2 Samūel 10

ammonī dāūd kī beizzatī karte haiṅ

¹kuchh der ke bād ammoniyoṅ kā bādshāh faut huā, aur us kā beṭā hanūn taḵẖtnashīn huā. ²dāūd ne sochā, “nāhas ne hameshā mujh par meharbānī kī thī, is liye ab maiṅ bhī us ke beṭe hanūn par meharbānī karūṅgā.” us ne bāp kī vafāt kā afsos karne ke liye hanūn ke pās vafad bhejā.

lekin jab dāūd ke safīr ammoniyoṅ ke darbār meṅ pahuṅch gae ³to us mulk ke buzurg hanūn bādshāh ke kān meṅ manfī bāteṅ bharne lage, “kyā dāūd ne in ādmiyoṅ ko vāqaī sirf is liye bhejā hai ki vah afsos karke āp ke bāp kā ehatirām kareṅ? hargiz nahīṅ! yah sirf bahānā hai. asal meṅ yah jāsūs haiṅ jo hamāre dār-ul-hakūmat ke bāre meṅ mālūmāt hāsil karnā chāhate haiṅ tāki us par qabzā kar sakeṅ.” ⁴chunāṅche hanūn ne dāūd ke ādmiyoṅ ko pakaṛvā kar un kī dāṛhiyoṅ kā ādhā hissā muṅḍvā diyā aur un ke libās ko kamar se le kar pāoṅ tak kāṭ kar utaravāyā. isī hālat meṅ bādshāh ne unheṅ fāriġ kar diyā.

⁵jab dāūd ko is kī ḵẖabar milī to us ne apne qāsidoṅ ko un se milne ke liye bhejā tāki unheṅ batāeṅ, “yarīhū meṅ us vaqt tak ṭhahare raheṅ jab tak āp kī dāṛhiyāṅ dubārā bahāl na ho jāeṅ.” kyūṅki vah apnī dāṛhiyoṅ kī vajah se baṛī sharmindagī mahsūs kar rahe the.

ammoniyoṅ se jaṅg

⁶ammoniyoṅ ko ḵẖūb mālūm thā ki is harkat se ham dāūd ke dushman ban gae haiṅ. is liye unhoṅ ne kirāe par kaī jagahoṅ se faujī talab kie. bait-rahob aur zobāh ke 20,000 arāmī piyādā sipāhī, mākā kā bādshāh 1,000 faujiyoṅ samet aur mulk-e-tob ke 12,000 sipāhī un kī madad karne āe. ⁷jab dāūd ko is kā ilm huā to us ne yoāb ko pūrī fauj ke sāth un kā muqāblā karne ke liye bhej diyā. ⁸ammonī apne dār-ul-hakūmat rabbā se nikal kar shahar ke darvāze ke sāmne hī saf’ārā hue jabki un ke arāmī ittihādī zobāh aur rahob mulk-e-tob aur mākā ke mardoṅ samet kuchh fāsile par khule maidān meṅ khaṛe ho gae.

⁹jab yoāb ne jān liyā ki sāmne aur pīchhe donoṅ taraf se hamle kā ḵẖatrā hai to us ne apnī fauj ko do hissoṅ meṅ taqsīm kar diyā. sab se acchhe faujiyoṅ ke sāth vah ḵẖud shām ke sipāhiyoṅ se laṛne ke liye tayyār huā. ¹⁰bāqī ādmiyoṅ ko us ne apne bhāī abīshai ke havāle kar diyā tāki vah ammoniyoṅ se laṛeṅ. ¹¹ek dūsre se alag hone se pahale yoāb ne abīshai se kahā, “agar shām ke faujī mujh par ġālib āne lageṅ to mere pās ā kar merī madad karnā. lekin agar āp ammoniyoṅ par qābū na pā sakeṅ to maiṅ ā kar āp kī madad karūṅgā. ¹²hauslā rakheṅ! ham dilerī se apnī qaum aur apne ḵẖudā ke shaharoṅ ke liye laṛeṅ. aur rabb vah kuchh hone de jo us kī nazar meṅ ṭhīk hai.”

¹³yoāb ne apnī fauj ke sāth shām ke faujiyoṅ par hamlā kiyā to vah us ke sāmne se bhāgne lage. ¹⁴yah dekh kar ammonī abīshai se farār ho kar shahar meṅ dāḵẖil hue. phir yoāb ammoniyoṅ se laṛne se bāz āyā aur yarūshalam vāpas chalā gayā.

shām ke ḵẖilāf jaṅg

¹⁵jab shām ke faujiyoṅ ko shikast kī beizzatī kā ihsās huā to vah dubārā jamā ho gae. ¹⁶hadad’azar ne daryā-e-furāt ke pār masoputāmiyā meṅ ābād arāmiyoṅ ko bulāyā tāki vah us kī madad kareṅ. phir sab hilām pahuṅch gae. hadad’azar kī fauj par muqarrar afsar sobak un kī rāhanumāī kar rahā thā. ¹⁷jab dāūd ko ḵẖabar milī to us ne isrāīl ke tamām laṛne ke qābil ādmiyoṅ ko jamā kiyā aur daryā-e-yardan ko pār karke hilām pahuṅch gayā. shām ke faujī saf’ārā ho kar isrāīliyoṅ kā muqāblā karne lage. ¹⁸lekin unheṅ dubārā shikast mān kar farār honā paṛā. is dafā un ke 700 rathbānoṅ ke ilāvā 40,000 piyādā sipāhī halāk hue. dāūd ne fauj ke kamāṅḍar sobak ko itnā zaḵẖmī kar diyā ki vah maidān-e-jaṅg meṅ halāk ho gayā.

¹⁹jo arāmī bādshāh pahale hadad’azar ke tābe the unhoṅ ne ab hār mān kar isrāīliyoṅ se sulah kar lī aur un ke tābe ho gae. us vaqt se arāmiyoṅ ne ammoniyoṅ kī madad karne kī phir jur’at na kī.