ meṅ darj hai. gīt yah hai,

¹⁹“hāy, ai isrāīl! terī shān-o-shaukat terī bulandiyoṅ par mārī gaī hai. hāy, tere sūrme kis tarah gir gae haiṅ!

²⁰jāt meṅ jā kar yah ḵẖabar mat sunānā. asqalūn kī galiyoṅ meṅ is kā elān mat karnā, varnā filistiyoṅ kī beṭiyāṅ ḵẖushī manāeṅgī, nāmaḵẖtūnoṅ kī beṭiyāṅ fatah ke nāre lagāeṅgī.

²¹ai jilbūa ke pahāṛo! ai pahāṛī ḍhalāno! āindā tum par na os paṛe, na bārish barse. kyūṅki sūrmāoṅ kī ḍhāl nāpāk ho gaī hai. ab se sāūl kī ḍhāl tel mal kar istemāl nahīṅ kī jāegī.

²²yūntan kī kamān zabardast thī, sāūl kī talvār kabhī ḵẖālī hāth na lauṭī. un ke hathiyāroṅ se hameshā dushman kā ḵẖūn ṭapaktā rahā, vah sūrmāoṅ kī charbī se chamakte rahe.

²³sāūl aur yūntan kitne piyāre aur meharbān the! jīte jī vah ek dūsre ke qarīb rahe, aur ab maut bhī unheṅ alag na kar sakī. vah uqāb se tez aur sherbabar se tāqatvar the.

²⁴ai isrāīl kī ḵẖavātīn! sāūl ke liye āṅsū bahāeṅ. kyūṅki usī ne āp ko qirmizī raṅg ke shāndār kapṛoṅ se mulabbas kiyā, usī ne āp ko sone ke zevrāt se ārāstā kiyā.

²⁵hāy, hamāre sūrme laṛte laṛte shahīd ho gae haiṅ. hāy ai isrāīl, yūntan murdā hālat meṅ terī bulandiyoṅ par paṛā hai.

²⁶ai yūntan mere bhāī, maiṅ tere bāre meṅ kitnā dukhī hūṅ. tū mujhe kitnā azīz thā. terī mujh se muhabbat anokhī thī, vah aurtoṅ kī muhabbat se bhī anokhī thī.

²⁷hāy, hāy! hamāre sūrme kis tarah gir kar shahīd ho gae haiṅ. jaṅg ke hathiyār tabāh ho gae haiṅ.”